Read efik NUMBERS 1 Bible Online

NUMBERS 1 - efik bible

NUMBERS 1

¹EKEM Jehovah ɔdɔhɔ Moses ke wilderness Sinai, ke efe esop, ke akpa usen udiana-akpa ɔfiɔŋ, ke udiana-akpa isua nte mmɔ eketo, ke isɔŋ Egypt, ete,

²Mbufo eda ibat ofuri esop nditɔ Israel, ke oruk mmɔ, ke ufɔk mme ete mmɔ, ye nte ibat enyiŋ edide,

³kpukpru irenowo kiet kiet; ɔtɔŋɔde ke owo isua edip ye mmɔ emi ebede oro, kpukpru owo eke ekade ekɔŋ ke Israel; afo ye Aaron ebat mmɔ esin ke mme udim mmɔ.

⁴Yak owo kiet kiet ke kpukpru esien odu ye mbufo; kpukpru mmɔ emi edide ibuot ufɔk ete mmɔ.

⁵Ndien mme mmɔ emi edi enyiŋ owo eke edidade ye mbufo: eke Reuben; Elizur eyen Shedeur.

⁶Eke Simeon; Shelumiel, eyen Zurishaddai.

⁷Eke Judah; Nahshon eyen Amminadab.

⁸Eke Issachar; Nathanel eyen Zuar.

⁹Eke Zebulun; Eliab eyen Helon.

¹⁰Eke nditɔ Joseph: eke Ephraim; Elishama eyen Ammihud: eke Manasseh; Gamaliel eyen Pedahzur.

¹¹Eke Benjamin; Abidan eyen Gideoni.

¹²Eke Dan; Ahiezer eyen Ammishaddai.

¹³Eke Asher; Pagiel eyen Ochran.

¹⁴Eke Gad; Eliasaph eyen Deuel.

¹⁵Eke Naphtali; Ahira eyen Enan.

¹⁶Mme mmɔ emi edi mbio emi ekotde edi esop, mbɔŋ mme esien mme ete mmɔ, mme etubom mme tɔsin Israel.

¹⁷Ekem Moses ye Aaron eda mbio emi esiakde enyiŋ mmɔ;

¹⁸ndien mmɔ ebon ofuri esop ke akpa usen udiana-akpa ɔfiɔŋ; ndien mmɔ esiak iman mmɔ, nte asaŋade ye oruk mmɔ, ke ufɔk mme ete mmɔ, nte ibat enyiŋ edide, ɔtɔŋɔde ke owo isua edip, ye mmɔ eke ebede oro, kiet kiet.

¹⁹Kpa nte Jehovah okowukde Moses, kpa ntre ke enye abat mmɔ ke wilderness Sinai.

²⁰Ndien nditɔ Rueben, akpan Israel, nte ubɔŋ mmɔ, ye oruk mmɔ, ye ufɔk mme ete mmɔ esaŋade, ke ibat enyiŋ, kiet kiet, kpukpru iren-owo, ɔtɔŋɔde ke owo isua edip, ye mmɔ eke ebede oro, kpukpru mmɔ eke esaŋade ke udim ekɔŋ ewɔŋɔ;

²¹mme mmɔ emi, ekebatde ke otu mmɔ, ke esien Reuben, edi tɔsin aba ye itiokiet, ye ikie ition.

²²Eke nditɔ Simeon, nte ubon mmɔ, ye oruk mmɔ, ye ufɔk mme ete mmɔ esaŋade, mme mmɔ emi ekebatde ke otu mmɔ, ke ibat enyiŋ, kiet kiet, kpukpru iren-owo, ɔtɔŋɔde ke owo isua edip, ye mmɔ eke ebede oro, kpukpru owo eke esaŋade ke udim ekɔŋ ewɔŋɔ;

²³mme mmɔ emi ekebatde ke otu mmɔ, ke esien Simeon, edi tɔsin aba ye efurenaŋ, ye ikie ita.

