Read efik NUMBERS 19 Bible Online

NUMBERS 19 - efik bible

NUMBERS 19

¹EKEM Jehovah ɔdɔhɔ Moses ye Aaron, ete, Emi edi ibet ewuhɔ emi Jehovah okowukde ete, Dɔhɔ nditɔ Israel,

²ete, Eda ididuot uman enaŋ eke ɔfɔnde ama, minyuŋ ibiomoke ndo, eke akanam minyuŋ ikɔŋɔke ɔkpɔnɔ, enɔ fi:

³ndien mbufo eda enye enɔ Eleazar oku, ete ada enye ɔwɔrɔ aka edem nna, ndien owo kiet owot enye ke iso esie:

⁴ndien yak Eleazar oku ada iyip enaŋ ke nnuenubɔk esie, onyuŋ osime iyip esie utim ikatiaba ke iso efe esop;

⁵Ndien yak owo ɔfɔp uman enaŋ ke iso esie: ikpa esie, ye unam esie, ye iyip esie, ye ifuɔ esie, ke enye edifɔp:

⁶Yak oku onyuŋ ada eto cedar, ye hyssop, ye ididuot idet erɔŋ, otop ke ikaŋ emi enaŋ oro ɔfɔbɔde ke esit.

⁷Ndien yak oku oro eyet edisine-ŋkpɔ esiemɔ, onyuŋ eyet obukidem esie ke mmɔŋ, ndien enye ediduk ke nna, ndien oku edidi edidehe tutu osim ke mbubreyo.

⁸Ndien yak andifɔp enye onyuŋ eyet edisine-ŋkpɔ esie, onyuŋ eyet obukidem esie ke mmɔŋ, ndien edidi edidehe tutu osim mbubreyo.

⁹Ndien yak owo emi edide edisana owobi ntɔŋ enaŋ oro, edinim ke edem nna ke ɔtɔ emi asanade, ndien yak ekpeme enye enɔ mbon esop nditɔ Israel ke eke mmɔŋ udarade ndek: enye edi uwa idiɔk ido.

¹⁰Ndien yak andiwobi ntɔŋ enaŋ eyet edisine-ŋkpɔ esiemɔ, onyuŋ edi edidehe tutu osim mbubreyo: ndien eyena ke nsinsi ewuhɔ nditɔ Israel ye eke oduduŋ eke oduŋde ke otu mmɔ.

¹¹Owo eke otukde okpo owo ekededi enyene ndidi edidehe ke ofuri usen itiaba.

¹²Enye enyene ndida mmɔŋ oro nyet idem esie ke ɔyɔhɔ usen ita, ndien ke ɔyɔhɔ usen itiaba enye edidi edisana: edi edieke miyetke idem esie ke ɔyɔhɔ usen ita, enye ididige edisana ke ɔyɔhɔ usen itiaba.

¹³Owo ekededi eke otukde okpo owo eke akpade ndien miyetke idem esie, asabare iduŋ Jehovah: ndien mmɔ enyene ndisibe owo oro mfep ke otu Israel: koro mikesimeke enye mmɔŋ udarade ndek, enye eyedi edidehe; ndek esie osuk adiana enye ke idem.

¹⁴Emi edi ewuhɔ, ke ini owo akpade ke tent: kpukpru owo eke edukde ke tent oro, ye kpukpru se idude ke tent, edidi edidehe ke usen itiaba.

¹⁵Kpukpru usin-ŋkpɔ eke enade iŋwaŋ, eke mikɔbɔpke okukup ke esit, edidi edidehe ŋko.

¹⁶Ndien owo ekededi eke editukde owo emi ewotde ke ofut ke ikɔt, mme okpo owo, mme ɔkpɔ owo, mme udi, edidi edidehe ke usen itiaba.

¹⁷Ndien yak mmɔ eda ndusuk ntɔŋ enaŋ idiɔk-ŋkpɔ oro ekefɔpde, enɔ owo eke edehede, enyuŋ eda mmɔŋ idim esin ke esit ke usan;

¹⁸Ndien yak owo eke asanade ada hyssop, edebi ke mmɔŋ oro ndien ada osime ke tent oro, ye ke kpukpru usin-ŋkpɔ, ye mbio eke edude do, ke idem, ye owo eke otukde ɔkpɔ, mme owo oro ekewotde, mme akpa mkpa, mme udi:

¹⁹Ke ntre yak owo eke asanade osime owo eke edehede, ke ɔyɔhɔ usen ita, ye ke ɔyɔhɔ usen itiaba: ndien enye edinam idem esie asana ke ɔyɔhɔ usen itiaba, ndien yak enye eyet ɔfɔŋidem esie, onyuŋ eyet idem esie ke mmɔŋ, ndien enye eyedi edisana ke mbubreyo.

²⁰Edi ama edi owo eke edehede, ndien minyimeke ndinam idem esie asana, enyene ndisibe ukpɔŋ oro ke otu esop mfep: koro enye asabarede edisana ebiet Jehovah: ikedaha mmɔŋ udarade ndek isime enye ke idem; enye edi edidehe.

²¹Ndien yak ana nte nsinsi ewuhɔ ɔnɔ mmɔ, ete, Ke owo emi adade mmɔŋ udarade ndek osime enye, enyene ndiyet edisine-ŋkpɔ esiemɔ; ndien owo eke onyuŋ otukde mmɔŋ udarade ndek oro, enyene nditie ke ndek tutu osim ke mbubreyo.

²²Ndien kpukpru se andidehe otukde eyedehe; ndien ukpɔŋ eke onyuŋ otukde enye, edidi edidehe tutu osim mbubreyo.