Read efik MALACHI 1 Bible Online

MALACHI 1 - efik bible

MALACHI 1

¹MBIOMO UYO JEHOVAH EMI OKOTODE UBƆK MALACHI OSIM ISRAEL.

²Jehovah ɔdɔhɔ, ete, Mmama mbufo. Ndien mbufo edɔhɔ, ete, Didie ke afo ama nnyin? Jehovah ɔdɔhɔ ete, Nte Esau ikedige eyen eka Jacob?

³ndien ŋkama Jacob, nnyuŋ nsua Esau, nnyuŋ nnim ikpɔ obot esie ke ikpikpu ebiet, nnyuŋ nnim udeme esie ke iduŋ wilderness.

⁴Koro Edom ɔdɔhɔde ete, “Nnyin imesuana, edi iyetɔŋɔ ntak ibɔp ŋwure”; ntem ke Jehovah mme udim ɔdɔhɔ ete, Mmɔ eyebɔp, edi ami nyewuri: ndien eyesio mmɔ enyiŋ “Adaŋa idiɔk,” ye “Mbio emi Jehovah ofutde esit ye mmɔ ke nsinsi.”

⁵Ndien enyin mbufo eyekut, ndien mbufo eyedɔhɔ ete, Yak Jehovah okpon akan adaŋa Israel.

⁶Eyen okpono ete, ofin onyuŋ okpono andinyene enye: edi edieke ami ndide ete, ukpono mi odu mmɔŋ? Edieke ami nnyuŋ ndide andinyene, uteŋe mi odu mmɔŋ? Ntem ke Jehovah mme udim ɔdɔhɔ mbufo mme oku emi esede enyiŋ mi ke ndek. Ndien mbufo ebup ete, Ke didie ke nnyin ise enyiŋ fo ke ndek?

⁷Mbufo ke ediɔk edidehe uyo ke itie-uwa mi; ndien mbufo edɔhɔ ete, Nnyin ida nso isabare fi? Koro mbufo edɔhɔde, ete, Okpokoro Jehovah edi obukpo.

⁸Ndien ke ini mbufo edade nnan edi ediwa, nte idiɔkke? Ndien ke ini mbufo edade mbuŋɔ ye eke ɔdɔŋɔde udɔŋɔ edi, nte idiɔkke? Da enye naŋa sɔk ɔbɔŋ fo; nte enye edinem esit ye afo? Nte enye edinyuŋ okpono iso fo? Jehovah mme udim ɔdɔhɔ.

⁹Ke emi, mbɔk, mbufo ekpe Abasi ubɔk, ete, enye atua nnyin mbɔm: ŋkpɔ emi oto mbufo ke ubɔk: nte enye edikpono mbufo iso? Jehovah mme udim ɔdɔhɔ.

¹⁰Anie ke idem otu mbufo edisin itim? Mbufo inyuŋ ibarake ikaŋ ke itie-uwa mi ke ikpikpu. Jehovah mme udim ɔdɔhɔ ete, Mbufo inemke mi esit baba; inuak-udia emi orode mbufo ke ubɔk inyuŋ inemke mi esit.

¹¹Koro enyiŋ mi eyekpon ke otu mme idut ɔtɔŋɔde ke edem usiaha-utin tutu osim ke edem usop; ndien mmɔ eyefɔp incense ye edisana uwa enɔ enyiŋ mi ke kpukpru ebiet: koro enyiŋ mi eyekpon ke otu mme idut, Jehovah mme udim ɔdɔhɔ.

¹²Edi mbufo ke ebiat enye: koro edɔhɔde ete, Okpokoro Jehovah emedehe, ndien mfri esie, kpa udia esie, edi obukpo.

¹³Mbufo enyuŋ edɔhɔ, ete, Sese, ke efek owo didie! Mbufo enyuŋ ebat enye ke mbio, Jehovah mme udim ɔdɔhɔ; mbufo enyuŋ eda ŋkpɔ ŋkanubɔk, ye mbuŋɔ, ye se idɔŋɔde, edi, enyuŋ eda inuak-udia edi: nte nyenyime ndibɔ enye ke ubɔk mbufo? Jehovah ɔdɔhɔ.

¹⁴Edi osuk ɔdɔdiɔk ɔnɔ owo abiaŋa, eke ayara odude ke otu ufene esie, ndien enye akaŋa, onyuŋ awa obukpo ŋkpɔ ɔnɔ Ɔbɔŋ: koro ami ndide akwa edidem, enyiŋ mi onyuŋ enyene ndik ke otu mme idut. Jehovah mme udim ɔdɔhɔ.