Read efik ZECHARIAH 13 Bible Online

ZECHARIAH 13 - efik bible

ZECHARIAH 13

¹KE usen oro idim eyesiaha ɔnɔ ufɔk David ye mme andiduŋ Jerusalem, ke eke idiɔk ido ye ke eke ndek.

²Jehovah mme udim onyuŋ ɔdɔhɔ, ete, Ama ekem ke usen oro, nyesibi enyiŋ ndem ke isɔŋ emi mfep, ndien iditihi aba mmɔ: nyenyuŋ nnam mme prophet ye spirit ndek edaŋa ke isɔŋ emi.

³Ndien ama ekem, edieke owo osuk etiŋde prophecy, ndien ete esie ye eka esie emi akamande enye eyedɔhɔ enye, ete, Afo ududuhe uwem, koro afo osude nsu ke enyiŋ Jehovah: ndien ete esie ye eka esie emi akamande enye, eyekim enye ewot, koro enye etiŋde prophecy.

⁴Ndien ama ekem ke usen oro, but eyenam kpukpru mme prophet abaŋa ŋkukut mmɔ, ke ini mmɔ etiŋde prophecy; ndien mmɔ idisineke ɔfɔŋ-idem idet man ebiaŋa owo.

⁵Ndien enye eyedɔhɔ ete, Ami ndige prophet, ami ndi ɔtɔ-iŋwaŋ: koro owo ekedepde mi ke uyen mi.

⁶Ndien owo eyebup enye, ete, Nsidi mme unan emi ke ubɔk fo? Ndien enye eyebɔrɔ ete, Edi se ŋkadade ke ufɔk mme ufan mi.

⁷Jehovah mme udim ɔdɔhɔ, ete, Ofut, demere yom ekpemerɔŋ mi, yom owo emi edide nsaŋa mi: kpi ekpemerɔŋ, ndien erɔŋ eyesuana: ndien nyekabare ubɔk mi nnam ŋkpri nditɔwɔŋ.

⁸Jehovan onyuŋ ɔdɔhɔ, ete, Ndien ama ekem, eyesibe mbak iba ke ofuri isɔŋ ewot; edi ɔyɔhɔ ubak ita eyesuhɔ ke esit.

⁹Ndien nyeda ɔyɔhɔ ubak ita nsin ke ikaŋ, nnyuŋ nduk mmɔ nte edukde silver, nnyuŋ ndomo mmɔ nte edomode gold: mmɔ eyekot mi enyiŋ, ndien ami nyeyere mmɔ: nyenyuŋ ndɔhɔ mmɔ nte, Mmɔ edi ikɔt mi: ndien mmɔ eyedɔhɔ, ete, Jehovah edi Abasi mi.