Read efik MATTHEW 19 Bible Online

MATTHEW 19 - efik bible

MATTHEW 19

¹EDIKEM, ke ini Jesus ama ɔkɔdɔhɔ ikɔ emi ama, Enye adaha ke Galilee, edi ke mme adaŋa Judaea emi odude ke edem Jordan oko.

²Ndien ediwak otu owo etiene Enye; Enye onyuŋ anam udɔŋɔ okure mmɔ do.

³Ekem mme Pharisee edi edidomo Enye ete, Mme enen owo ndisio ŋwan esie ndɔ ke ntak ekededi?

⁴Edi Enye ɔbɔrɔ ete, Nte mbufo ikokotke ite, Enye emi okobotde mmɔ obot mmɔ eren ye ŋwan toto ke eritɔŋɔ?

⁵ŋko, Ke ntak emi owo eyekpɔŋ ete ye eka sie akadiana ye ŋwan esie, ndien mmɔ mbiba eyekabare edi obuk kiet.

⁶Ntre ke mmɔ idige aba owo iba, edi edi obuk kiet. Mmɔdo se Abasi ama akadian, yak owo okudianare.

⁷Mmɔ edɔhɔ Enye ete, Nsinam Moses etemede ndien ete ewet ŋwed usio-ndɔ enɔ ŋwan, enyuŋ esio enye?

⁸Jesus ɔdɔhɔ mmɔ ete, Oto nsɔŋesit mbufo ke Moses onyime mbufo esio iban mbufo.

⁹Edi toto ke eritɔŋɔ ikedige ntre. Edi ndɔhɔ mbufo nte, Owo ekededi eke edisiode ŋwan esie ndɔ, ke mitoho ke eridue ye erenowo, onyuŋ ɔdɔde efen, esin efibe: ndien owo emi ɔdɔde enye, ke ini ema esio enye, esin efibe.

¹⁰Mbet Esie edɔhɔ Enye ete, Edieke ŋkpɔ etiede ntem ye owo ye ŋwan esie, ifɔnke owo ndidɔ ndɔ.

¹¹Edi Jesus ɔdɔhɔ mmɔ ete, Idige kpukpru owo ekeme ndibɔ ikɔ emi, ibɔhɔke mmɔ emi enɔde mmɔ ukeme ndibɔ.

¹²Koro mme eunuch edu emi emanade ntem ke idibi eka mmɔ; mme eunuch enyuŋ edu emi edide owo enam mmɔ edi eunuch; mme eunuch enyuŋ edu ŋko emi enamde idem mmɔ eunuch kabaŋa Obio Ubɔŋ Heaven. Owo eke ekemede ndibɔ, yak ɔbɔ.

¹³Ekem eda ŋkpri nditɔ esɔk Enye, ete Enye odori mmɔ ubɔk ɔbɔŋ akam: edi mbet Esie esua enɔ mmɔ emi edade mmɔ edi.

¹⁴Edi Jesus ɔdɔhɔ mmɔ ete, Eyak ŋkpri nditɔ, ekukpan mmɔ nditiene Mi; koro Obio Ubɔŋ Heaven edide eke oruk emi.

¹⁵Ndien Enye odori mmɔ ubɔk, onyuŋ adaha.

¹⁶Ndien sese, owo kiet etiene Enye, ete, Andikpep, ndinam nso eti ŋkpɔ man nnyene nsinsi uwem?

¹⁷Edi Jesus ete enye, Nsinam obupde Mi abaŋa se idide eti: Kiet odu emi edide eti: edi edieke oyomde ndiduk uwem, nim mbet.

¹⁸Owo oro obup Enye ete, ibet ewe? Edi Jesus ete, Kuwot owo, Kusin efibe, Kuyip inɔ,

¹⁹Kudi ntiense nsu, Kpono usɔ ye uka, Nyuŋ ma mbɔhiduŋ fo nte idem fo.

²⁰Akparawa oro ɔdɔhɔ enye ete, Mma nnonim kpukpru ŋkpɔ emi: nso isuhɔ mi ndinam?

²¹Jesus ɔdɔhɔ enye ete, Edieke oyomde ndifɔn mma, ka kanyam se enyenede, da nɔ mme ubuene, ndien eyenyene inyene ke heaven: nyuŋ di disaŋa ye Ami.

²²Edi ke adaŋemi akparawa okopde ikɔ oro, enye ɔnyɔŋ ye mfuhɔ, koro enye edide owo eke enyenede ediwak inyene.

²³Edi Jesus ɔdɔhɔ mbet Esie ete, Ke akpanikɔ ke ndɔhɔ mbufo, ɔsɔŋ owo inyene ndiduk ke Obio Ubɔŋ Heaven.

²⁴Mmonyuŋ ntɔŋɔ ntak ndɔhɔ mbufo nte, edi mmemmem ŋkpɔ ye camel ndibe ke odudu abiabon, akan owo inyene ndiduk ke Obio Ubɔŋ Abasi.

²⁵Edi ke ini mbet ekopde, mmɔ eyik eti-eti, enyuŋ edɔhɔ ete, Anie ndien ekeme ndibɔhɔ?

²⁶Edi Jesus owuk enyin ese mmɔ, onyuŋ ɔdɔhɔ mmɔ ete, Emi edi se owo mikemeke ndinam edi Abasi emekeme ndinam kpukpru ŋkpɔ.

²⁷Ekem Peter ɔbɔrɔ Enye ete, Sese, nnyin ikɔkpɔŋ kpukpru ŋkpɔ itiene Fi; nso ndien ke nnyin idinyene?

²⁸Edi Jesus ɔdɔhɔ mmɔ ete, Ke akpanikɔ ke ndɔhɔ mbufo nte, ke ini edinamde ŋkpɔ ekabare edi mbufa, ke adaŋemi Eyen Owo editiede ke ebekpo ubɔŋ Esie, mbufo, emi eketienede Mi, eyenyuŋ etie ke ebekpo duopeba, ekpe ikpe enɔ esien Israel duopeba.

²⁹Ndien kpukpru owo emi ekɔkpɔŋde ufɔk, mme nditɔ-eka iren, mme nditɔ-eka iban, mme ete, mme eka, mme nditɔ, mme isɔŋ, kabaŋa enyiŋ Mi, eyebɔ utip utim ikikie, eyenyuŋ enyene nsinsi uwem.

³⁰Edi ediwak mmɔ eke ebemde iso eyekpere edem, mme ekperedem eyenyuŋ ebe iso.