Read efik NUMBERS 35 Bible Online

NUMBERS 35 - efik bible

NUMBERS 35

¹EKEM Jehovah ɔdɔhɔ Moses ke una-isɔŋ Moab, ke mben Jordan Jericho, ete,

²Wuk nditɔ Israel, ete esioŋo obio iduŋ ke udeme emi mmɔ edinyenede, eda enɔ mme Levite; mbufo enyuŋ enɔ mme Levite mben isɔŋ emi akande obio oro okuk.

³Ndien mme obio oro eyedi ebiet iduŋ mmɔ; mben isɔŋ mmɔ eyenyuŋ edi eke ufene mmɔ, ye eke inyene mmɔ, ye eke kpukpru mme unam mmɔ.

⁴Ndien mben isɔŋ mme obio emi mbufo edinɔde mme Levite, etɔŋɔ ke ibibene obio ewɔrɔ tɔsin ibio idomo-okuk ekan ekuk.

⁵Ndien mbufo edomo tɔsin ibio idomo-okuk iba ke ufien, ye tɔsin ibio idomo-okuk iba ke edem usuk, ye tɔsin ibio idomo-okuk iba ke nnasia, ye tɔsin ibio idomo-okuk iba ke edem edere: ndien obio eyena ke ufɔt: emi edidi mben isɔŋ obio mmɔ.

⁶Ndien mme obio emi mbufo edinɔde mme Levite edidi obio-ubɔhɔ itiokiet, emi mbufo edinimde ete owot-owo efehe aka do: ndien mbufo eda obio aba ye iba edian ye mmɔ.

⁷Kpukpru obio emi mbufo edinɔde mme Levite edidi obio aba ye itiaita: kpa mmɔ ye mben isɔŋ mmɔ.

⁸Ndien ama edi mme mbio emi mbufo edisiode ke udeme nditɔ Israel enɔ: mbufo ebɔ mmɔ emi ewakde ediwak, enyuŋ ebɔ mmɔ emi miwakke esisit: yak kpukpru mmɔ esio ke mme obio mmɔ, nte ekemde ke udeme emi mmɔ edidade, enɔ mme Levite.

⁹Ndien Jehovah ɔdɔhɔ Moses, ete, Dɔhɔ ye nditɔ Israel,

¹⁰nyuŋ tiŋ nɔ mmɔ, ete, Ke adaŋemi mbufo ema ekebe Jordan eduk ke isɔŋ Canaan;

¹¹mbufo enim obio eke edidide obio-ubɔhɔ mbufo; man owot-owo eke owotde owo ke ndudue, efehe aka do.

¹²Ndien mmɔ eyedi obio eke mbufo edidade ebɔhɔ osio-usiene: man owot-owo okukpa, tutu enye edi ikpe ke iso mbon esop.

¹³Ndien mme obio emi mbufo edinɔde, edidi obio-ubɔhɔ itiokiet mbufo:

¹⁴mbufo enɔ obio ita ke edem Jordan oko, enyuŋ enim obio ita ke isɔŋ Canaan, mmɔ eyedi obio-ubɔhɔ.

¹⁵Mme obio mbitiokiet emi edidi obio-ubɔhɔ nditɔ Israel, ye eke esen owo, ye eke oduduŋ ke otu mmɔ: kpaŋ kpukpru owot-owo ke ndudue ekpefehe eka do.

¹⁶Ndien edieke enye emende ŋkpɔ-ukwak ɔtɔ owo owot, enye edi owot-owo: owot-owo ntem okutre ndikpakpa.

¹⁷Onyuŋ edieke enye emende itiat eke ekemede ndiwot owo, ke ubɔk ɔtɔ owo owot, enye edi owot-owo: owot-owo ntem okutre ndikpakpa.

¹⁸Mme onyuŋ edieke enye emende eto eke ekemede ndiwot owo, ke ubɔk, oyibi owo owot, enye edi owot-owo: owot-owo okutre ndikpakpa.

¹⁹Edi osio-usiene iyip enyene ndiwot owot-owo: ini eke enye okutde enye, yak owot enye.

²⁰Ndien edieke enye okokoide koi okim owo ke usua, mme etetie ebet, ndien otop ŋkpɔ ɔtɔ owo owot;

²¹mme adada ubɔk esie ɔtɔ enye ke usua owot: owo emi ɔkɔtɔde owo ntre okutre ndikpakpa; enye edi owot-owo: osio-usiene iyip enyene ndiwot owot-owo oro ke ini osimde enye.

²²Edi edieke erikim oro ɔbɔhɔde bɔhɔ ɔnɔmɔ enye ke usua miduhe, mme otop ŋkpɔ ekededi ɔtɔ enye ke miketiehe tie ibet;

²³mme otop itiat ekededi eke ekemede owo ndiwot, ke ini enye mikwe, ndien aka ɔkɔtɔ enye owot, ke midige owo usua esie, minyuŋ iyomke ndinam enye ŋkpɔ:

²⁴yak mbon esop ekpe ndien ikpe ke ufɔt owot-owo oro ye osio-usiene iyip, nte mme ikpe emi esaŋade:

²⁵ndien yak mbon esop enyaŋa owot-owo oro osio ke ubɔk osio-usiene iyip, mbon esop enyuŋ eyak enye afiak ke obio-ubɔhɔ esie, emi enye efehede aka do: ndien enye oduŋ do tutu akamba oku eke ekeyerede edisana aran, akpa.

²⁶Edi edieke owot-owo oro ɔwɔrɔde ebe adaŋa obio-ubɔhɔ esie, eke enye efehede aka do:

²⁷ndien osio-usiene iyip osim enye ke edem adaŋa obio ubɔhɔ esie, osio usiene iyip owot owot-owo oro, iyip idisɔpke enye:

²⁸koro enye enyenede nditie ke obio ubɔhɔ esie tutu akamba oku oro akpa: ndien ke adaŋemi akamba oku oro akpade, owot-owo oro edinyɔŋ ke isɔŋ udeme esie.

²⁹Mbufo eda ndien ŋkpɔ emi enim ke ewuhɔ ikpe ofuri emana mbufo, ke kpukpru ebiet iduŋ mbufo.

³⁰Owo ekededi ama owot owo, yak eda uyo ntiense ewot owot-owo oro: edi owo kierakiet okudi ntiense ɔnɔ owo akpa.

³¹Ndien ŋko mbufo ekubɔ ŋkpɔ baba kiet ke ibuot uwem owot-owo eke odotde ndikpa: ekutre ndiwot enye.

³²Ndien ŋko-ŋko mbufo ekubɔ ŋkpɔ baba kiet ke ibuot owo emi efehede aka ke obio-ubɔhɔ esie, man enye afiak okoduŋ ke isɔŋ, tutu oku akpa.

³³Ndien ŋko mbufo ekubiat isɔŋ emi mbufo edude ke esit: koro iyip abiatde isɔŋ: ndien mmɔ idikemeke ndisio isop nnɔ isɔŋ mbaŋa iyip eke eduɔkde ke esit, ke mibɔhɔke ke iyip owo eke ɔduɔkde enye.

³⁴Ekunyuŋ esabare isɔŋ emi mbufo eduŋde ke esit, emi ami ntiede enye ke ufɔt: koro ami Jehovah nduŋde ke otu nditɔ Israel.