Read efik NUMBERS 21 Bible Online

NUMBERS 21 - efik bible

NUMBERS 21

¹NDIEN adaŋemi edidem Arad eyen Canaan, emi oduŋde ke edem usuk, okopde nte Israel edide ke usuŋ Atharim; enye aka akaŋwana ekɔŋ ye Israel, onyuŋ omum ndusuk mmɔ.

²Ndien Israel ekaŋa akaŋa enɔ Jehovah, ete, Afo ama ayak mme mmɔ emi esin mi ke ubɔk, nyesɔhi mme obio mmɔ mfep.

³Ndien Jehovah okop uyo Israel, onyuŋ ayak mme Canaanite ɔnɔ mmɔ; ndien mmɔ esɔhi mmɔ ye mme obio mmɔ efep: ndien enye osio ebiet oro enyiŋ Hormah (nsobo).

⁴Ekem mmɔ edaŋa ke obot o Hor esaŋa usuŋ Ididuot Inyaŋ, man ekan ekabare isɔŋ Edom ke edem; ndien usuŋ odoro mmɔ ifem.

⁵Ndien kpukpru owo enam ikɔ ye Abasi ye Moses, ete, Nsinam mbufo edade nnyin ke Egypt ewɔrɔ, ete nnyin idikpaŋa ke wilderness emi? koro uyo ye mmɔŋ miduhe; obukpo uyo emi onyuŋ efek nnyin.

⁶Ndien Jehovah ɔdɔŋ mme idiɔk urukikɔt eduk ke otu mmɔ, enyuŋ edom mmɔ; ndien ediwak owo Israel ekpaŋa.

⁷Ndien kpukpru owo etiene Moses, ekedɔhɔ ete, Nnyin imenam idiɔk: koro nnyin inamde ikɔ ye Jehovah ye afo; kpe Jehovah ubɔk ete enye ɔbɔ nnyin urukikɔt emi efep.

⁸Ndien Moses anam mkpe-ubɔk ɔnɔ kpukpru owo. Ndien Jehovah ɔdɔhɔ Moses, ete, Nam idiɔk urukikɔt kiet, kɔŋ ke enyɔŋ anyan eto: ndien ama ekem, owo ekededi eke urukikɔt odomde enye, ama ese enye, eyedu uwem.

⁹Ndien Moses ada okpoho anam urukikɔt, emen ɔkɔŋ ke enyɔŋ anyan eto, ndien ekem, ke adaŋoro urukikɔt odomde owo, ndien enye ese urukikɔt okpoho oro, enye odu uwem.

¹⁰Ekem nditɔ Israel edaŋa ekena ke Oboth.

¹¹Ndien mmɔ edaŋa ke Oboth, eka ekana ke Iye-abarim ke wilderness emi anade ke iso Moab, ke edem usiaha-utin.

¹²Ndien mmɔ edaŋa do, eka ekena ke itihere Zered.

¹³Mmɔ enyuŋ edaŋa do ŋko, eka ekena ke edem Arnon oko, emi odude ke wilderness, onyuŋ otode ke adaŋa mme Amorite: koro Arnon edide adaŋa Moab, ke ufɔt Moab ye mme Amorite.

¹⁴Mmɔdo edɔhɔde ke ŋwed mme ekɔŋ Jehovah, ete: “(Jehovah ada) Vaheb ke oyobio, ye mme idim,

¹⁵Arnon, ye usuhɔre mme idim emi ekabarede ese itie Ar, onyuŋ anade ke adaŋa Moab.”

¹⁶Ndien mmɔ edaŋa do eka Beer: oro edi obube mmɔŋ emi Jehovah ɔkɔdɔhɔde Moses abaŋa, ete, Nam kpukpru owo esop ke ɔtɔ kiet, ndien nyenɔ mmɔ mmɔŋ.

¹⁷Ndien Israel ekwɔ ikwɔ emi, ete, O obube, wɔrɔ mmɔŋ; mbufo ekwɔ enɔ enye:

¹⁸O obube, emi ikpɔ owo eketibide, emi mbɔŋ obio ekedade eto ye esaŋ mmɔ edɔk enye.

