Read efik NUMBERS 18 Bible Online

NUMBERS 18 - efik bible

NUMBERS 18

¹EKEM Jehovah ɔdɔhɔ Aaron, ete, afo ye nditɔ iren fo, ye ufɔk usɔ ŋko, ebiom ukwaŋ-ŋkpɔ edisana ebiet: afo ye nditɔ-iren fo enyuŋ ebiom ukwaŋ-ŋkpɔ itie oku mbufo.

²Nyuŋ nam nditɔ-usɔ, esien Levi, iman usɔ, etiene fi edi, man mmɔ ediana ye afo, enyuŋ enam ŋkpɔ enɔ fi: edi afo ye nditɔ-iren fo ŋko edi ke iso efe ntiense.

³Ndien yak mmɔ ekpeme se afo etemede mmɔ ekpeme, ye ŋkpɔ emi ekpekpemede ke ofuri efe oro: edi mmɔ ekusaŋa ekpere ŋkpɔ unam-utom edisana ebiet, ye itie-uwa, mbak mmɔ, ye mbufo ŋko edikpa mkpa.

⁴Ndien yak mmɔ edian idem ye afo enyuŋ ekpeme se ekpekpemede ke efe esop, ke ofuri utom efe oro: ndien esen owo okusaŋa ekpere mbufo.

⁵Ndien mbufo ekpeme se ekpekpemede ke edisana ebiet, ye ke itie-uwa: man iyaresit okutiene aba nditɔ Israel.

⁶Sese ami ŋko mma nsio nditɔ-usɔ mme Levite, ke otu nditɔ Israel: eda mmɔ enɔ mbufo ke enɔ ke eke Jehovah, man enam utom efe esop.

⁷Edi afo ye nditɔ fo ŋko edikpeme ndinam utom idaha oku mbufo, ke kpukpru ŋkpɔ itie-uwa, ye ke edem ukara; mbufo enyuŋ enam ŋkpɔ: mmada idaha oku nnɔ mbufo ke utom enɔ: ndien esen owo eke asaŋade ekpere enyene ndikpa.

⁸Ndien Jehovah ɔdɔhɔ Aaron, ete, Sese, ami ŋko mmɔnɔ, fi ukpeme edimenere uwa mi ke kpukpru edisana ŋkpɔ nditɔ Israel: mmada mmɔ nnɔ fi ye nditɔ fo ke udeme ke nsinsi ewuhɔ.

⁹Emi edidi okuo ke otu ata edisana ŋkpɔ eke mifɔpke ke ikaŋ: kpukpru enɔ mmɔ, ye kpukpru inuak-udia mmɔ, ye kpukpru uwa idiɔk ido mmɔ, ye kpukpru uwa isop mmɔ, eke mmɔ edidade esɔk mi, enye edi ata edisana ŋkpɔ fo, ye eke nditɔ fo.

¹⁰Ke ata edisana ebiet ke afo edita enye; kpukpru iren owo enyene ndita enye: enye eyedi edisana ŋkpɔ fo.

¹¹Emi ŋko onyuŋ edi okuo; edimenere uwa enɔ mi, ye kpukpru edifuŋ uwa nditɔ Israel: mmada mmɔ nnɔ fi, ye nditɔ-iren fo, ye nditɔ-iban fo ŋko, ke nsinsi ewuhɔ: yak kpukpru edisana owo ke ufɔk fo eta enye.

¹²Mmada kpukpru akakan aran, ye kpukpru akakan wine, ye wheat, akpa mfri mmɔ eke ediwade enɔ Jehovah, nnɔ fi.

¹³Akpa mfri ke kpukpru se idude ke isɔŋ mmɔ, eke edade esɔk Jehovah, edidi okuo; kpukpru edisana owo ke ufɔk fo edidia enye.

¹⁴Kpukpru ŋkpɔ eke enimde enɔ Jehovah ke Israel, edidi okuo.

¹⁵Kpukpru se isirerede itie-eyen ke otu kpukpru se idide obukidem eke edade esɔk Jehovah, edide owo, onyuŋ edide mme unam, edidi okuo: edi kutre ndifak akpan owo, nyuŋ fak akpa eyen unam eke midige edisana.

¹⁶Ndien ama edi mme mmɔ emi enyenede ndifak, fak mmɔ adaŋemi ekemde ɔfiɔŋ kiet, ke ekɔm urua fo, ke shekel silver ition, asaŋa ye edisana shekel, emi edi gerah edip.

