Read efik MATTHEW 23 Bible Online

MATTHEW 23 - efik bible

MATTHEW 23

¹EKEM Jesus etiŋ ɔnɔ mme otu owo ye mbet Esie, ete,

²mme scribe ye mme Pharisee etie ke itie Moses:

³mmɔdo mbufo enam enyuŋ enim kpukpru ŋkpɔ eke mmɔ etemede mbufo: edi ekunam nte mmɔ enamde; koro mmɔ edɔhɔ, edi inamke nam.

⁴Mmɔ ebɔp ndidobi mbiomo eke esɔŋde ndibiom, edori owo ke afara: edi mmɔ ke idemmɔ inyimeke ndida nnuenubɔk ntuk mmɔ.

⁵Edi mmɔ enam kpukpru mme utom mmɔ man owo ekut: koro mmɔ enam mme phylactery mmɔ eŋwaŋa, enyuŋ enam nyeriye ɔfɔŋ-idem mmɔ ekpon,

⁶enyuŋ ema itie-ukpono ke udia,

⁷ye ikpɔ itie ke mme synagogue, ye ekɔm ke aŋwa-urua: enyuŋ ema owo ekot mmɔ, ete,

⁸Rabbi (Andikpep mi). Edi ekuyak ekot mbufo, ete, Rabbi: koro Kiet edi Andikpep mbufo, kpukpru mbufo enyuŋ edi nditɔ-ete.

⁹Ekunyuŋ ekot ndomo owo kiet ke isɔŋ, ete, Ete; koro Kiet edi Ete mbufo, kpa Enye emi odude ke heaven.

¹⁰Ekunyuŋ eyak ekot mbufo, ete, Mbɔŋ; koro Kiet edi Ɔbɔŋ mbufo, kpa Christ.

¹¹Edi enye emi okponde akan ke otu mbufo edidi asaŋutom mbufo.

¹²Edi owo ekededi eke edimenerede idem, eyesuhɔre enye enim; edi owo ekededi eke edisuhɔrede idem, eyemenere enye.

¹³Edi eyedɔdiɔk ɔnɔ mbufo, mme scribe ye mme Pharisee, mbon mbubik! koro mbufo eberi Obio Ubɔŋ heaven ebaha owo: koro mbufo idukke ke idem mbufo, inyuŋ iyakke mmɔ emi eyomde ndiduk ebe eduk.

¹⁴Eyedɔdiɔk ɔnɔ mbufo, mme scribe ye mme Pharisee, mbon mbubik! koro mbufo ekade ufɔk mme ebekpa, enyuŋ ebɔŋde akam ke abiaŋa; mmɔdo mbufo eyebɔ ufen eke okponde akan.

¹⁵Eyedɔdiɔk ɔnɔ mbufo, mme scribe ye mme Pharisee, mbon mbubik! koro mbufo ekanarede inyaŋ ye obot, ete inam kpa owo kiet okpono Abasi ke ido mbufo; ndien ke enye ama akabare etie ntem, mbufo enam enye edi eyen hell utim ikaba akan idem mbufo.

¹⁶Eyedɔdiɔk ɔnɔ mbufo, mme eteme-usuŋ eke edide nnan, emi edɔhɔde ete, Owo ama ɔŋwɔŋɔ uŋwɔŋɔ ke enyiŋ temple, oro idige ŋkpɔ; edi owo ama ɔŋwɔŋɔ uŋwɔŋɔ ke enyiŋ gold eke temple, enye edi akama-isɔn.

¹⁷Mbufo ndisime ye nnan; koro ewe okpon akan, mme edi gold, mme edi temple emi anamde gold edi ibet?

¹⁸Ŋko-ŋko, owo ama ɔŋwɔŋɔ ke enyiŋ itie-uwa, oro idige ŋkpɔ, edi owo ama ɔŋwɔŋɔ ke enyiŋ enɔ eke odorode ke esit, enye edi akama-isɔn.

¹⁹Mbufo mme nnan: koro ewe okpon akan mme edi enɔ, mme edi itie-uwa emi anamde enɔ edi ibet?

²⁰Owo eke ɔŋwɔŋɔde ndien ke enyiŋ itie-uwa ada uŋwŋɔ ke enyiŋ itie oro ye kpukpru se idorode do.

²¹Owo eke onyuŋ ɔŋwɔŋɔde ke enyiŋ temple ada uŋwɔŋɔ ke enyiŋ ɔtɔ oro, ye Enye emi oduŋde kesit.

