Read efik MATTHEW 11 Bible Online

MATTHEW 11 - efik bible

MATTHEW 11

¹EDIKEM, ke ini Jesus ama ɔkɔnɔ mbet esie duopeba item ama, Enye adaha ɔkpɔŋ edem oro, aka ndikpep ndiyuŋ ŋkwɔrɔ ikɔ Abasi ke mme obio mmɔ.

²Edi John etie ke ufɔk-ŋkpɔkɔbi okop abaŋa mme utom Christ, enye onyuŋ ɔdɔŋ mbet esie eka ekedɔhɔ Jesus ete,

³Nte Afo edi Enye emi enyenede ndidi, mme nnyin ikpodori enyin ke owo eŋwen?

⁴Ndien Jesus ɔbɔrɔ mmɔ ete, Eka ekebuk enɔ John ŋkpɔ oro mbufo ekopde enyuŋ ekutde:

⁵mme nnan ekut usuŋ, mbon mbuŋɔ esana, enam mbon akpa-mfia esana, mme inan ekop ikɔ, enam mme akpa-mkpa eset, enyuŋ ekwɔrɔ eti mbuk enɔ mme ubuene.

⁶Ndien ɔfɔfɔn ye owo ekededi eke midikwe ntak iduɔ ye Ami.

⁷Edi nte mmɔ enyɔŋɔde, Jesus ɔtɔŋɔ ndidɔhɔ ye mme otu owo mbaŋa John, ete, Mbufo ekewɔŋɔ eka ke desert ndise nso? ndi nyanyaŋa eke ofim enyeŋede?

⁸Edi ekɔwɔŋɔ eka ndise nso? ndi owo eke esinede eti ɔfɔŋidem? Sese, mme esine eti ɔfɔŋidem edu ke ufɔk mbɔŋ.

⁹Edi ekewɔŋɔ eka ke ntak ewe? eka ekese prophet? Ke akpanikɔ ke ndɔhɔ mbufo nte, enye onyuŋ ɔsɔŋɔ okpon akan prophet.

¹⁰Emi edi enye emi ewetde ebaŋa enye ete, Sese, mmɔdɔŋ isuŋ Mi ebem fi iso, Emi edidiɔŋde usuŋ inim inɔ Fi.

¹¹Ke akpanikɔ ke ndɔhɔ mbufo, Ke otu mmɔ eke iban emande, akananam owo idahake ida emi okponde akan John baptist: edi owo emi ekpride akan ke Obio Ubɔŋ Heaven okpon akan enye.

¹²Edi ɔtɔŋɔde ke mme usen John Baptist tutu osim emi, Obio Ubɔŋ Heaven akpa unyaŋa, mbom unyaŋa enyuŋ eda enye ke nsɔŋubɔk enyene.

¹³Koro kpukpru mme prophet ye ibet eketiŋ prophecy tutu osim John.

¹⁴Ndien edieke mbufo enyimede ndikop, emi edi Elijah emi enyenede ndidi.

¹⁵Owo eke enyenede utɔŋ ndikop, yak okop.

¹⁶Edi ndida emana emi ndomo ye nso? ebiet nditɔwɔŋ emi etiede ke aŋwa-urua ekot

¹⁷ŋka mmɔ, ete, Imefri ifiom inɔ mbufo, edi mbufo inekkeunek: Imoyorore eyet, edi mbufo ifuhɔke.

¹⁸Koro John ekedi, idiaha ŋkpɔ inyuŋ iŋwɔŋke; ndien mmɔ ete, Enye enyene demon.

¹⁹Eyen Owo emedi, adia ŋkpɔ onyuŋ ɔŋwɔŋ; ndien mmɔ ete, Sese, owo udia ye amammin, ufan mme publican ye mme idiɔk owo. Edi ubɔkutom Eti ibuot ewut ete Eti ibuot enen.

²⁰Ekem Jesus ɔtɔŋɔ ndisɔŋɔ nsua nnɔ mme obio eke Enye akanamde ediwak utom odudu Esie ke esit, koro mmɔ mikabakere esit.

²¹Eyedɔdiɔk ɔnɔ fi Chorazin! Eyedɔdiɔk ɔnɔ fi Bethsaida! Koro edieke ekpekenamde ke Tyre ye Sidon mme utom odudu eke ekanamde ke esit mbufo, mmɔ ekpakabare esit anyan ini ke ɔfɔŋ-ikpo ye ntɔŋ-ukut.

²²Edi ndɔhɔ mbufo nte, Ŋkpɔ eyefɔn ye Tyre ye sidon ke usen ikpe akan ye mbufo.

²³Ndien afo Capernaum, nte eyemenere okoŋ osim ikpa-enyɔŋ? Eyesuhɔre fi osim obio ekpo: koro edieke ekpekenamde ke Sodom mme utom odudu eke ekanamde ke esit fo, enye okposuk odu osim mfin emi.

²⁴Edi ndɔhɔ mbufo nte, Nkpɔ eyefɔn ye isɔŋ Sodom ke usen ikpe akan ye afo.

²⁵Ke ini oro Jesus ɔbɔrɔ ete, Mmɔkɔm Fi, O Ete, Ɔbɔn enyɔŋ ye isɔŋ, koro Afo okodipde mbon eti ibuot ye mme asian mme ŋkpɔ emi, onyuŋ ayararede mmɔ ɔnɔ nsek nditɔ.

²⁶Edi ntre, Ete, koro enemde Fi ntem ke enyin.

²⁷Ete Mi amayak kpukpru ŋkpɔ ɔnɔ Mi: ndien baba owo kiet ifiɔkke Eyen ke mibɔhɔke Ete; baba owo kiet inyuŋ ifiɔkke Ete ke mibɔhɔke Eyen, ye owo ekededi eke Eyen amade ndiyarare Enye nnɔ.

²⁸Etiene Mi, kpukpru mbufo emi ekpade mba enyuŋ ebiomde edidobi mbiomo, ndien Ami nyenɔ mbufo nduɔk-odudu.

²⁹Emen ɔkpɔnɔ Mi ekɔŋɔ ke itɔŋ mbufo, enyuŋ ekpebe Mi; koro mme-nyene ifure-ifure ido nnyuŋ nsuhɔre idem ke esit; ndien mbufo eyekut nduɔk-odudu enɔ ukpɔŋ mbufo.

³⁰Koro ɔkpɔnɔ Mi ememem, mbiomo Mi onyuŋ efefere.