²⁴Eke nditɔ Gad, nte ubon mmɔ, ye oruk mmɔ, ye ufɔk mme ete mmɔ esaŋade, ke ibat enyiŋ, ɔtɔŋɔde ke owo isua edip, ye mmɔ eke ebede oro, kpukpru owo eke esaŋade ke udim ekɔŋ ewɔŋɔ;

²⁵mme mmɔ emi eke ebatde ke otu mmɔ, ke esien Gad, edi tɔsin aba ye ition, ye ikie itiokiet ye aba ye udop.

²⁶Eke nditɔ Judah, nte ubon mmɔ, ye oruk mmɔ, ye ufɔk mme ete mmɔ esaŋade ke ibat enyiŋ, ɔtɔŋɔde ke owo isua edip, ye mmɔ eke ebede oro, kpukpru owo eke esaŋade ke udim ekɔŋ ewɔŋɔ;

²⁷mme mmɔ emi ekebatde ke otu mmɔ, ke esien Judah, edi tɔsin ata ye duopenaŋ, ye ikie itiokiet.

²⁸Eke nditɔ Issachar, nte ubon mmɔ, ye oruk mmɔ, ye ufɔk mme ete mmɔ esaŋade, ke ibat enyiŋ, ɔtɔŋɔde ke owo isua edip, ye mmɔ eke ebede oro, kpukpru owo eke esaŋade ke udim ekɔŋ ewɔŋɔ:

²⁹mme mmɔ emi ekebatde ke otu mmɔ, ke esien Issachar, edi tɔsin aba ye duopenaŋ, ye ikie inaŋ.

³⁰Eke nditɔ Zebulun, nte ubon mmɔ, ye oruk mmɔ, ye ufɔk mme ete mmɔ esaŋade, ke ibat enyiŋ ɔtɔŋɔde ke owo isua edip, ye mmɔ eke ebede oro, kpukpru owo eke esaŋade ke udim ekɔŋ ewɔŋɔ;

³¹mme mmɔ emi ekebatde ke otu mmɔ, ke esien Zebulun, edi tɔsin aba ye efureba, ye ikie inaŋ.

³²Eke nditɔ Joseph: eke nditɔ Ephraim, nte ubon mmɔ, ye oruk mmɔ, ye ufɔk mme ete mmɔ esaŋade, ke ibat enyiŋ ɔtɔŋɔde ke owo isua edip ye mmɔ eke ebede oro, kpukpru owo eke esaŋade ke udim ekɔŋ ewɔŋɔ;

³³mme mmɔ emi ekebatde ke otu mmɔ, ke esien Ephraim, edi tɔsin aba, ye ikie ition.

³⁴Eke nditɔ Manasseh, nte ubon mmɔ ye oruk mmɔ, ye ufɔk mme ete mmɔ esaŋade, ke ibat enyiŋ, ɔtɔŋɔde ke owo isua edip, ye mmɔ eke ebede oro, kpukpru mmɔ eke esaŋade ke udim ekɔŋ ewɔŋɔ;

³⁵mme mmɔ emi ekebatde ke otu mmɔ, ke esien Manasseh, edi tɔsin edip ye duopeba, ye ikie iba.

³⁶Eke nditɔ Benjamin, nte ubon mmɔ, ye oruk mmɔ, ye ufɔk mme ete mmɔ esaŋade, ke ibat enyiŋ, ɔtɔŋɔde ke owo isua edip, ye mmɔ eke ebede oro, kpukpru mmɔ eke esaŋade ke udim ekɔŋ ewɔŋɔ;

³⁷mme mmɔ emi ekebatde ke otu mmɔ, ke esien Benjamin, edi tɔsin edip ye efut, ye ikie inaŋ.

