Read efik NUMBERS 27 Bible Online

NUMBERS 27 - efik bible

NUMBERS 27

¹NDIEN nditɔ-iban Zelophehad, eyen Hepher, eyen Gilead, eyen Machir, eyen Manasseh, emi otode ke ubon Manasseh eyen Joseph esaŋa edi: ndien mmɔ emi edi enyiŋ nditɔ iban esie: Mahlah, ye Noah, ye Hoglah, ye Milcah, ye Tirzah.

²Ndien mmɔ edida ke iso Moses, ye Eleazar oku, ye ke iso ikpɔ owo, ye ofuri mbon esop, ke usuŋ efe esop, ete,

³Ete nnyin akakpa ke wilderness, ndien enye ikoduhe ke udim mmɔ emi ekesopde enam ikɔ ye Jehovah ke udim Korah; edi enye ekekpa ke idiɔk ido esiemɔ, inyuŋ inyeneke nditɔ-iren.

⁴Edinam didie esio enyiŋ ete nnyin ke oruk esie efep, koro enye mikenyeneke eyen-eren? Kam nɔ nnyin udeme ke otu nditɔ-ete ete nnyin.

⁵Ndien Moses emen ikɔ mmɔ oro aka ke iso Jehovah.

⁶Ndien Jehovah ɔbɔrɔ Moses, ete,

⁷Nditɔ-iban Zelophehad edɔhɔ se inende: kutre ndinɔ mmɔ udeme ke otu nditɔ-ete ete mmɔ enyene: nnyuŋ nam udeme ete mmɔ ebe osim mmɔ.

⁸Nyuŋ dɔhɔ nditɔ Israel, ete, Ke ini owo akpade, ndien minyeneke eyen-eren, mbufo enam udeme esie ebe osim eyen esie aŋwan.

⁹Ndien edieke owo minyeneke eyen aŋwan, mbufo eda udeme esie enɔ nditɔ-ete esie.

¹⁰Ndien edieke enye minyeneke nditɔ-ete, mbufo eda udeme esie enɔ nditɔ-ete ete esie.

¹¹Ndien edieke ete esie minyeneke nditɔ-ete, mbufo eda ndien udeme esie enɔ owo oruk esie eke ekperede enye, enyene: ndien emi edina ke ewuhɔ ikpe ɔnɔ nditɔ Israel, kpa nte Jehovah eketemede Moses.

¹²Ekem Jehovah ɔdɔhɔ Moses, ete, Dɔk ke obot Abarim emi, nyuŋ se isɔŋ emi nnɔde nditɔ Israel.

¹³Ndien afo ama ese enye ama, afo nde eyebono ye oruk fo, kpa nte Aaron eyen-uka okobonode.

¹⁴Kpa nte mbufo emiomde uyo mi ke wilderness Zin, ke ini mbon esop etɔhɔde, ndien mikponoke mi ke ɔtɔ mmɔŋ oro ke iso mmɔ: oro edi mmɔŋ Meribah ke Kadesh ke wilderness Zin.

¹⁵Ndien Moses ɔdɔhɔ Jehovah, ete,

¹⁶Yak Jehovah Abasi mme spirit kpukpru owo onim owo ke etubom mbon esop,

¹⁷emi edibemde mmɔ iso ɔwɔrɔ, onyuŋ ebemde mmɔ iso oduk, emi edinyuŋ adade mmɔ ɔwɔrɔ, onyuŋ adade mmɔ oduk; man mbio esop Jehovah ekutie nte ufene eke minyeneke andikpeme.

¹⁸Ndien Jehovah ɔdɔhɔ Moses ete, Da Joshua eyen Nun ke idem fo, owo emi spirit odude enye ke esit, nyuŋ da ubɔk fo dori enye ke idem;

¹⁹nyuŋ nim enye ke iso Eleazar oku, ye ke iso ofuri esop; nyuŋ nɔ enye item ke iso mmɔ.

²⁰Nyuŋ da ubak uteŋe fo dori enye ke idem, man ofuri esop nditɔ Israel ekop uyo esie.

²¹Ndien enye edida ke iso Eleazar oku, emi edibupde ŋkpɔ ke ido Urim ke iso Jehovah enɔ enye: ndien mmɔ edida uyo esie ewɔrɔ, enyuŋ eda uyo esie eduk, enye, ye kpukpru nditɔ Israel ŋko, kpa ofuri esop.

²²Ndien Moses anam kpa nte Jehovah eketemede enye: onyuŋ ada Joshua onim ke iso Eleazar oku, ye ke iso ofuri esop:

²³ndien enye ada ubɔk odori enye ke idem onyuŋ ɔnɔ enye item; kpa nte Jehovah eketemede ke ubɔk Moses.