Read efik NUMBERS 22 Bible Online

NUMBERS 22 - efik bible

NUMBERS 22

¹EKEM nditɔ Israel edaŋa, ekenam nna ke una-isɔŋ Moab, ke edem Jordan oko ekpere Jericho.

²Ndien Balak eyen Zippor okut kpukpru se Israel akanamde mme Amorite.

³Ndien Moab edikhe eti-eti abaŋa mbon oro: koro mmɔ ewakde: ndik onyuŋ anam Moab abaŋa nditɔ Israel.

⁴Ndien Moab ɔdɔhɔ ye mbiowo Midian, ete, Ke emi ke udim emi edita kpukpru se ikande nnyin ikuk, kpa nte enaŋ atade mbiet isɔŋ. Balak eyen Zippor onyuŋ edi edidem Moab ke eyo oro.

⁵Ndien enye ɔdɔŋ mme isuŋtom ke ɔtɔ Balaam eyen Beor ke Pethor, emi odude ke mben akpa, ke isɔŋ nditɔ obio mmɔ, ete, ekot enye edi, ete, Sese mbio emeto ke Egypt edi: sese, mmɔ efuk iso isɔŋ, mmɔ enyuŋ etie esak iso ese mi.

⁶Mbɔk, ndien, di suŋi mbon emi nɔ mi: koro mmɔ esɔŋde ekan mi: mme nyekeme ndikan mmɔ, nnyuŋ mbin mmɔ ke edem emi mfep: koro mmɔfiɔk nte ɔfɔfɔn ɔnɔ owo eke afo ɔdiɔŋde, onyuŋ ɔdɔdiɔk ɔnɔ owo eke afo osuŋide.

⁷Ekem mbiowo Moab, ye mbiowo Midian ekama ŋkpɔ idiɔŋ ke ubɔk mmɔ eka; ndien mmɔ esim ke ɔtɔ Balaam, eketiŋ ikɔ Balak enɔ enye.

⁸Ndien enye ɔdɔhɔ mmɔ, ete, Mbufo edaŋ mi ke okoneyo emi, ndien nyeda ikɔ eke Jehovah edidɔhɔde mi nditiŋ nnɔ mbufo: ndien mbɔŋ Midian edaŋ ye Balaam.

⁹Ekem Abasi etiene Balaam, onyuŋ ɔdɔhɔ ete, Mme anie edi mmɔ emi ye afo?

¹⁰Ndien Balaam ɔbɔrɔ Abasi, ete, Balak eyen Zippor, edidem Moab,

¹¹ɔmɔdɔŋ edidɔhɔ mi ete, Sese, mbio emeto ke Egypt edi, emi efukde iso isɔŋ: mbɔk, di ndien, di suŋi mmɔ nɔ mi; mme nyekeme ndikan mmɔ, nnyuŋ mbin mmɔ mfep.

¹²Ndien Abasi ɔdɔhɔ Balaam, ete, Kuka ye mmɔ; kusuŋi mmɔ oro: koro ɔfɔfɔn ɔnɔ mmɔ.

¹³Ekem Balaam edemere ke usen-ubɔk edidɔhɔ ikpɔ owo Balak, ete, Mbufo enyɔŋɔ edem mbufo: koro Jehovah minyimeke nte nsaŋa ye mbufo.

¹⁴Ndien mbɔŋ Moab edaha ke enyɔŋ, eka eketiene Balak, ndien edɔhɔ ete, Balaam esin ndisaŋa ye nnyin ndi.

¹⁵Ndien Balak ɔtɔŋɔ ntak ɔdɔŋ mbiowo efen, emi ewakde enyuŋ enyenede ukpono ekan mmɔ oko.

¹⁶Ndien mmɔ edisim Balaam, enyuŋ edɔhɔ ete, Balak eyen zippor ɔdɔhɔ ntem, ete, Mbɔk kuyak ŋkpɔ baba kiet akpan fi ndidi ntiene mi:

¹⁷koro nyefori fi eti-eti, nnyuŋ nnam kpukpru se afo edidɔhɔde mi: mbɔk di, ndien, di suŋi mbio emi nɔ mi.

¹⁸Ndien Balaam ɔbɔrɔ ikɔt Balak, ete, Balak ama ɔnɔ mi adaŋa silver ye gold nte ekemede ndiyɔhɔ ufɔk esie, ndikemeke ndibe uyo Jehovah Abasi mi, ŋkanam ekpri mme akamba.

¹⁹Mbɔk, ndien, mbufo ŋko edaŋ mi ke okoneyo emi, man mfiɔk se Jehovah editɔŋɔde ntak ɔdɔhɔ mi.

²⁰Ndien Abasi etiene Balaam ke okoneyo oro, onyuŋ ɔdɔhɔ enye, ete, Sia mbio emi edide ndikot fi, daha ka ye mmɔ; edi suk ikɔ eke ndidɔhɔde fi, oro ikpɔŋ ke afo edinam.

