Read efik ZECHARIAH 1 Bible Online

ZECHARIAH 1 - efik bible

ZECHARIAH 1

¹KE ɔyɔhɔ ɔfiɔŋ itiaita, ke udiana-akpa isua Darius, uyo Jehovah osim Zechariah, eyen Berechiah, eyen Iddo prophet, ete,

²Jehovah akayat esit eti-eti ye mme ete mbufo.

³Dɔhɔ mmɔ, ndien, ete, Ntem ke Jehovah mme udim ɔdɔhɔ ete, Mbufo ekabare etiene mi, Jehovah mme udim ɔdɔhɔ, ndien ami nyekabare ntiene mbufo, Jehovah mme udim ɔdɔhɔ.

⁴Mbufo ekubiet mme ete mbufo emi akpa prophet ekekotde mmɔ, ete, Ntem ke Jehovah mme udim ɔdɔhɔ, ete, Mbɔk, mbufo ekabare ekpɔŋ mme idiɔk usuŋ mbufo, ye mme idiɔk ido mbufo: edi mmɔ ikopke, inyuŋ ikpaŋke utɔŋ inɔ mi: ke edi uyo Jehovah.

⁵Mme ete mbufo edu mmɔŋ? Nte mme prophet enyuŋ edu uwem ke nsinsi?

⁶Edi ama edi uyo mi ye mme ewuhɔ mi emi ŋkowukde ikɔt mi mme prophet, nte mmɔ ikesimke mme ete mbufo? Ndien mmɔ ekabare, enyuŋ edɔhɔ ete, Kpa nte Jehovah mme udim akaduakde ndinam nnyin, kpa nte ekemde ye usuŋ nnyin ye ido nnyin, kpa ntre ke enye akanam nnyin.

⁷Ke ɔyɔhɔ usen edip ye inaŋ, ke ɔyɔhɔ ɔfiɔŋ duopekiet, oro edi ɔfiɔŋ Shebat, ke udiana akpa isua Darius, uyo Jehovah osim Zechariah, eyen Berechiah, eyen Iddo prophet, ete,

⁸Ŋkokut ke okoneyo, ndien, sese, owo odoro ke ididuot horse, ndien enye ada ke otu eto myrtle oro edude ke ebedeŋ; ndien horse eken eke edide ididuot, ye aran-aran, ye afia, eda enye ke edem.

⁹Ndien ndɔhɔ, nte, Ɔbɔŋ mi, mme mmɔ emi edi nso? Ndien angel; oro enemede ye ami ɔdɔhɔ mi, ete, Ami nyewut fi se mme mmɔ emi edide.

¹⁰Ndien owo oro adade ke ufɔt mme myrtle ɔbɔrɔ, ete, Edi mme mmɔ emi ke Jehovah ɔdɔŋ, ete esaŋa eyɔrɔ ke isɔŋ.

¹¹Ndien mmɔ ebɔrɔ angel Jehovah oro adade ke otu mme myrtle, ete, Nnyin imasaŋa ke isɔŋ edem kpukpru, ndien, sese, ofuri isɔŋ ke etie suŋ onyuŋ odu ke ifure.

¹²Ndien angel ɔbɔrɔ, ete, O Jehovah mme udim, adaŋa didie ke afo udutuaha Jerusalem mbɔm, ye mme obio Judah emi afo ayatde esit ye mmɔ ke ofuri isua ata ye duop emi?

¹³Ndien Jehovah ada nti ikɔ ye ikɔ ndɔŋesit ɔbɔrɔ angel oro enemede ye ami.

¹⁴Ndien angel oro enemede ye ami ɔdɔhɔ mi, ete, Fiori ete, Ntem ke Jehovah mme udim ɔdɔhɔ ete, Mmofibe akamba ufup mbaŋa Jerusalem ye Zion.

¹⁵Ami nnyuŋ nyat esit eti-eti ye mme idut emi etiede ke ifure: koro ami ŋkayatde esit esisit, ndien mmɔ eŋwam idiɔk oro enam aka iso.

¹⁶Mmɔdo ntem ke Jehovah ɔdɔhɔ ete, Nda esit mbɔm mfiak ke Jerusalem: eyebɔp ufɔk mi ke esit, Jehovah mme udim ɔdɔhɔ; ndien eyenyam uruk ke Jerusalem.

¹⁷Tɔŋɔ ntak fiori ete, Ntem ke Jehovah mme udim ɔdɔhɔ ete, Mme obio mi eyesiaha nti ŋkpɔ; Jehovah eyenyuŋ osuk ɔdɔŋ Zion esit, onyuŋ emek Jerusalem.

¹⁸Ndien mmenere enyin mi nnyuŋ nse, ndien, sese, nduk inaŋ!

¹⁹Ndien ndɔhɔ angel oro enemede ye ami, nte, Mme mmɔ emi edi nso? Ndien enye ɔbɔrɔ mi, ete, Mme mmɔ emi edi nduk oro ekesuande Judah ye Israel ye Jerusalem.

²⁰Ndien Jehovah owut mi mbon-usɔ inaŋ.

²¹Ndien ndɔhɔ nte, Mme mmɔ emi edi ndinam nso? Ndien enye ɔdɔhɔ ete, Mme mmɔ emi edi nduk oro ekesuande Judah tutu owo mikekemeke ndimenere ibuot esie: ndien mme mmɔ emi edi ndinam mmɔ ndik, man esioŋo nduk mme idut oro ekemenerede nduk mmɔ eŋwana ye isɔŋ Judah, ete isuan enye, eda eduɔŋɔ.