Read efik MALACHI 2 Bible Online

MALACHI 2 - efik bible

MALACHI 2

¹NDIEN ke emi ewuhɔ emi enyene mbufo mme oku. Edieke mbufo mikopke,

²minyuŋ inimke ke esit, minyuŋ inɔŋɔ enyiŋ mi ukpono, Jehovah mme udim ɔdɔhɔ, nyedɔŋ isuŋi oro utom ke ɔtɔ mbufo, nnyuŋ nnam nti ŋkpɔ mbufo ekabare edi isuŋi: mma nnyuŋ nsuŋi mmɔ mma, koro mbufo mikereke ke esit.

³Sese, nyeduari mkpasip mbaŋa mbufo; nnyuŋ ntiam ifuɔ nduɔk mbufo ke iso, kpa ifuɔ usɔrɔ mbufo; ndien owo eyemen mbufo efep ɔkɔrɔ ke esit.

⁴Ndien mbufo eyefiɔk ete ke ami nnɔ ewuhɔ emi esɔk mbufo, man ediomi mi okpodu ye Levi, Jehovah mme udim ɔdɔhɔ.

⁵Ediomi mi okudu ye enye eke uwem ye emem: ndien nda mmɔ nnɔ enye, mbaŋa uteŋe oro enye eketeŋede mi, enye okonyuŋ eteŋe mi enyiŋ eti-eti.

⁶Ewuhɔ akpanikɔ okodu enye ke inua, ndien ikwe ukwaŋ-ŋkpɔ ke mkpɔk-inua esie enye asaŋa ye ami ke emem ye ke edinen ido, onyuŋ akabare ediwak owo ke idiɔk ido efep.

⁷Koro mkpɔk-inua oku ekpekpeme ifiɔk, owo ekpenyuŋ ebup mkpɔk-inua esie ewuhɔ: koro enye edide isuŋ-utom Jehovah mme udim.

⁸Edi mbufo emekpɔŋ usuŋ; emenam ediwak owo eduɔŋɔ ke mbet; emebiat ediomi Levi, Jehovah mme udim ɔdɔhɔ.

⁹Ndien ami ŋko mmonyuŋ nnim mbufo ke se kpukpru owo esede ke ndek ye ke mbukpo, kpa nte mbufo minimke ido mi, edi eteŋe owo enyin ke ewuhɔ.

¹⁰Nte nnyin kpukpru inyeneke ete kiet? nte idige Abasi kiet okobot nnyin? Nsinam nnyin ibiaŋade kiet eken, ke ibiat ediomi mme ete nnyin?

¹¹Judah anam abiaŋa, owo enyuŋ enam mbubiam ke Israel ye ke Jerusalem; koro Judah amabiat edisana ŋkpɔ Jehovah emi enye amade, onyuŋ ɔdɔ eyen esen abasi kiet.

¹²Jehovah eyesibe owo eke anamde ntem, owo eke ekpemede ye owo eke eyerede, efep ke mme tent Jacob, ye owo eke adade inuak-udia edisɔk Jehovah mme udim.

¹³Ndien mbufo ke enam ŋkpɔ emi ŋko, ke eda mmɔŋeyet, ye mmum, ye eseme efuk itie-uwa Jehovah, ndien enye isehe aba inuak-udia, inyuŋ imaŋa aba ndibɔ mbufo ke ubɔk. Ndien mbufo edɔhɔ ete, Nsinam?

¹⁴Koro Jehovah edide ntiense ke ufɔt fo ye ŋwan uyen fo, emi afo abiaŋade enye, okposuk edi nte enye edi nsaŋa fo ye ŋwan ediomi fo.

¹⁵Ndien nte Enye ikanamke kierakiet? Ndien spirit ɔsuhɔ ɔnɔ Enye. Ndien anam didie edi kiet oro? Enye okoyom ubon Abasi. Mbufo ekpeme ndien spirit mbufo, owo baba kiet okunyuŋ abiaŋa ŋwan uyen esiemɔ.

¹⁶Koro Jehovah Abasi Israel ɔdɔhɔ, ete ke imɔ isasua usio-ndɔ, ye emi owo ofukde afai ke ɔfɔŋ-idem esie, Jehovah mme udim ɔdɔhɔ: mbufo ekpeme ndien spirit mbufo, ekunyuŋ ebiaŋa.

¹⁷Mbufo emefek Jehovah ke ikɔ mbufo: ndien mbufo edɔhɔ ete, Nnyin ifek enye ke nso? Koro mbufo edɔhɔde ete, Kpukpru mmɔ eke enamde idiɔk efɔn ke iso Jehovah, mmɔ enyuŋ enem enye esit: edɔhɔ ete, Abasi ikpe odu mmɔŋ?