²¹Ekem eyo esiere, ndien Balaam adaha ke enyɔŋ, ɔdiɔŋ ass esie, onyuŋ aka ye mbɔŋ Moab.

²²Ndien Abasi ayat esit koro enye akade: ndien angel Jehovah ada ke ɔkpɔ-usuŋ ɔbiɔŋɔ enye. Ndien enye odoro ke ass esie, Mkparawa esie iba enyuŋ esaŋa ye enye.

²³Ndien ass okut angel Jehovah oro adade ke ɔkpɔ-usuŋ, akama ofut afai ke ubɔk ndien ass awaha ɔkpɔŋ ɔkpɔ-usuŋ, oduk ke iŋwaŋ: ndien Balaam amia ass, ete inam enye afiak ke usuŋ.

²⁴Ndien angel Jehovah aka akada ke mkpafaha usuŋ ke iŋwaŋ vine, emi ibibene edude ke edem mbiba.

²⁵Ndien ke ini ass okutde angel Jehovah, enye ebere ke ibibene, efik Balaam ukot ke ibibene; ndien enye ɔtɔŋɔ ntak amia ass.

²⁶Ndien angel Jehovah aka iso, akada ke ɔtɔ emi afahade, emi usuŋ eke owo awahade aka mme ke nnasia, mme ke ufien miduhe.

²⁷Ndien adaŋemi ass okutde angel Jehovah, enye ɔduɔ ke isɔŋ ke idak Balaam: ndien Balaam ayat esit onyuŋ ada eto oyibi ass.

²⁸Ndien Jehovah atat ass oro inua, ndien enye (ass) ɔdɔhɔ Balaam, ete, nkanam fi Nso ŋkpɔ eke esinde fi oyibi mi utim ikata emi?

²⁹Ndien Balaam ɔdɔhɔ ass esie, ete, Koro afo esuenede mi: akpakam ofut odu mi ke ubɔk, ŋkpowot fi ke idahemi.

³⁰Ndien ass obup Balaam, ete, Nte ami ndige ass fo, emi afo akam odorode mi ke edem toto nte ŋkedi okuo, tutu osim mfin emi? Nte akanam mmanam ntem ye afo?

³¹Ndien enye ete, Ihih. Ndien Jehovah atat Balaam enyin, ndien enye okut angel Jehovah adade ke ɔkpɔ-usuŋ, ye ofut afai ke ubɔk: ndien enye atuak ibuot, onyuŋ ɔduɔ okubi iso esie.

³²Ndien angel Jehovah ɔdɔhɔ enye, ete, Nsinam afo oyibide ass fo utim ikata emi? Sese, ami ŋwɔrɔ ndi ndibiɔŋɔ fi, koro usuŋ fo akwaŋade ke iso mi:

³³Ass emi okonyuŋ okut mi, onyuŋ ɔwɔŋɔre ɔkpɔŋ mi utim mbikata emi: mikpɔwɔŋɔkede ikpɔŋ mi, ŋkpetreke ndiwot fi ŋko ke emi, nnyuŋ nnim enye uwem.

³⁴Ndien Balaam ɔdɔhɔ angel Jehovah, ete, Mmanam idiɔk: koro nmeŋkɔfiɔkke nte afo amada ke usuŋ ndibiɔŋɔ mi: ndien ke emi mifɔnke fi ke enyin, kam yak mfiak edem.

³⁵Ndien angel Jehovah ɔdɔhɔ Balaam, ete, Saŋa ye mbon emi ka: edi kpasuk ikɔ eke ndidɔhɔde fi, suk oro ke afo edidɔhɔ. Ndien Balaam aka ye mbɔŋ Balak.

³⁶Edikem adaŋemi Balak okopde ete ke Balaam ke edi, enye ɔwɔrɔ ndisobo ye enye ke obio Moab kiet, emi odude ke mben Arnon, ye ke akpatre adaŋa.

³⁷Ndien Balak ɔdɔhɔ Balaam, ete, Nte ŋkɔdɔŋke edikot fi? Nsinam afo mutieneke mi? nte ŋkemeke ndikpono fi ke akpanikɔ?

³⁸Ndien Balaam ɔbɔrɔ Balak, ete, Sese, mmedi ke ɔtɔ fo: nte mmekeme ndien ndidɔhɔ ŋkpɔ ekededi? Suk ikɔ emi Abasi edisinde mi ke inua, oro ke nditiŋ.

³⁹Ndien Balaam asaŋa ye Balak aka, ndien mmɔ edisim Kiriath-huzoth.

⁴⁰Balak onyuŋ awa enaŋ ye erɔŋ, onyuŋ ɔnɔ esɔk Balaam ye mbɔŋ emi edude ye enye.

⁴¹Edikem eyo esiere, ndien Balak ada Balaam ɔdɔk ke edikoŋ ebiet Baal, man enye ada do otim okut utit mbio oro.