¹⁹Ndien mmɔ edaŋa ke wilderness oro eka Mattanah: mmɔ enyuŋ edaŋa ke Mattanah ŋko eka Nahaliel: ndien ekpɔŋ Nahaliel ewɔrɔ ke Bamoth:

²⁰Ndien mmɔ edaŋa ke Bamoth ekesim ke itihere emi odude ke isɔŋ Moab ese ibuot Pisgah, onyuŋ ese edem wilderness.

²¹Ndien Israel ɔdɔŋ mme isuŋ-utom ke ɔtɔ Sihon ɔbɔŋ mme Amorite, ete, Mbɔk, yak nsaŋa ke isɔŋ fo mbe:

²²nnyin idiwahake iduk ke iŋwaŋ, ye ke iŋwaŋ vine; nnyin idiŋwɔŋke mmɔŋ obube: nnyin iyesaŋa ke ɔkpɔ-usuŋ edidem, tutu nnyin ibe adaŋa fo.

²³Ndien Sihon inyimeke Israel asaŋa ke adaŋa esie ebe: edi Sihon otim kpukpru ikɔt esie ɔtɔ kiet, ndien ɔwɔrɔ ɔkɔbiɔŋɔ Israel ke wilderness; ndien aka ke Jahaz, akaŋwana ekɔŋ ye Israel.

²⁴Ndien Israel asuan enye ke iso ofut, onyuŋ ada isɔŋ esie, ɔtɔŋɔde ke Arnon tutu osim ke Jabbok, ye nditɔ Ammon: koro adaŋa nditɔ Ammon ɔsɔŋde.

²⁵Israel onyuŋ ada kpukpru obio emi, Israel onyuŋ oduŋ ke kpukpru obio mme Amorite, ke Heshbon, ye ke kpukpru obio iŋwaŋ mmɔ.

²⁶Koro Heshbon ekedide obio Sihon ɔbɔŋ mme Amorite, enye okonyuŋ aŋwana ekɔŋ ye akpa edidem Moab, onyuŋ ɔbɔ enye ofuri isɔŋ esie ke ubɔk, tutu osim ke Arnon.

²⁷Mmɔdo mme mmɔ emi ekede ŋke edɔhɔ, ete, Mbufo eduk ke Heshbon, yak ebɔp obio Sihon, enyuŋ enam enye ɔsɔŋ:

²⁸Koro ikaŋ ama oto ke Heshbon, edem-ikaŋ oto ke obio Sihon: enye ama ata Ar Moab, ata mme andinyene edikoŋ ebiet Arnon.

²⁹Osuk ɔdɔdiɔk ɔnɔ fi, Moab! mbio Chemosh mbufo emetak. Enye ama ada nditɔ-eren esie ye nditɔ esie iban emi ebɔhɔde, ɔnɔ Sihon ɔbɔŋ mme Armorite ke ifin.

³⁰Nnyin imenyuŋ itop mmɔ; Heshbon amatak tutu osim ke Dibon; nnyin imenyuŋ ibiat mmɔ tutu osim ke Nophah, emi etuakde ke Medeba.

³¹Ntem ke Israel etie ke isɔŋ mme Amorite.

³²Ndien Moses ɔdɔŋ ekeyep Jazer, ndien mmɔ eda obio iŋwaŋ mmɔ, enyuŋ ebin mme Amorite emi edude do efep.

³³Ndien mmɔ ewɔŋɔre edɔk ke usuŋ Bashan: ndien Og edidem Bashan ye kpukpru ikɔt esie ewɔŋɔ ekebiɔŋ mmɔ, eka ekɔŋ ye mmɔ ke Edrei.

³⁴Ndien Jehovah ɔdɔhɔ Moses, ete, Kufehe enye: koro mmada enye, ye kpukpru ikɔt esie, ye isɔŋ esie, nsin fi ke ubɔk; ndien afo eyenam enye kpa nte akanamde Sihon ɔbɔŋ mme Amorite emi oduŋde ke Heshbon.

³⁵Ntem ke mmɔ ekan enye, ye nditɔ-iren esie, ye kpukpru ikɔt esie, tutu baba owo esie kiet isuhɔke: ndien mmɔ eda isɔŋ esie enyene.