²²Owo eke onyuŋ ɔŋwɔŋɔde ke enyiŋ heaven ada uŋwɔŋɔ ke enyiŋ ebekpo Abasi, ye Enye emi etiede do.

²³Eyedɔdiɔk ɔnɔ mbufo, mme scribe ye mme Pharisee, mbon mbubik! koro mbufo esiode ubak ikɔŋ ye mfri ye mkpasip kiet ke itie duop enɔ Abasi, enyuŋ etrede ndinam ikpɔ ŋkpɔ ibet, ikpe, ye mbɔm, ye mbuɔtidem.

²⁴Edi mbufo ekpanam mme ŋkpɔ emi, ikponyuŋ itreke ndinam mmɔ eken. Mbufo nnan mme eteme-usuŋ, emi eduhɔrede nsuŋ esio, enyuŋ emen camel.

²⁵Eyedɔdiɔk ɔnɔ mbufo, mme scribe ye mme Pharisee, mbon mbubik! koro mbufo eyetde edem cup ye usan asana, edi esit mmɔ eyɔhɔ ye uŋwo ye unana ufat ke idem.

²⁶Afo nnan Pharisee, bem iso yet esit cup ye usan asana, man edem esie onyuŋ akabare asana ŋko.

²⁷Eyedɔdiɔk ɔnɔ mbufo, mme scribe ye mme Pharisee, mbon mbubik! koro mbufo ebietde udi eke eyetde ndom, eke eyede ndise edem-edem, edi ke esit-esit eyɔhɔde ye mme okpo mme akpa-mkpa ye kpukpru ndek.

²⁸Kpa ntre ke mbufo ewut idem edem-edem nte ndinen owo, edi ke esit-esit mbufo eyɔhɔ ye mbubik ye ukwaŋido.

²⁹Eyedɔdiɔk ɔnɔ mbufo, mme scribe ye mme Pharisee, mbon mbubik! koro mbufo ebotde udi mme prophet, enyuŋ ediɔŋde udi nti owo;

³⁰enyuŋ edɔhɔde ete, Edieke nnyin ikpodude ke mme usen mme ete nnyin, nnyin ikpetieneke mmɔ ibuana ke iyip mme prophet.

³¹Mmɔdo mbufo edi ntiense edian idem mbufo, ete mme imɔ idi nditɔ mmɔ emi ekowotde mme prophet.

³²Mbufo enyuŋ enam idomo idiɔk-ŋkpɔ mme ete mbufo ɔyɔhɔ ndien.

³³Mbufo mme urukikɔt, mbufo nditɔ ibɔm, edisaŋa didie ebɔhɔ ikpe hell?

³⁴Mmɔdo sese, Ami mmosio mme prophet ye mme ɔfiɔk-ŋkpɔ owo ye mme scribe ndɔŋ ke ɔtɔ mbufo; mbufo eyewot, enyuŋ ekɔŋ ndusuk mmɔ ke cross; mbufo eyenyuŋ emia ndusuk mmɔ ke synagogue mbufo, enyuŋ ekɔbɔ ebine mmɔ ke obio ke obio:

³⁵man ofuri edinen iyip emi eduɔkde ke isɔŋ ɔkpɔkɔbɔ mbufo, ɔtɔŋɔde ke iyip edinen Abel, tutu osim iyip Zachariah, eyen Barachiah, emi mbufo ekowotde ke ufaŋ emi odude ke ufɔt temple ye itie-uwa.

³⁶Ke akpanikɔ ke ndɔhɔ mbufo, kpukpru ŋkpɔ emi eyesim emana emi.

³⁷O Jerusalem, Jerusalem, emi owotde mme prophet, onyuŋ ɔtɔŋɔde mmɔ eke edɔŋde etiene fi ke itiat. Adaŋa ediwak ini didie ke ŋkoyom ndibon nditɔ fo ɔtɔ kiet, kpa nte unen obonde nditɔ esie ke idak mba esie, ndien mbufo ikonyimeke.

³⁸Sese, eyak ufɔk mbufo ekpɔŋ enɔ mbufo nte ndon.

³⁹Koro ndɔhɔ mbufo nte, Mbufo idikwe Mi aba, tutu mbufo edɔhɔ ete, Itoro enyene Enye emi edide ke enyiŋ Jehovah.