Read efik NUMBERS 17 Bible Online

NUMBERS 17 - efik bible

NUMBERS 17

¹NDIEN ekem Jehovah ɔdɔhɔ Moses, ete, Dɔhɔ nditɔ Israel,

²nyuŋ bɔ mmɔ kpukpru esaŋ kiet kiet, ke adaŋa ibat ufɔk mme ete mmɔ, bɔ kpukpru ŋkwa owo mmɔ esaŋ duopeba, ke adaŋa ibat ufɔk mme ete mmɔ: wet enyiŋ kpukpru owo sin ke esaŋ mmɔ.

³Afo nyuŋ wet enyiŋ Aaron sin ke esaŋ Levi: koro esaŋ kiet editiede ke ibuot ufɔk mme ete mmɔ.

⁴Ndien nim mmɔ ke efe esop ke iso ŋkpɔ-ntiense, emi ndisobode ye mbufo do.

⁵Ndien ama ekem esaŋ owo eke ndimekde, eyesehe: ntem ke ndisuk nsukuyo nditɔ Israel emi mmɔ esukde mbufo, nnam enye ɔkpɔŋ mi.

⁶Ndien Moses ɔdɔhɔ ye nditɔ Israel, ndien kpukpru mme ikpɔ owo mmɔ kiet kiet enɔ enye esaŋ kiet, ke akwa owo kiet, ke adaŋa ibat owo mme ete mmɔ, esaŋ duopeba: esaŋ Aaron onyuŋ esine ke otu mme esaŋ mmɔ.

⁷Ndien Moses ada mme esaŋ oro okonim ke iso Jehovah ke efe ntiense.

⁸Edikem ke eyo esierede, Moses ediduk ke efe ntiense; ndien, sese, esaŋ Aaron eke ufɔk Levi esehe, onyuŋ asiaha ikɔŋ, onyuŋ osioŋo mfri, ndien oŋwum almond.

⁹Ndien Moses ataŋ kpukpru esaŋ oro ke iso Jehovah ɔwɔrɔ edisɔk kpukpru nditɔ Israel: ndien mmɔ ese, kpukpru owo enyuŋ eda esaŋ mmɔ.

¹⁰Ekem Jehovah ɔdɔhɔ Moses, ete Da, esaŋ Aaron fiak dinim ke iso ŋkpɔ-ntiense, man enye etie ke idiɔŋɔ ɔnɔ mbon nsɔŋ-ibuot; ntem ke afo edimen ofuri nsuk-uyo mmɔ ke iso mi efep, mbak mmɔ edikpaŋa.

¹¹Ndien Moses anam ntre, kpa nte emi Jehovah eketemede enye, ntem ke enye akanam.

¹²Ndien nditɔ Israel edɔhɔ Moses, ete, Sese, nnyin imɔŋ ikpaŋa, nnyin imɔŋ itak, kpukpru nnyin imɔŋ itak.

¹³Kpukpru mmɔ eke esaŋade ekpere ebiet-iduŋ Jehovah eyekpaŋa: nte nnyin imɔŋ ikpaŋa kpukpru ima?