Read efik NUMBERS 4 Bible Online

NUMBERS 4 - efik bible

NUMBERS 4

¹NDIEN Jehovah ɔdɔhɔ Moses ye Aaron, ete, Mbufo eda ibat nditɔ Kohath ke otu nditɔ Levi,

³Ɔtɔŋɔde ke owo isua edip ye duop, ye mmɔ eke ebede oro, tutu osim isua aba ye udop, kpukpru owo eke edukde ke udim utom, man enam utom ke efe esop.

⁴Emi edidi utom nditɔ Kohath ke efe esop, ke ata edisana ŋkpɔ.

⁵Ndien ke ini ewuhɔrede nna, yak Aaron ye nditɔ esie edi, edisuhɔre ukara emi okuide, eda enye efuk ekebe ntiense:

⁶ndien eda ufuhɔ-ŋkpɔ ikpa badger efuk enye, enyuŋ eda awawa ɔfɔŋ ebri enye ke enyɔŋ, ndien esin eto esie.

⁷Ndien yak eda awawa ɔfɔŋ ebri ke okpokoro uyo-iso, enyuŋ eda bowl, ye pan, ye usan, ye cup ediŋwɔŋ uwa edori ke esit: yak nsinsi uyo onyuŋ odoro ke esit.

⁸Ndien yak ebri mmɔ ididuot ɔfɔŋ ke esit, enyuŋ eda ufuhɔ-ŋkpɔ ikpa badger efuk enye, ndien esin eto esie.

⁹Ndien yak mmɔ eda awawa ɔfɔŋ, efuk uwuk-utuenikaŋ emi asakde, ye mme utuenikaŋ esie, ye udiɔŋ-utuenikaŋ esie, ye usan ufarikaŋ esie, ye kpukpru ŋkpɔ aran esie, emi edade enam ŋkpɔ ke esit.

¹⁰Ndien emen enye, ye kpukpru ŋkpɔ esie, esin ke ufuhɔ-ŋkpɔ ikpa badger, ndien eda enye edori ke ubiom-ŋkpɔ.

¹¹Ndien ŋko yak eda awawa ɔfɔŋ ebri ke itie uwa o-gold, enyuŋ eda ufuhɔ-ŋkpɔ ikpa badger efuk enye, ndien esin eto esie.

¹²Ndien yak eda kpukpru ŋkpɔ unam-utom, emi edade enam ŋkpɔ ke edisana ebiet, esin ke awawa ɔfɔŋ, enyuŋ eda ufuhɔ-ŋkpɔ ikpa badger efuk mmɔ, ndien edori mmɔ ke ubiom-ŋkpɔ.

¹³Ndien yak esio ntɔŋ ke itie-uwa efep, enyuŋ eda ididuot ɔfɔŋ efuk enye.

¹⁴Ndien yak mmɔ eda kpukpru ŋkpɔ esie, eke edade enam ke esit, edori ke enyɔŋ, kpa mme uda-ikaŋ ye mme fork, ye mme uwobi-ntɔŋ, ye mme basin, kpukpru ŋkpɔ unam-utom itie-uwa; ndien yak eda ufuhɔ-ŋkpɔ ikpa badger efuk enye, enyuŋ esin eto esie.

¹⁵Ndien ama ekem, ke adaŋemi Aaron ye nditɔ esie efukde edisana ebiet, ye kpukpru ŋkpɔ unam-utom edisana ebiet ema, ke ini ewuhɔrede nna; yak nditɔ Kohath edi ndien edibiom: edi ekuktuk edisana ŋkpɔ baba kiet, mbak mmɔ edikpa. Mme mmɔ emi edi mbiomo nditɔ Kohath ke efe esop.

¹⁶Ndien ŋko se Eleazar eyen Aaron oku edikpemede, edi aran utuen-ikaŋ, ye edifuɔŋ incense, ye inuak-udia kpukpru usen, ye aran-nyere, ye erise ofuri ebiet-iduŋ, ye kpukpru se idude ke esit, ke edisana ebiet, ye ke ŋkpɔ unam-utom esie.

¹⁷Ndien Jehovah ɔdɔhɔ Moses ye Aaron, ete,

¹⁸Mbufo ekusibe esien ye mme ufɔk mme Kohathite ke otu nditɔ Levi efep:

¹⁹Edi enam ntem ye mmɔ, man mmɔ edu uwem, ekukpaŋa, ke ini mmɔ esaŋade ekpere ata edisana ŋkpɔ: yak Aaron ye nditɔ esie eduk, ewut mmɔ kiet kiet utom mmɔ, ye mbiomo mmɔ.

²⁰Edi yak mmɔ ekuduk ekese baba ini kiet, adaŋemi efefuk mme edisana ŋkpɔ, mbak mmɔ edikpaŋa.

²¹Ndien Jehovah ɔdɔhɔ Moses, ete,

²²Nyuŋ da ibat nditɔ Gershon ŋko, ke ofuri ufɔk mme ete mmɔ, ke oruk, ke oruk;

²³ɔtɔŋɔde ke owo isua edip ye duop, ye mmɔ eke ebede oro, tutu osim isua aba ye duop, ke afo edibat mmɔ, kpukpru owo emi edukde ke udim ndinam utom ke efe esop.

²⁴Emi edi utom oruk mme Gershonite, se enamde, ye se ebiomde.

