Read efik AMOS 7 Bible Online

AMOS 7 - efik bible

AMOS 7

¹NTEM ke Ɔbɔŋ Jehovah ayak mi ŋkut ŋkpɔ; ndien, sese, enye anam ŋkukuŋkpɔyɔriyɔ ke eritɔŋɔ nte akpa mbiet etibede: ndien, sese, edi udiana-akpa mbiet emi etienede se edidem ekekpeŋede.

²Ndien edikem adaŋemi mmɔ ema eketa ofuri mbiet isɔŋ ema, ami ndɔhɔ, nte, Mbɔk, Ɔbɔŋ Jehovah, dahado: Jacob edinam didie adaha ada? koro enye emekpri.

³Emi esin Jehovah akabare ido: Jehovah ɔdɔhɔ, ete, Ididige.

⁴Ntem ke Ɔbɔŋ Jehovah owut mi: ndien, sese Ɔbɔŋ Jehovah okot, ete eda ikaŋ eŋwana; ndien enye ata akwa inyaŋ, onyuŋ ata obot.

⁵Ndien ndɔhɔ, nte, Ɔbɔŋ Jehovah, mbɔk, tre: Jacob edinam didie adaha ada? koro enye emekpri.

⁶Emi esin Jehovah akabare ido. Ɔbɔŋ Jehovah ɔdɔhɔ, ete, Emi ŋko ididige.

⁷Ntem ke enye owut mi: ndien, Sese, Ɔbɔŋ ada ke enyɔŋ ibibene uruk ŋket, ndien uruk ŋket onyuŋ odu enye ke ubɔk.

⁸Ndien Jehovah obup mi, ete, Afo okut nso ŋkpɔ, Amos? Ndien mbɔrɔ, nte, Uruk ŋket. Ndien Ɔbɔŋ ɔdɔhɔ, ete, Sese, mmɔŋ nsin uruk ŋket ke otu ikɔt mi Israel: ndinyuŋ mbehe aba mmɔ.

⁹Ndien ŋkokoŋo ebiet Isaac eyesomo, ndisana ebiet Israel eyenyuŋ ewure; nyenyuŋ mmen ofut ndaha ke enyɔŋ ntiene ufɔk Jeroboam.

¹⁰Ndien Amaziah oku ke Bethel ɔdɔŋ ekedɔhɔ Jeroboam edidem Israel, ete, Amos omoduk odu abaŋa fi ke ufɔt Israel; isɔŋ ikemeke ndiyɔ kpukpru ikɔ esie.

¹¹Koro Amos ɔdɔhɔde ntem, ete, Jeroboam eyekpa ke ofut, ndien eyetaŋ Israel efep ke isɔŋ mmɔ.

¹²Amaziah onyuŋ ɔdɔhɔ Amos owo ŋkukut ŋko, ete, Daha, fehe ka ke isɔŋ Judah, nyuŋ dia ŋkpɔ do, nyuŋ tiŋ prophecy do:

¹³ndien kutiŋ aba prophecy ke Bethel: koro enye edide edisana ebiet edidem, onyuŋ edi ufɔk edidem.

¹⁴Ndien Amos ɔbɔrɔ, onyuŋ ɔdɔhɔ Amaziah, ete, Ami ndige prophet, ami nnyuŋ ndige eyen prophet; koro ami ndide ekpeme-erɔŋ ye okibi mfri eto sycamore:

¹⁵ndien Jehovah ada mi ke ini ntienede ŋkpri ufene, Jehovah onyuŋ ɔdɔhɔ mi, ete, Ka ketiŋ prophecy nɔ ikɔt mi Israel.

¹⁶Ke emi ndien, kop uyo Jehovah: afo ɔdɔhɔ, ete, Kutiŋ prophecy ubaŋa Israel, kunyuŋ utɔi (ikɔ) ubaŋa ufɔk Isaac.

¹⁷Mmɔdo ntem ke Jehovah ɔdɔhɔ, ete, Ŋwan fo eyedi akpara ke obio, nditɔ-iren fo ye nditɔ fo iban eyenyuŋ eduɔŋɔ ke ofut: ndien eyeda uruk edeme isɔŋ fo; afo eyenyuŋ akpa ke edidehe isɔŋ: eyenyuŋ etaŋ Israel ke idut mmɔ efep.