Read efik MATTHEW 16 Bible Online

MATTHEW 16 - efik bible

MATTHEW 16

¹EKEM mme Pharisee ye mme Sadducee edi edidomo Enye, ebup Enye ete, owut mme imɔ idiɔŋɔ emi otode ke heaven.

²Edi Enye ɔbɔrɔ mmɔ ete, Ke ini mbureyo mbufo ete, Usen eyefɔn, koro enyɔŋ oyibe; ke ini usenubɔk ŋko, mbufo ete,

³Usen eyediɔk, koro enyɔŋ oyibe onyuŋ okpuk. Mbufo emɔfiɔk ndidiɔŋɔ iso ikpa-enyɔŋ, edi mbufo ikemeke ndifiɔk idiɔŋɔ ini.

⁴Emana eke ediɔkde enyuŋ esaŋade esin efibe eyom idiɔŋɔ; ndien idinɔŋɔ mmɔ baba idiɔŋɔ kiet, ibɔhɔke idiɔŋɔ Jonah. Ekem Enye ɔkpɔŋ mmɔ adaha.

⁵Ndien mbet Esie edi ke edem inyaŋ oko, ema enyuŋ efre ndida uyo.

⁶Edi Jesus ɔdɔhɔ mmɔ ete, Etiŋ enyin ekpeme idem mbak leaven mme Pharisee ye mme Sadducee.

⁷Edi mmɔ eneni ke otu idem mmɔ ete, Nnyin idaha uyo idi.

⁸Edi ke ini Jesus ɔfiɔkde emi, Enye ɔdɔhɔ mmɔ ete, O mbufo nditɔ ekpri mbuɔtidem, nsinam mbufo enenide ke otu idem mbufo koro mbufo minyeneke uyo?

⁹Nte mbufo itimke ifiɔk ŋkpɔ kaŋa, inyuŋ itihi uyo ition emi thousand owo ition ekadiade, ye ibat akpan eke mbufo ekataŋde?

¹⁰Inyuŋ itihi uyo itiaba emi thousaŋd owo inaŋ ekadiade ye ibat akpasa eke mbufo ekataŋde?

¹¹Nsidi ntak eke mbufo mitimke ifiɔk ite, idige uyo ke ntiŋ ye mbufo mbaŋa? Edi ndɔhɔ mbufo nte, ekpeme idem mbufo mbak leaven mme Pharisee ye mme Sadducee.

¹²Ntre ke mmɔ efiɔk ete, Enye idɔhɔke mme imɔ ikpeme idem mme imɔ ke leaven uyo, edi ɔdɔhɔ ikpeme idem mme imɔ ke se mme Pharisee ye mme Sadducee ekpepde.

¹³Edi ke ini Jesus edide ke ŋkaŋ Caesarea Philippi, Enye obup mbet Esie ete, Mme owo edɔhɔ ete Eyen Owo edi anie?

¹⁴Mmɔ ete, Ndusuk owo ete, John Baptist; ndusuk ete, Elijah; mmɔ efen ete, Jeremiah; midige, owo kiet ke otu mme prophet.

¹⁵Enye ɔdɔhɔ mmɔ ete, Edi mbufo edɔhɔ ete Ami ndi anie?

¹⁶Simon Peter ɔbɔrɔ Enye ete, Afo edi Christ, Eyen Abasi uwem.

¹⁷Jesus ɔbɔrɔ enye ete, Ɔfɔfɔn ɔnɔ fi Simon eyen Jonah, koro midige obuk ye iyip akayarare ŋkpɔ emi ɔnɔ fi, edi edi Ete Mi emi odude ke Heaven.

¹⁸Ami mmonyuŋ ndɔhɔ fi nte, Afo edi Peter, ndien nyebɔp ufɔk Mi ke enyɔŋ itiat emi, mme inua-etop Hades idinyuŋ ikanke enye.

¹⁹Nyeda mme ukpɔhɔre Obio Ubɔŋ Heaven nsin fi ke ubɔk; ndien se ededi eke afo edibɔpde ke isɔŋ, ke eyebɔp ke heaven, se ededi afo editatde ke isɔŋ ke eyenyuŋ etat ke heaven.

²⁰Ekem Enye owuk mbet Esie ete mmɔ ekutiŋ enɔ ndomo owo kiet ete Imɔ idi Christ.

²¹Toto ke ini oro Jesus ɔtɔŋɔ ndiwut mbet Esie ete, Imɔ inyene ndika ke Jerusalem ŋkokut ediwak ukut ke ubɔk mbiowo ye ikpɔ oku ye mme scribe; mmɔ eyenyuŋ ewot Imɔ, ndien ke ɔyɔhɔ usen ita Abasi eyenam Imɔ iset.

²²Edi Peter ada Enye ɔtɔŋɔ ndisua nnɔ Enye, ete, Idiɔk ŋkpɔ aka nsan-nsan ye Afo, Ɔbɔŋ; utɔ ŋkpɔ emi idiwɔrɔke Fi.

²³Edi Jesus ɔwɔŋɔre ada ɔdɔhɔ Peter ete, Da ke edem Mi, Satan. Afo edi ŋkpɔ iduɔ ɔnɔ Mi; koro afo ukereke ŋkpɔ Abasi, edi ekere ŋkpɔ owo.

²⁴Ekem Jesus ɔdɔhɔ mbet Esie ete, Edieke owo ekededi oyomde nditiene Mi, yak enye otuk idem esie, onyuŋ emen cross esie, etiene Mi.

²⁵Koro owo ekededi eke ediyomde ndinyaŋa uwem esie eyeduɔk enye, edi owo ekededi eke ediduɔkde uwem esie kabaŋa mi eyeda uwem esie enyene.

²⁶Koro nso udori ke owo edikut, edieke enye adiade ofuri ererimbot, ndien ada uwen esie osio isop? mme nso ke owo edinɔ ke ibuot uwem esie?

²⁷Koro Eyen Owo ɔmɔŋ edidi ke ubɔŋ Ete Esie ye mme angel Esie, ndien ke ini oro Enye eyenɔ owo kiet kiet nte utom esie edide.

²⁸Ke akpanikɔ ke ndɔhɔ mbufo nte, ndusuk owo edu ke otu mmɔ emi edade mi, emi miditabike mkpa, tutu mmɔ ekut Eyen Owo edide ndida ubɔŋ.