²⁵Yak mmɔ ebiom ndien mme ikpehe iduŋ, ye tent esop, ye ufuhɔ-ŋkpɔ esie, ye ufuhɔ-ŋkpɔ ikpa badger emi odorode enye ke enyɔŋ, ye ikpehe emi eyirede ke usuŋ efe esop,

²⁶Ye mme ikpehe okure, ye ikpehe emi eyirede ke enyin-usuŋ okure, emi akande ebiet-iduŋ ye itie-uwa okuk, ye uruk mmɔ, ye kpukpru ŋkpɔ unam-utom mmɔ, ye kpukpru se enamde enɔ mmɔ: ntem ke mmɔ edinam utom.

²⁷Ke uyo Aaron ye nditɔ esie ke nditɔ Gershon edinam ofuri utom mmɔ, ke kpukpru mbiomo mmɔ, ye ke kpukpru se mmɔ enamde: mbufo enyuŋ ewut mmɔ kpukpru mbiomo mmɔ eke mmɔ edikpemede.

²⁸Emi edi utom oruk nditɔ Gershon ke efe esop: ndien se mmɔ edikpemede odu ke ubɔk Ithamar eyen Aaron oku.

²⁹Ama edi nditɔ Merari, bat mmɔ oruk, oruk, nte ufɔk mme ete mmɔ esaŋade:

³⁰Ɔtɔŋɔde ke owo isua edip ye duop, ye mmɔ eke ebede oro, tutu osim isua aba ye duop, ke afo edibat mmɔ, kpukpru owo eke edukde udim ndinam utom efe esop.

³¹Ndien se mmɔ edikpemede ndibiom, ke kpukpru utom mmɔ ke efep esop edi emi; mme obukpɔk ebiet-iduŋ, ye mme bar esie, ye mme obubɔk esie, ye socket esie;

³²Ye mme obubɔk okure emi akande okuk, ye mme socket mmɔ, ye mme ɔkpɔhɔ mmɔ, ye uruk mmɔ, ye kpukpru ŋkpɔ unam-utom mmɔ, ye kpukpru se mmɔ enamde enɔ mmɔ: ndien mbufo ebat mbiomo mmɔ, ŋkpɔ eke mmɔ ekpemede ke enyiŋ ke enyiŋ.

³³Emi edi utom mme oruk nditɔ Merari, nte ofuri utom mmɔ asaŋade, ke efe esop, ke ubɔk Ithamar eyen Aaron oku.

³⁴Ekem Moses ye Aaron ye mbɔŋ esop ebat nditɔ Kohath, ke oruk, ke oruk, ye ke ufɔk ete ke ufɔk ete:

³⁵Ɔtɔŋɔde ke owo isua edip ye duop, ye mmɔ eke ebede oro, tutu osim owo isua aba ye duop, kpukpru owo eke edukde udim ndinam utom ke efe esop:

³⁶ndien owo mmɔ emi ekebatde, nte oruk mmɔ esaŋade, edi tɔsin owo iba, ye ikie itiaba, ye aba ye duop.

³⁷Mme mmɔ emi edi mmɔ oro ekebatde ke otu oruk mme Kohathite, kpukpru mme anam ŋkpɔ ke efe esop, emi Moses ye Aaron ekebatde, ke uyo Jehovah, ke ubɔk Moses.

³⁸Ndien ŋko nditɔ Gershon emi mmɔ ekebatde, ke oruk, ke oruk ye ke ufɔk ete, ke ufɔk ete

³⁹Ɔtɔŋɔde ke owo isua edip ye duop, ye mmɔ eke ebede oro, tutu osim isua aba ye duop, kpukpru owo eke edukde ke udim ndinam ŋkpɔ ke efe esop;

⁴⁰mme mmɔ emi ekebatde, ke oruk, ke oruk, ye ke ufɔk ete, ke ufɔk ete, edi tɔsin owo iba, ye ikie itiokiet, ye edip ye duop.

⁴¹Mme mmɔ emi edi mme mmɔ oro ekebatde ke otu oruk nditɔ Gershon, kpukpru mme anam ŋkpɔ ke efe esop, emi Moses ye Aaron ekebatde ke uyo Jehovah.

⁴²Ndien mbon oruk nditɔ Merari emi mmɔ ekebatde, ke oruk, ke oruk, ye ke ufɔk ete, ke ufɔk ete;

⁴³Ɔtɔŋɔde ke owo isua edip ye duop, ye mmɔ eke ebede oro, tutu osim isua aba ye duop, kpukpru owo eke edukde udim ndinam utom ke efe esop,

⁴⁴mbio mmɔ emi ekebatde ke oruk, ke oruk, edi tɔsin ita, ye ikie iba.

⁴⁵Mme mmɔ emi edi mme mmɔ oro ekebatde ke otu oruk nditɔ Merari, emi Moses ye Aaron ekebatde, ke uyo Jehovah, ke ubɔk Moses.

⁴⁶Kpukpru mme Levite emi ekebatde, emi Moses ye Aaron ye mbon Israel ekebatde, ke oruk ke oruk, ye ke ufɔk ete, ke ufɔk ete,

⁴⁷Ɔtɔŋɔde ke owo isua edip ye duop, ye mmɔ eke ebede oro, tutu osim isua aba ye duop, kpukpru owo eke edukde ndinam utom, ye utom mbiomo ke efe esop,

⁴⁸Mbio mmɔ emi ekebatde, edi tɔsin owo itiaita, ye ikie ition, ye anaŋ.

⁴⁹Ke uyo Jehovah ke ekebat mmɔ ke ubɔk Moses, esin kpukpru owo ke utom mmɔ, ye mbiomo mmɔ, ye ŋkpɔ eke ebatde enɔ mmɔ, nte emi Jehovah eketemede Moses.