Read efik AMOS 8 Bible Online

AMOS 8 - efik bible

AMOS 8

¹NTEM ke Ɔbɔŋ Jehovah owut mi ŋkpɔ, ndien, sese, edidat mfri ke akpan.

²Ndien enye ɔdɔhɔ ete, Afo okut nso ŋkpɔ, Amos? Ndien mbɔrɔ nte, Edidat mfri ke akpan. Ndien Jehovah ɔdɔhɔ mi, ete, Utit omosim ikɔt mi Israel; ndiyɔhɔ aba mmɔ.

³Ɔbɔŋ Jehovah onyuŋ ɔdɔhɔ, ete, Ikwɔ ufɔk edidem eyedi eseme ke usen oro: mme okpo ewak! men mmɔ duɔk ke ebiet ekededi: dop uyo!

⁴Mbufo emi itɔŋ mme ubuene ɔdɔŋde mbufo, ekop ikɔ emi, man etak mbon unana ke isɔŋ,

⁵“Ete, ini ewe ke obufa ɔfiɔŋ edibe, man nnyin inyam ibokpot? Ini ewe ke mme sabbath edibe, man nnyin isioŋo mkpasip” ke enam ephah ekpri, enyuŋ enam shekel okpon, enyuŋ ekwaŋa udomo ŋkpɔ abiaŋa?

⁶“Man nnyin idep mbon unana ke okuk, ye mme ubuene ke ikpa-ukot iba; nnyin iyenyuŋ inyam mbio ibokpot.”

⁷Jehovah otomo iseri Jacob, ete, Ndifreke baba ŋkpɔ kiet eke mmɔ enamde tutu amama.

⁸Nte ŋkpɔ emi idinamke isɔŋ enyek? idinamke kpukpru mme andiduŋ ke esit etuaŋa? idinyuŋ iyɔhɔke ofuri nte akpa mmɔŋ? Nte idinyuŋ ifutke, inyuŋ isuhɔre nte akpa Egypt.

⁹Ɔbɔŋ Jehovah onyuŋ ɔdɔhɔ, ete, ndien ama ekem ke usen oro, ke ndinam utin oduk ikɔt ke ufɔt uwemeyo, nnyuŋ nnam isɔŋ okim ke usen uŋwana:

¹⁰ndien nyekabare usɔrɔ mbufo nsin ke ntuaŋa, ye kpukpru ikwɔ mbufo nsin ke eseme; ndien nyeda ɔfɔŋ-ikpo nsine kpukpru owo ke isin; nnyuŋ ndori ibɔ ke kpukpru ibuot, nnyuŋ nnim enye ke ntuaŋa ikpɔŋ eyen: ndien utit esie eyedi ndot-ndot usen.

¹¹Ɔbɔŋ Jehovah ɔdɔhɔ, ete, Sese, ini ke edi, ndien nyedɔŋ akaŋ utom ke isɔŋ, idige akaŋ udia, inyuŋ idige nsat-itɔŋ mmɔŋ, edi eke erikop ikɔ Jehovah:

¹²ndien mmɔ eyediyo, ɔtɔŋɔde ke inyaŋ kiet tutu osim ke inyaŋ eken, enyuŋ eyɔrɔ, ɔtɔŋɔde ke edere tutu osim edem usiaha-utin ke eyom ikɔ Jehovah, edi idikwe.

¹³Ke usen oro ndiye nditɔ-iban ye mkparawa eyekpa mba ke nsat-itɔŋ:

¹⁴emi etomode isop Samaria, enyuŋ edɔhɔde, ete, Ma uwem Abasi fo, O Dan! edɔhɔ ete, Ma uwem usuŋ Beer-sheba; ndien mmɔ eyeduɔŋɔ ke isɔŋ, ndien ididahake aba ke enyɔŋ.