Read efik MATTHEW 15 Bible Online

MATTHEW 15 - efik bible

MATTHEW 15

¹EKEM mme Pharisee ye mme scribe eto ke Jerusalem etiene Jesus, ete,

²Nsinam mbet Fo ebiatde item mbiowo? koro mmɔ miyetke ubɔk, ndien edidia uyo.

³Edi Jesus ɔbɔrɔ mmɔ ete, Nsinam mbufo nde edade item mbufo ebiat ibet Abasi?

⁴Koro Abasi ɔkɔdɔhɔ ete, Kpono usɔ ye uka; ŋko, Owo eke etiŋde idiɔk adian ete me eka okutre ndikpa.

⁵Edi mbufo ete, Owo ama ɔdɔhɔ ete esie mme eka esie ete, Mmayak se ŋkpadade mfɔn fi mfɔn nnɔ Abasi; enye idikponoke ete esie.

⁶Ntre ke mbufo ema enam ikɔ Abasi akabare edi ikpikpu kabaŋa item mbufo.

⁷Mbufo mbon mbubik, Isaiah ototim etiŋ nte prophet abaŋa mbufo, ete,

⁸Mbio emi ekpono Mi ke mkpɔk-inua mmɔ; Edi esit mmɔ ada nsan-nsan ye Ami.

⁹Edi mmɔ ekpono Mi ikpikpu, Sia ekpepde item owo ke ukpep-ŋkpɔ mmɔ.

¹⁰Ndien Enye okot otu owo, onyuŋ ɔdɔhɔ mmɔ ete, Ekop, enyuŋ etim efiɔk ŋkpɔ.

¹¹Idige se idukde owo ke inua asabare owo, edi se iwɔrɔde owo ke inua, ke edi oro asabare owo.

¹²Ekem mbet Esie edi edidɔhɔ Enye ete, Nte ɔmɔfiɔk ete mme Pharisee eyat esit, ke ini mmɔ ekopde ikɔ emi?

¹³Edi Enye ɔbɔrɔ ete, Kpukpru se etɔde, eke midige Ete Mi ke heaven ɔkɔtɔ, eyedibere. Esana mmɔ eyak: mmɔ edi nnan mme ada-usuŋ.

¹⁴Ndien nnan ama ada nnan usuŋ, mmɔ mbiba eyeduɔŋɔ ke ukpe.

¹⁵Edi Peter ɔbɔrɔ Enye ete, Siak ŋke emi nɔ nnyin.

¹⁶Enye ete, Nte mbufo ŋko emanana ifiɔk ntem?

¹⁷Nte mbufo ikwe ite, se ededi eke odukde ke inua ebe oduk ke idibi, ndien esio eduɔk ke ufɔk ekwe?

¹⁸Edi ŋkpɔ eke ewɔŋɔde owo ke inua eto ke esit; edi mmɔ esabare owo.

¹⁹Koro mme idiɔk ekikere eto ke esit ewɔŋɔ, ye obom, ye efibe, ye use, ye inɔ, ye ikɔntiense nsu, ye isuŋi.

²⁰Mmɔ emi edi se isabarede owo; edi ndidia ŋkpɔ ye ubɔk eke miyetke isabakere owo.

²¹Ekem Jesus adaha do aka ke ŋkaŋ Tyre ye Sidon.

²²Ndien sese, ŋwan Canaan kiet oto ke adaŋa edem oro edi, onyuŋ ofiori ete, Tua mi mbɔm, O Ɔbɔŋ, Afo Eyen David; demon ke ɔtuhɔre eyen mi aŋwan eti-eti.

²³Edi Jesus ibɔrɔke ndomo ikɔ kiet inɔ enye. Mbet Esie enyuŋ edi edikpe ye Enye ete, Sio ŋwan emi unyɔŋ; koro enye ke ofiori etiene nnyin ke edem.

²⁴Edi Enye ɔbɔrɔ ete, Ikɔdɔŋke Mi ntiene mmɔ efen, ke mibɔhɔke nsomo erɔŋ ufɔk Israel.

²⁵Edi ŋwan oro edi edituak ibuot ɔnɔ Enye ete, Ɔbɔŋ, ŋwam mi.

²⁶Edi Jesus ɔbɔrɔ ete, Idige se ikemde, ndimen uyo nditɔ nduɔk nnɔ mme ebua.

²⁷Edi ŋwan ete, Emekem, Ɔbɔŋ; koro mme ebua enyuŋ ediade ŋkeŋe udia eke etode ke okpokoro mme andiyene mmɔ eduɔŋɔ.

²⁸Ekem Jesus ɔbɔrɔ enye ete, O ŋwan, mbuɔtidem fo omokpon; yak ɔwɔrɔ ɔnɔ fi nte oyomde. Ndien eyen esie okop nsɔŋidem ɔtɔŋɔde ke ini oro.

²⁹Ekem Jesus adaha ɔkpɔŋ edem oro, asaŋa ekpere Inyaŋ Galilee, onyuŋ ɔdɔk ke akamba obot etetie do.

³⁰Ndien ata ediwak otu owo etiene Enye, eke edade mbuŋɔ, ye nnan, ye imum, ye mmɔ emi edade unan, ye ediwak owo efen, edinim Enye ke ukot; ndien Enye anam udɔŋɔ okure mmɔ;

³¹esin idem akpa otu owo, ke adaŋemi mmɔ ekutde nte imum etiŋde ikɔ, nte mmɔ emi edade unan enyuŋ ekabarede edi ofuri, mbuŋɔ enyuŋ esaŋade, nnan enyuŋ ekutde usuŋ: ndien mmɔ etoro Abasi Israel.

³²Edi Jesus okot mbet Esie edi, ete, Mmatua otu owo mbɔm, koro ke emi mmɔ ema etie ye Ami usen ita, minyuŋ inyeneke se ediade; nnyuŋ mmaŋa ndidɔŋ mmɔ esaŋa ye biɔŋ enyɔŋɔ, mbak mmɔ edikpa mba ke usuŋ.

³³Ndien mbet edɔhɔ Enye ete, Ke mmɔŋ ke nnyin idinyene uyo eke awakde ke desert emi ekem ndiyuhɔ adaŋa akwa otu owo emi?

³⁴Edi Jesus ete mmɔ, Enyene uyo ifaŋ?

³⁵Mmɔ ete, Uyo itiaba ye ŋkpri iyak ifaŋ. Ekem Enye ɔnɔ otu owo uyo, ete, Esuhɔre etetie ke isɔŋ;

³⁶onyuŋ emen uyo itiaba ye iyak oro; ndien ke ama ɔkɔnɔ ekɔm, obuŋ, ayak ɔnɔ mbet; mbet enyuŋ enɔ otu owo.

³⁷Mmɔ oro kpukpru edia eyuhɔ; mbet enyuŋ etaŋ mbubek uyo eke ɔsuhɔde, eyɔhɔ akpasa itiaba.

³⁸Mmɔ emi ediade edi thousand owo inaŋ, ekɔrɔ ye iban ye nditɔwɔŋ.

³⁹Enye onyuŋ osio mme otu owo unyɔŋ, onyuŋ ediere ke ubom, ebe edi ke adaŋa Magadan.