Read efik MICAH 3 Bible Online

MICAH 3 - efik bible

MICAH 3

¹NDIEN ami ndɔhɔ, nte, Mbɔk mbufo mme etubom Jacob, ye mbon ufɔk Israel, ekop; nte idotke mbufo ndifiɔk ikpe?

²Emi esuade eti ŋkpɔ, enyuŋ emade idiɔk-ŋkpɔ; emi eyararede mmɔ ikpɔk ke idem, ye obuk mmɔ ke ɔkpɔ mmɔ efep;

³emi enyuŋ etade obukidem ikɔt mi, enyuŋ eyararede mmɔ ikpɔk ke idem efep: enyuŋ ebuŋde mme ɔkpɔ mmɔ, enyuŋ ekpokde mmɔ mbio-mbio, kpa nte ke eso, ye nte unam ke caldron.

⁴Ndien mmɔ eyeseme enɔ Jehovah, ndien enye idiyereke mmɔ: enye eyenyuŋ odip mmɔ iso esie ke ini oro, kpa nte mmɔ ediɔkde ndinim ido mmɔ.

⁵Ntem ke Jehovah ɔdɔhɔ abaŋa mme prophet eke esinde ikɔt mi edue, eke edade edet mmɔ edom owo, ndien ekwɔrɔ, ete, Emem; ndien ama edi owo eke misinke mmɔ ŋkpɔ ke inua, mmɔ etim ŋkpɔ ekɔŋ etiene enye;

⁶mmɔdo mbufo eyenyene okoneyo eke ŋkukut mididuhe; eyenyuŋ okim ye mbufo, ndien idiɔŋ ididuhe; utin eyenyuŋ oduk ikɔt ɔkpɔŋ mme prophet, uwemeyo eyenyuŋ ebire ye mmɔ.

⁷Ndien but eyenam mbon ŋkukut; mbia-idiɔŋ eyenyuŋ efuk mkpɔk-inua mmɔ: koro ibɔrɔ Abasi mididuhe.

⁸Edi odudu emi otode spirit Jehovah, ye ikpe ye uko eyɔhɔ mi ke idem, man ŋwut Jacob idiɔk ido esie, nnyuŋ ŋwut Israel ukwaŋ-ŋkpɔ esie.

⁹Mbɔk, mbufo mme etubom ufɔk Jacob, ye mbɔŋ ufɔk Israel, ekop uyo emi, mbufo emi item etekde mbufo esit, mbufo enyuŋ ekwaŋa kpukpru se inende.

¹⁰Mmɔ eda iyip ebɔp Zion, eda se ikwaŋ-ade ebɔp Jerusalem.

¹¹Mme etubom esie ebiere ikɔ ke okuk, mme oku esie enyuŋ eteme owo ke inyene, mme prophet esie enyuŋ ebre mfa ke silver: ndien mmɔ ebere edem ye Jehovah, ete, Nte Jehovah iduhe ke otu nnyin? Idiɔk-ŋkpɔ idisimke nnyin.

¹²Mmɔdo eyefuŋ Zion nte iŋwaŋ ebaŋa mbufo, Jerusalem eyenyuŋ akabare edi ibombom ŋko, obot ufɔk emi eyenyuŋ akabare edi ŋkokoŋo ebiet akai.