Read efik NUMBERS 32 Bible Online

NUMBERS 32 - efik bible

NUMBERS 32

¹NDIEN nditɔ Reuben ye nditɔ Gad enyene ata ediwak ufene eti-eti: ndien adaŋemi mmɔ ekutde isɔŋ Jazer, ye isɔŋ Gilead, ete, Sese, ebiet oro edi ebiet ufene;

²nditɔ Gad ye nditɔ Rueben edi edidɔhɔ Moses, ye Eleazar oku, ye mbɔŋ esop, ete, Ataroth, ye Dibon,

³ye Jazer, ye Nimrah, ye Heshbon, ye Elealeh, ye Sebam, ye Nebo, ye Beon,

⁴kpa mme idut emi Jehovah akasuande ke iso mbon esop Israel, edi isɔŋ ufene, ndien nnyin ikɔt fo imenyene ufene:

⁵mmɔ enyuŋ edɔhɔ ete, Edieke afo amade nnyin, yak eda isɔŋ emi enɔ (nnyin) ikɔt fo ke inyene, kuda nnyin ube Jordan.

⁶Ndien Moses ɔdɔhɔ nditɔ Gad ye nditɔ Reuben ete, Nte nditɔ-ete mbufo eyeka ekɔŋ, ndien mbufo etie mi?

⁷Ndien nsinam mbufo eyomde ndinam esit odorore nditɔ Israel ndibe nduk ke isɔŋ emi Jehovah ɔnɔde mmɔ?

⁸Ntem ke mme ete mbufo ekenam ke adaŋemi ŋketiede ke Kadesh-barnea ndɔŋ mmɔ nte eka ekese isɔŋ oro.

⁹Koro adaŋemi mmɔ edɔkde ekesim ke ebedeŋ Eshcol, enyuŋ ekutde isɔŋ oro, mmɔ enam esit odorore nditɔ Israel ndika ŋkoduk ke isɔŋ emi Jehovah ɔkɔnɔde mmɔ.

¹⁰Ndien Jehovah ayat esit ke usen oro, onyuŋ ɔŋwɔŋɔ ete,

¹¹Baba owo mmɔ kiet emi eketode ke Egypt, ɔtɔŋɔde ke owo isua edip, ye mmɔ eke ebede oro, idikwe isɔŋ emi ŋkɔŋwɔŋɔde nnɔ Abraham ye Isaac, ye Jacob: koro mmɔ mitimke isaŋa mi ke edem?

¹²Ibɔhɔke Caleb eyen Jephunneh, eyen Kenaz, ye Joshua eyen Nun: koro mmɔ etimde esaŋa Jehovah ke edem.

¹³Ndien Jehovah ayat esit ye Israel, onyuŋ anam mmɔ ediyo ke wilderness ke ofuri isua aba, tutu ofuri emana oro ɔkɔdiɔkde ke iso Jehovah, osobo ama.

¹⁴Ndien sese, mbufo mme udim mme idiɔk owo, emedahada ke ibuot mme ete mbufo, kpaŋ iyaresit Jehovah ɔdɔdiɔŋ ofiop ye Israel aka iso.

¹⁵Koro mbufo ema ekabare ekpɔŋ enye, enye eyetɔŋɔ ntak ayak mmɔ ɔkpɔŋ ke wilderness: ndien mbufo eyenam kpukpru mbio emi esobo.

¹⁶Ndien mmɔ esaŋa ekpere enye, ete, Nnyin iyediɔŋ ebiet mi inɔ ufene nnyin, inyuŋ idiɔŋ obio inɔ nditɔwɔŋ nnyin:

¹⁷Edi nnyin imɔŋ iwara ibɔbɔ mbɔbɔ ekɔŋ ibem nditɔ Israel iso ika ekɔŋ, tutu nnyin ida mmɔ ikesin ke itie mmɔ ima: ndien nditɔwɔŋ nnyin eyeduŋ ke obio ibibene, mbak mme andiduŋ isɔŋ emi.

¹⁸Nnyin idinyɔŋke idi ebiet nnyin tutu kpukpru nditɔ Israel kiet kiet eda udeme mmɔ.

¹⁹Koro nnyin miyomke ndida udeme nnyin ye mmɔ ke edem Jordan oko, ye ke anyan ebiet; koro udeme nnyin ɔmɔwɔrɔ ɔnɔ nnyin ke edem Jordan emi utin asiahade.

