Read efik ZECHARIAH 6 Bible Online

ZECHARIAH 6 - efik bible

ZECHARIAH 6

¹NDIEN ntɔŋɔ ntak mmenere enyin mi ŋkut, ndien, sese, chariot inaŋ eto ke ufɔt ikpɔ obot iba; ndien ikpɔ obot iba oro edi obot okpoho.

²Ididuot horse edu ke akpa chariot; ndien mbubit horse edu ke udiana-akpa chariot;

³ndien mfia horse edu ke ɔyɔhɔ chariot ita; ndien aran-aran ntɔi-ntɔi horse edu ke ɔyɔhɔ chariot inaŋ.

⁴Ndien mbɔrɔ nnyuŋ ndɔhɔ angel oro ekenemede ye ami, nte, Ɔbɔŋ mi, mme mmɔ emi edi nso?

⁵Ndien angel oro ɔbɔrɔ onyuŋ ɔdɔhɔ mi, ete, Mme mmɔ emi edi spirit heaven mbinaŋ emi etode ndida ke iso Ɔbɔŋ ofuri ererimbot.

⁶Eke mbubit horse edude ke esit eto eka idut edem edere; mfia enyuŋ etiene mmɔ eka; ndien mme ntɔi-ntɔi enyuŋ ewɔŋɔ eka edem usuk.

⁷Ndien aran-aran ewɔŋɔ enyuŋ eyom ndisaŋa nyɔrɔ ke isɔŋ: ndien enye ɔdɔhɔ ete, Mbufo eka ekeyɔrɔ ke isɔŋ. Ndien mmɔ eka ekeyɔrɔ ke isɔŋ.

⁸Ndien enye ofiori okot mi, onyuŋ ɔdɔhɔ mi, ete, Sese, mme mmɔ emi etode eka ke idut edem edere, ema esuk mi esit ke idut edem edere.

⁹Ekem uyo Jehovah osim mi, ete,

¹⁰Bɔ ndusuk mbon ntaŋ-mfep, bɔ Heldai, nyuŋ bɔ Tobijah, nyuŋ bɔ Jedaiah, ndien ka ke kpasuk usen oto koduk ke ufɔk Josiah eyen Zephaniah, emi mmɔ etode ke Babylon edi fo:

¹¹ndien da silver ye gold nam anyanya; ndien yara ke ibuot Joshua eyen Jehozadak, akwa oku;

¹²nyuŋ dɔhɔ enye, ete, Ntem ke Jehovah mme udim ɔdɔhɔ, ete, Sese, owo emi Nsekhe edide enyiŋ esie; ndien enye eyesehe ke ɔtɔ esie, onyuŋ ɔbɔp temple Jehovah;

¹³kpa enye edibɔp temple Jehovah; enye eyenyuŋ ada ubɔŋ, ndien enye eyetie ke ebekpo esie, onyuŋ akara; onyuŋ edi oku etie ke ebekpo esie: uduak emem eyenyuŋ odu ke ufɔt mmɔ mbiba.

¹⁴Ndien Helem ye Tobijah ye Jedaiah ye Hen, eyen Zephaniah, eyeda mme anyanya emi ke ŋkpɔ eriti ke temple Jehovah.

¹⁵Ndien mmɔ emi edude ke anyan ebiet eyedi edibɔp temple Jehovah; ndien mbufo eyefiɔk ete ke Jehovah mme udim ɔdɔŋ mi utom ke ɔtɔ mbufo. Ndien ŋkpɔ emi eyedi, edieke mbufo editimde ekop uyo Jehovah Abasi mbufo.