Read efik NUMBERS 2 Bible Online

NUMBERS 2 - efik bible

NUMBERS 2

¹EKEM Jehovah ɔdɔhɔ Moses ye Aaron, ete Yak kpukpru nditɔ Israel kiet,

²kiet, etiene ɔfɔŋ etak ubom mmɔ, ke ɔtɔ idiɔŋɔ ufɔk mme ete mmɔ, ewuk tent: yak ewuk nsan-nsan ekan efe esop ekuk.

³Ndien yak mmɔ emi etienede ɔfɔŋ etak ubom, nna Judah ewuk ke iso, ke edem usiaha-utin, nte mme udim mmɔ edide: ndien Nahshon eyen Amminadab edidi etubom nditɔ Judah.

⁴Ndien udim esie, ye owo mmɔ emi ekebatde, edi tɔsin owo ata ye duopenaŋ, ye ikie itiɔkiet.

⁵Ndien mme mmɔ emi ediwukde ediana enye edi esien Issachar: ndien Nethaneel eyen Zuar edidi etubom nditɔ Issachar.

⁶Ndien udim esie, ye owo esie emi ekebatde, edi tɔsin aba, ye duopenaŋ, ye ikie inaŋ.

⁷Ndien esien Zebulun: ndien Eliab eyen Helon edidi etubom nditɔ Zebulun.

⁸Udim esie ŋko, ye owo esie emi ekebatde, edi tɔsin aba ye efurenaŋ, ye ikie inaŋ.

⁹Kpukpru mbio nna Judah emi ekebatde, edi tɔsin owo ke itie ikie ye anaŋ, ye tɔsin itiokiet, ye ikie inaŋ, nte mme udim mmɔ esaŋade. Mme mmɔ emi edibem iso ewuhɔre.

¹⁰Ɔfɔŋ etak ubom nna Reuben edidu ke edem usuk, nte mme udim mmɔ esaŋade: ndien Elizur ye Shedeur edidi etubom nditɔ Rueben.

¹¹Ndien udim esie, ye owo esie emi ekebatde, edi tɔsin aba ye itiokiet, ye ikie ition.

¹²Ndien mmɔ emi ediwukde ediana enye edidi esien Simeon: ndien Shelumiel eyen Zurishaddai etubom nditɔ Simeon.

¹³Ndien udim esie, ye owo esie emi ekebatde, edi tɔsin aba ye efurenaŋ, ye ikie ita.

¹⁴Ndien esien Gad: ndien etubom nditɔ Gad edidi Eliasaph eyen Reuel.

¹⁵Ndien udim esie, ye owo esie emi ekebatde, edi tɔsin aba ye ition, ye ikie itiokiet ye aba ye udop.

¹⁶Kpukpru mmɔ emi ekebatde ke nna Reuben edi tɔsin owo ke itie ikie ye aba ye duopekiet, ye ikie inaŋ ye aba ye udop, nte mme udim mmɔ esaŋade. Ndien yak mme mmɔ emi ewuhɔre ediana.

¹⁷Ndien ewuhɔre efe esop, ye nna mme Levite ke ufɔt ata nna; kpa nte emi ekewukde, kpa ntre ke kpukpru owo ediwuhɔre ke ɔtɔ mmɔ, Nte ɔfɔŋ etak ubom esaŋade.

¹⁸Ɔfɔŋ etak ubom nna Ephraim edidu ke edem usop-utin, nte mme udim mmɔ esaŋade: ndien Elishama eyen Ammihud edidi etubom nditɔ Ephraim.

¹⁹Ndien udim esie, ye owo esie emi ekebatde, edi tɔsin owo aba, ye ikie ition.

²⁰Ndien esien Manasseh adiana enye: ndien Gamaliel eyen Pedahzur edidi etubom nditɔ Manasseh.

²¹Ndien udim esie, ye owo esie emi ekebatde, edi tɔsin edip ye duopeba, ye ikie iba.

²²Ndien esien Benjamin: Abidan eyen Gideoni edinyuŋ edi etubom nditɔ Benjamin.

²³Ndien udim esie ye owo esie emi ekebatde, edi tɔsin edip ye efut, ye ikie inaŋ.

²⁴Kpukpru mme mmɔ emi ekebatde ke nna Ephraim edi tɔsin owo ke itie ikie ye itiaita, ye ikie, nte mme udim mmɔ esaŋade. Yak mme mmɔ emi ewuhɔre ndien ke ɔyɔhɔ udim ita.

²⁵Ɔfɔŋ etak ubom nna Dan edidu ke edem edere, nte udim mmɔ esaŋade: ndien Ahiezer eyen Ammishaddai edidi etubom nditɔ Dan.

²⁶Ndien udim esie, ye owo esie emi ekebatde, edi tɔsin ata ye iba, ye ikie itiaita.

²⁷Ndien mme mmɔ emi ediwukde ediana enye edidi esien Asher: ndien Pagiel eyen Ochran edidi etubom nditɔ Asher.

²⁸Ndien udim esie, ye owo esie emi ekebatde, edi tɔsin aba ye kiet ye ikie ition.

²⁹Ndien esien Naphtali: ndien Ahira eyen Enan edidi etubom nditɔ Naphtali.

³⁰Ndien udim esie, ye owo esie emi ekebatde, edi tɔsin aba ye duopeta, ye ikie inaŋ.

³¹Kpukpru mme mmɔ emi ekebatde ke nna Dan edi tɔsin owo ke itie ikie, ye tɔsin aba ye efureba, ye ikie itiokiet. Mme mmɔ emi ediwuhɔre ke ukperedem, Nte ɔfɔŋ etak ubom mmɔ esaŋade.

³²Mme mmɔ emi ke mmɔ ekebat ke otu nditɔ Israel, ke ufɔk mme ete mmɔ: kpukpru mme mmɔ emi ekebatde ke mme nna, nte mme udim mmɔ esaŋade, edi tɔsin owo ke itie ikie itiokiet ye tɔsin ita, ye ikie ition ye aba ye udop.

³³Edi mmɔ ikabtke mme Levite isin ke otu nditɔ Israel; kpa nte emi Jehovah eketemede Moses.

³⁴Ndien nditɔ Israel enam kpukpru se Jehovah eketemede Moses: kpa nte mmɔ ekewukde ekpere ɔfɔŋ etak ubom mmɔ, kpa ntre ke mmɔ ewuhɔre, kpukpru owo ke oruk, ke oruk, ye ke ufɔk mme ete mmɔ.