³⁸Eke nditɔ Dan, nte ubon mmɔ, ye oruk mmɔ, ye ufɔk mme ete mmɔ esaŋade, ke ibat enyiŋ, ɔtɔŋɔde ke owo isua edip, ye mmɔ eke ebede oro, kpukpru owo eke esaŋade ke udim ekɔŋ ewɔŋɔ;

³⁹mme mmɔ emi ekebatde ke otu mmɔ ke esien Dan, edi tɔsin ata ye iba, ye ikie itiaba.

⁴⁰Eke nditɔ Asher, nte ubon mmɔ ye oruk mmɔ, ye ufɔk mme ete mmɔ esaŋade, ke ibat enyiŋ, ɔtɔŋɔde ke owo isua edip, ye mmɔ eke ebede oro, kpukpru owo eke esaŋade ke udim ekɔŋ ewɔŋɔ;

⁴¹mme mmɔ emi ekebatde ke otu mmɔ, ke esien Asher, edi tɔsin aba ye kiet, ye ikie ition.

⁴²Eke nditɔ Naphtali, nte ubon mmɔ, ye oruk mmɔ, ye ufɔk mme ete mmɔ esaŋade, ke ibat enyiŋ, ɔtɔŋɔde ke owo isua edip, ye mmɔ eke ebede oro, kpukpru owo eke esaŋade ke udim ekɔŋ ewɔŋɔ;

⁴³mme mmɔ emi ekebatde ke otu mmɔ, ke esien Naphtali, edi tɔsin aba ye duopeta, ye ikie inaŋ.

⁴⁴Mme mmɔ emi edi mme mmɔ oro ekebatde, emi Moses ye Aaron ekebatde, ye mbɔŋ Israel owo duopeba: mmɔ edi owo kiet kiet ke ufɔk mme ete mmɔ.

⁴⁵Ndien kpukpru nditɔ Isreal emi ekebatde ke ufɔk mme ete mmɔ ɔtɔŋɔde ke owo isua edip, ye mmɔ eke ebede oro, kpukpru owo eke esaŋade ke udim ekɔŋ ke Israel ewɔŋɔ;

⁴⁶Ndien kpukpru mme mmɔ emi ekebatde edi tɔsin owo ke itie ikie itiokiet, ye tɔsin ita, ye ikie ition ye aba ye udop.

⁴⁷Edi ibatke mme Levite ke esien mme ete mmɔ, isin ke otu mmɔ eken.

⁴⁸Koro Jehovah ɔkɔdɔhɔde Moses, ete,

⁴⁹Edi kubat esien Levi, kunyuŋ uda ibat mmɔ usin ke otu nditɔ Israel.

⁵⁰Edi nim mme Levite ete ekama ebiet-iduŋ ŋkpɔ-ntiense, ye kpukpru ŋkpɔ unam utom esie, ye kpukpru se inyenede enye: edi mmɔ edibiom ebiet-iduŋ emi, ye kpukpru ŋkpɔ unam utom esie: onyuŋ edi mmɔ edinam utom esie, enyuŋ ena ekan ebiet-iduŋ emi ekuk.

⁵¹Ndien ke ini eyomde ndiwuhɔre ebiet-iduŋ, mme Levite ewuri enye: ndien ŋko ke eyomde ebiet-iduŋ ndiwuk, mme Levite enyuŋ eneŋere enye ewuk; ndien esen owo eke asaŋade ekpere enyene ndikpa.

⁵²Ndien yak nditɔ Israel ewuk tent kiet kiet ke nna mmɔ, kiet kiet ke edemɔfɔŋ etak ubom mmɔ nte udim mmɔ esaŋade.

⁵³Ndien yak mme Levite ewuk ekana ebiet-iduŋ ŋkpɔ-ntiense ekuk, man iyaresit okutiene mbon-esop nditɔ Israel: mme Levite enyuŋ etim ekpeme ebiet-iduŋ ŋkpɔ-ntiense.

⁵⁴Ndien nditɔ Israel enam kpukpru se Jehovah eketemede Moses, ntem ke mmɔ enam.