Read efik ZECHARIAH 11 Bible Online

ZECHARIAH 11 - efik bible

ZECHARIAH 11

¹O LEBANON, berere mme itim fo, man ikaŋ ata mme cedar fo.

²Seme, O cypress; koro cedar ɔduɔde; koro ata ikpɔ owo etakde. Mbufo mme ofriyo Bashan eseme; koro ɔkpɔsɔŋ akai ɔsuhɔrede.

³Kop! uyom eseme mme ekpemerɔŋ; koro ubɔŋ mmɔ atakde: kop! uyom ŋkuni mkparawa lion; koro iseri Jordan atakde.

⁴Ntem ke Jehovah Abasi mi ɔdɔhɔ ete, Bɔk ufene eke ediwotde:

⁵emi mme andinyene mmɔ ewotde mmɔ, ndien mibatke idem mmɔ ke mme edue-isop: ndien mmɔ eke enyemde mmɔ edɔhɔ ete, Ekɔm Jehovah; koro mforode: mme ekpeme mmɔ inyuŋ ituaha mmɔ mbɔm.

⁶Koro mmendituaha aba mme andiduŋ isɔŋ emi mbɔm, Jehovah ɔdɔhɔ: ndien, sese, ami nyeda kpukpru owo kiet kiet nsin mbɔhiduŋ mmɔ ke ubɔk, ye ke ubɔk edidem mmɔ: ndien mmɔ eyesuan obio, ami ndinyuŋ nsioho owo ke ubɔk mmɔ.

⁷Ndien ami mbɔk ŋkpri ufene eke ediwotde, kpa ata ubuene otu ufene. Ndien nda esaŋ iba ke idem mi, nsiɔ kiet enyin Uyai, nsio kiet eken enyiŋ Ubɔp-ŋkpɔ; ntem ke mbɔk ufene oro.

⁸Ndien nsibe mme ekpemerɔŋ mbita mfep ke ɔfiɔŋ kiet; ndien esit mi asua mmɔ, esit mmɔ onyuŋ asua mi.

⁹Ndien ndɔhɔ nte, Ndibɔkke mbufo: se ikpade yak akpa; yak enyuŋ esibe se eyomde ndisibe efep; ndien ama edi se isuhɔde, yak kiet ata obukidem kiet eken.

¹⁰Ndien nda esaŋ mi, kpa Uyai, nnyuŋ nsibe enye, man mbiat ediomi mi emi ŋkodiomide ye kpukpru mme idut.

¹¹Ntem ke enye abiara ke usen oro: ndien ntem ke mme ubuene otu ufene emi esede mi, edifiɔk ete ke enye edi uyo Jehovah.

¹²Ndien ndɔhɔ mmɔ, nte, Ama ɔfɔn mbufo ke enyin, mbufo enɔ mi utip mi: midige ntre, mbufo etre ndinɔ. Ndien mmɔ edomo shekel silver edip ye duop enɔ ke utip mi.

¹³Ndien Jehovah ɔdɔhɔ mi, ete, Men enye duɔk nɔ obot-eso, ata akwa ekɔm-urua emi mmɔ ekɔmde mi. Ndien mmen silver edip ye duop oro nduɔk ke ufɔk Jehovah nnɔ obot eso.

¹⁴Ndien nsibe esaŋ mi eken oro, kpa Ubɔp-ŋkpɔ, man mbiat iman ke ufɔt Judah ye Israel.

¹⁵Ndien Jehovah ɔdɔhɔ mi, ete, Tɔŋɔ ntak bɔ ŋkpɔ utom ndisime ekpemerɔŋ ke idem fo.

¹⁶Koro, sese, ami mmɔŋ ndemere ekpem-erɔŋ ke isɔŋ emi, enye idisehe se ibiarade, idiyomke se ebinde efep, inyuŋ ikɔkke se idade unan, inyuŋ ibɔkke mmɔ eke esɔŋɔde; edi eyeta unam mmɔ eke ekponide, onyuŋ osio mmɔ mbara ukot.

¹⁷Osuk ɔdiɔk ɔnɔ obukpo ekpeme-ufene! ofut eyedoro enye ke ubɔk, ye ke enyin nnasia esie! Ubɔk esie eyekpa, eyenyuŋ etibi enye enyin nnasia.