Read efik ZEPHANIAH 1 Bible Online

ZEPHANIAH 1 - efik bible

ZEPHANIAH 1

¹UYO Jehovah emi okosim Zephaniah eyen Cushi, eyen Gedaliah, eyen Amariah, eyen Hezekiah, ke eyo Josiah eyen Amon, edidem Judah.

²Jehovah ɔdɔhɔ ete, Nyetaŋ kpukpru ŋkpɔ ke iso idut emi mfep.

³Nyetaŋ owo ye ufene, nyetaŋ inuen enyɔŋ, ye iyak akwa mmɔŋ, ye ŋkpɔ eke esinde mmɔ edue, ŋkɔrɔ ye mme idiɔk owo: Jehovah onyuŋ ɔdɔhɔ; ete, Nyesibe owo ke iso idut emi mfep.

⁴Nyenyuŋ nnyan ubɔk mi ndori Judah ke idem, ye kpukpru mme andiduŋ Jerusalem; nnyuŋ nsibe ikɔt Baal emi esuhɔde mfep ke ebiet emi, ŋkɔrɔ ye enyiŋ mme Chemarim ye mme oku;

⁵ye mmɔ eke etuakde ibuot enɔ mbon ikpa-enyɔŋ ke enyɔŋ ɔkɔm ufɔk; ye mmɔ eke etuakde ibuot enyuŋ eŋwɔŋɔde enɔ Jehovah, enyuŋ eŋwɔŋɔde enɔ Malcam;

⁶ye mmɔ eke ekpɔŋde Jehovah efiak edem; eke miyomke Jehovah ŋko, minyuŋ ibineke enye.

⁷Dop uyo ke iso Ɔbɔŋ Jehovah: koro usen Jehovah emekpere: koro Jehovah omowuk uwa: omotim mmɔ emi enye okokotde.

⁸Ndien ama ekem ke usen uwa Jehovah, nyeda ufen nnɔ mbɔŋ, ye nditɔ edidem, ye kpukpru owo eke esinede esen ŋkpɔ ke idem.

⁹Nyenyuŋ nda ufen nnɔ kpukpru owo eke efrɔde ke asaŋudɔk ke usen oro, eke edade afai ye abiaŋa eyɔhɔ ke ufɔk mme ete mmɔ.

¹⁰Jehovah onyuŋ ɔdɔhɔ, ete, Ndien ama ekem ke usen oro, uyo mfiori eyeto ke inua-otop iyak: ntuaŋa eyenyuŋ oto ke edem obio eken; akwa nsobo eyenyuŋ oto ke ŋkpri obot (ete),

¹¹Mbufo mme andiduŋ Maktesh etuaŋa: koro kpukpru mbon urua emesobo; emesibe kpukpru mme obiom a silver efep.

¹²Ndien ama ekem ke ini oro, nyeda utuenikaŋ nduŋɔre Jerusalem, nnyuŋ nda ufen nnɔ mmɔ eke esɔrɔde ke ntak mmɔ: eke edɔhɔde ke esit mmɔ, ete, Jehovah idinamke eti ŋkpɔ, idinyuŋ inamke idiɔk.

¹³Ndien inyene mmɔ eyeka-bare edi se ebumede, mme ufɔk mmɔ eyenyuŋ ewure: ndien mmɔ eyebɔp ufɔk, edi ididuŋke; eyenyuŋ etɔ iŋwaŋ-vine, ndien idiŋwɔŋke wine mmɔ.

¹⁴Akwa usen Jehovah emekpere, emekpere, eyenyuŋ ɔsɔp eti-eti, uyo usen Jehovah; do ke owo uko atua idiɔk-idiɔk.

¹⁵Usen ifuresit edi usen oro: usen ukut ye nnan-enyin, usen ŋwure ye nsobo, usen ekim ye okoneyo, usen obubit enyɔŋ ye ata ekim,

¹⁶usen ukorowo ye mkpo ekɔŋ eke eŋwanade ye mme obio ye mme obio ibibene ye mme edikoŋ tower.

¹⁷Ndien nyeda ukut ntiene owo, ndien mmɔ eyesaŋa nte nnan, koro mmɔ eduede Jehovah: ndien eyeduɔk iyip mmɔ nte ntan, ye obukidem mmɔ nte ifuɔ.

¹⁸Ndien silver mmɔ ye gold mmɔ idikemeke ndinyaŋa mmɔ baba ke usen ifuresit Jehovah: edi ofuri idut eyeta ikaŋ ufup esie; koro enye eyenam kpukpru mme andiduŋ isɔŋ ama ke iwiwa.