²⁰Ndien Moses ɔdɔhɔ mmɔ, ete, Edieke mbufo edinyimede ndinam ŋkpɔ emi, edieke mbufo edibɔbɔde mbɔbɔ ekɔŋ, ebem Jehovah iso eka ekɔŋ,

²¹kpukpru mbufo enyuŋ ebɔbɔ mbɔbɔ ekɔŋ ebem Jehovah iso ebe Jordan, tutu enye osioŋo mme asua esie ke iso esie efep,

²²isɔŋ emi onyuŋ emem isin ke iso Jehovah: ndien mbufo eyenyɔŋ edi, mbufo idinyuŋ inyeneke ikɔ ye Jehovah ye Israel; ndien isɔŋ emi eyedi udeme mbufo ke iso Jehovah.

²³Edi edieke mbufo midinyimeke ndinam ntem, sese, mbufo enam idiɔk ye Jehovah: ndien mbufo etim efiɔk ete ke idiɔk ido mbufo eyesim mbufo.

²⁴Ɔfɔn mbufo ediɔŋ obio emi enɔ nditɔwɔŋ mbufo, enyuŋ ediɔŋ ebiet enɔ ufene mbufo: enyuŋ enam nte mbufo ekedɔhɔde.

²⁵Ndien nditɔ Gad ye nditɔ Reuben edɔhɔ Moses, ete, Nnyin ikɔt fo iyenam kpa nte ɔbɔŋ mi ɔdɔhɔde.

²⁶Nditɔwɔŋ nnyin, ye iban nnyin, ye ufene nnyin, ye kpukpru mme unam nnyin emɔŋ etie do ke mme obio Gilead:

²⁷ndien kpukpru nnyin ikɔt fo iyebɔbɔ mbɔbɔ ekɔŋ, ibe ika ekɔŋ ke iso Jehovah, kpa nte ɔbɔŋ mi ɔdɔhɔde.

²⁸Ndien Moses eteme Eleazar oku, ye Joshua eyen Nun, ye mme etubom mme ete esien nditɔ Israel, abaŋa mmɔ:

²⁹Moses onyuŋ ɔdɔhɔ mmɔ, ete, Kpukpru nditɔ Gad, ye nditɔ Reuben, ema ebɔbɔ mbɔbɔ ekɔŋ esaŋa ye mbufo ebe Jordan ke iso Jehovah, isɔŋ oro ama onyuŋ emem isin ɔnɔ mbufo; ndien mbufo eda isɔŋ Gilead enɔ mmɔ eda enyene:

³⁰edi edieke mmɔ midinyimeke ndibɔbɔ mbɔbɔ ekɔŋ nsaŋa ye mbufo mbe, yak mmɔ eda udeme mmɔ ke otu mbufo ke isɔŋ Canaan.

³¹Ndien nditɔ Gad, ye nditɔ Reuben ebɔrɔ ete, se Jehovah ɔdɔhɔde nnyin ikɔt fo, kpa ntre ke nnyin idinam.

³²Nnyin iyebɔbɔ mbɔbɔ ekɔŋ isaŋa ibe ke iso Jehovah ika isɔŋ Canaan, ndien nnyin iyeda udeme nnyin ke edem Jordan oko.

³³Ndien Moses emen idut Sihon edidem mme Amorite, ye idut Og edidem Bashan, idem isɔŋ, nte mme obio esie esaŋade ke mme adaŋa, kpa mme obio ke isɔŋ emi akande okuk, ɔnɔ mmɔ, kpa nditɔ Gad, ye nditɔ Reuben, ye ubak nditɔ Manasseh eyen Joseph.

³⁴Ndien nditɔ Gad ediɔŋ Dibon, ye Ataroth, ye Aroer,

³⁵ye Atroth-shphan, ye Jazer, ye Jogbehah,

³⁶ye Beth-nimrah, ye Beth-haran, (emi edide) obio ibebene: (mmɔ enyuŋ ediɔŋ) ebiet unim ufene.

³⁷Ndien nditɔ Reuben enyuŋ ediɔŋ Heshbon, ye Elealeh ye Kiriathaim, ye Nebo,

³⁸ye Baal-meon, (enyuŋ ekpuhɔre enyiŋ mmɔ), ye Sibmah: mmɔ enyuŋ eda enyiŋ efen esio mme obio emi mmɔ ediɔŋde.

³⁹Ekem nditɔ Machir eyen Manasseh edaŋa eka Gilead ekeda enye, ndien mmɔ ebin mme Amorite emi edude ke esit efep.

⁴⁰Ndien Moses emen Gilead ɔnɔ Machir eyen Manasseh; ndien enye oduŋ ke esit.

⁴¹Jair eyen Manasseh onyuŋ aka akada ŋkpri obio mmɔ, ndien osio mmɔ enyiŋ Havvoth-jair.

⁴²Ndien Nobah aka akada Kenath, ye mme obio iŋwaŋ mmɔ, onyuŋ ada Nobah enyiŋ esiemɔ osio enye.