¹⁷Edi kufak akpa eyen enaŋ, ye akpa eyen erɔŋ, ye akpa eyen ebot; mmɔ edi edisana: da iyip mmɔ sime ke itie-uwa, nyuŋ fɔp ikpɔŋ mmɔ ke uwa ikaŋ nɔ Jehovah ke edinem utebe:

¹⁸Ndien unam mmɔ edidi okuo, kpa nte edifuŋ ikɔŋesit ye afara nnasia edide okuo

¹⁹Mmada kpukpru edimenere uwa ke edisana ŋkpɔ emi nditɔ Israel ewade enɔ Jehovah, nnɔ fi, ye nditɔ-iren fo, ye nditɔ-iban fo ŋko, ke nsinsi ewuhɔ; enye edi nsinsi ediomi inuŋ fo, ye eke ubon fo, ke iso Jehovah.

²⁰Jehovah onyuŋ ɔdɔhɔ Aaron, ete, Afo udunyeneke udeme ke isɔŋ mmɔ, udunyuŋ unyeneke ubak ke otu mmɔ: ami ndi ubak fo, ye udeme fo, ke otu nditɔ Israel.

²¹Ndien, sese, mmada ɔyɔhɔ ubak kpukpru ŋkpɔ ke Israel duop, nnɔ nditɔ Levi eda enyene, ke usiene utom mmɔ emi mmɔ enamde, kpa utom efe esop.

²²Ndien nditɔ Israel ekusaŋa aba ekpere efe esop, mbak mmɔ edidue isop, ndien ekpaŋa mkpa.

²³Edi mme Levite edinam utom efe esop, mmɔ edinyuŋ esio isop mmɔ: emi edi nsinsi ewuhɔ ke ofuri emana mbufo; ndien mmɔ idinyeneke udeme ke otu nditɔ Israel.

²⁴Edi mmɔbɔ nditɔ Israel ɔyɔhɔ ubak duop, emi mmɔ emenerede enɔ Jehovah ke edimenere uwa, nnɔ mme Levite eda enyene: oro esin ndɔhɔ mmɔ nte, Mmɔ ekunyene udeme ke otu nditɔ Israel.

²⁵Ekem Jehovah ɔdɔhɔ Moses, ete, Dɔhɔ ye nditɔ Levi,

²⁶ete mmɔ, Ke adaŋemi mbufo ebɔde nditɔ Israel ɔyɔhɔ ubak duop emi ŋkɔbɔde mmɔ nnɔ mbufo ke udeme mbufo, mbufo esio ndien ɔyɔhɔ ubak duop ke esit, kpa ke ɔyɔhɔ ubak duop oro, emen enɔ Jehovah ke edimenere uwa.

²⁷Ndien yak ebat edimenere uwa mbufo enɔ mbufo, kpa nte ibokpot eke otode ke ɔtɔ ubek ibokpot, ye nte se iyɔhɔde ke ɔtɔ unyimi wine.

²⁸Ntem ke mbufo nde edisio edimenere uwa Jehovah ke kpukpru ɔyɔhɔ ubak duop mbufo, emi mbufo ebɔde nditɔ Israel, ewa; mbufo enyuŋ esio edimenere uwa Jehovah ke esit enɔ Aaron oku.

²⁹Mbufo esio ofuri edimenere uwa Jehovah ke kpukpru mme enɔ mbufo, ewa, esio edisana ubak esie ke ofuri ikpɔŋ esie.

³⁰Nyuŋ dɔhɔ mmɔ, ete, Ke ini mbufo ediwade ikpɔŋ emi otode ke esit, ndien eyebat enɔ mme Levite, kpa nte se itode ke ɔtɔ ubek ibokpot, ye nte se itode ke ɔtɔ unyimi wine.

³¹Ndien mbufo ye ufɔk mbufo edidia enye ke kpukpru ebiet: koro enye edide ŋkpɔ eyen utom mbufo ke usiene utom mbufo ke efe esop.

³²Ndien mbufo ididuehe isop ke esit, ke adaŋemi mbufo edisiode enye ikpɔŋ ke esit ewa: ke ntre ke mbufo idisabakede edisana ŋkpɔ nditɔ Isreal, idinyuŋ ikpaŋake.