Read efik MATTHEW 26 Bible Online

MATTHEW 26 - efik bible

MATTHEW 26

¹EDIKEM ke ini Jesus ama eketiŋ kpukpru ikɔ emi ama,

²Enye ɔdɔhɔ mbet Esie ete, Mbufo efiɔk ete, usen iba ema ebe, passover edi, ndien ema eda Eyen Owo enɔ, ete ewot Enye ke cross.

³Ekem ikpɔ oku ye mbiowo obio ebono ɔtɔ kiet ke esit okure akwa oku mi ekerede Caiaphas;

⁴mmɔ enyuŋ esop ibuot, ete imum Jesus ke ŋkari iwot.

⁵Edi mmɔ ete, ikunam ke ini usɔrɔ, mbak ndutime editibe ke otu mbio-obio.

⁶Edi ke ini Jesus odude ke Bethany, ke ufɔk Simon ɔdɔŋɔ akpa-mfia,

⁷ŋwan kiet akama otu alabaster, emi esinde ata ɔsɔŋ-urua ufuɔŋkpɔ ke esit, etiene Enye, ɔtɔhɔ Enye ufuɔŋkpɔ ke ibuot, nte Enye etiede ke itie -udia.

⁸Edi ke ini mbet ekutde, mmɔ eyat esit, ete, Ebiat ŋkpɔ emi ebaŋa nso?

⁹Koro ekpekeme ndinyam ufuɔŋkpɔ emi mbɔ ediwak okuk, nda nnɔ mme ubuene.

¹⁰Edi Jesus ɔfiɔk, onyuŋ ɔdɔhɔ mmɔ ete, Nsinam mbufo efinade ŋwan emi? koro enye akanam eti utom ke idem Mi.

¹¹Koro mbufo emenyene mme ubuene ye mbufo kpukpru ini; edi mbufo inyeneke Mi kpukpru ini.

¹²Koro ke emi enye ɔtɔhɔde ufuɔŋkpɔ emi ɔduɔk Mi ke idem, enye anam, man ŋkpebeŋe ini eribuk Mi.

¹³Ke akpanikɔ ke ndɔhɔ mbufo, Ebiet ekededi eke edikwɔrɔde gospel emi ke ofuri ererimbot, eyetiŋ ŋko ebaŋa se ŋwan emi akanamde, ndida nti enye.

¹⁴Ekem owo kiet ke otu mbet Esie duopeba, emi ekerede Judas Iscariot, adaha etiene ikpɔ oku, ete,

¹⁵Mbufo enyime ndinɔ mi nso, ndien nyeda Enye nyak nnɔ mbufo? Mmɔ edomo mbak silver edip ye duop enɔ enye.

¹⁶Tɔŋɔ ini oro enye oyom ifet nte edidade Jesus ayak ɔnɔ.

¹⁷Edi ke akpa usen usɔrɔ uyo eke leaven miduhe, mbet etiene Jesus, ete, Oyom nnyin inam ŋkpɔ ebeŋe inɔ Fi ke mmɔŋ, man adia passover?

¹⁸Ndien Enye ɔdɔhɔ mmɔ ete, Eduk ke obio, etiene owo ntem, enyuŋ edɔhɔ enye ete, andikpep ete, Ini Mi ke ekpere; mmɔŋ nnim passover ke ufɔk fo ye mbet Mi.

¹⁹Mbet oro enyuŋ enam nte Jesus etemede mmɔ enyuŋ etim passover ebeŋe.

²⁰Ndien ke mbubreyo Enye ɔsuhɔre etetie ke itie-udia ye mbet Esie duopeba;

²¹ndien nte mmɔ ediade, Enye ɔdɔhɔ ete, Ke akpanikɔ ke ndɔhɔ mbufo, owo kiet ke otu mbufo eyeda Mi ɔnɔ.

²²Ndien mmɔ efuhɔ eti-eti, enyuŋ etɔŋɔ ndibup Enye kiet kiet, ete, Ndi ami, Ɔbɔŋ?

²³Ndien Enye ɔbɔrɔ ete, Owo eke edebide ubɔk ye Ami ke usan, kpa enye eyeda Mi ɔnɔ.

²⁴Eyen Owo ɔmɔŋ ɔnyɔŋ, kpa nte ekewetde ebaŋa Enye; edi eyedɔdiɔk ɔnɔ owo oro edidade Eyen Owo ɔnɔ.Ɔkpɔfɔn ye owo oro nte enye mikamanake.

²⁵Edi Judas, emi adade Enye ɔnɔ, ɔbɔrɔ ete, Ndi ami, Rabbi? Jesus ete enye, Edi afo.

²⁶Edi nte mmɔ ediade, Jesus emen uyo, ɔdiɔŋ onyuŋ obuŋ, ɔnɔ mbet Esie ete, Ebɔ, eta; emi edi ikpɔhidem Mi.

²⁷Ndien Enye emen cup, onyuŋ ɔkɔm Abasi, onyuŋ ɔnɔ mmɔ ete, Mbufo kpukpru eda eŋwɔŋ;

²⁸koro emi edi iyip Mi, eke obufa ediomi, emi eduɔkde ebaŋa ediwak owo, man efen mme idiɔk-ŋkpɔ mmɔ.

²⁹Edi ndɔhɔ mbufo nte, Ndiŋwɔŋke aba mfri vine emi, tutu osim usen oro ndiŋwɔŋde enye obufa ye mbufo ke Obio Ubɔŋ Ete Mi.

³⁰Ekem ke mmɔ ema ekɔkwɔ ikwɔ, mmɔ ewɔŋɔ eka ke Obot Olive.

³¹Ndien Jesus ɔdɔhɔ mmɔ ete, Kpukpru mbufo eyeduɔŋɔ ke idomo kabaŋa Mi ke okoneyo emi: koro ewet ete, Nyewot ekpemerɔŋ, ndien otu erɔŋ eyesuana.

³²Edi ke mma nset ke mpka, nyebem mbufo iso ŋka ke Galilee.

³³Edi Peter ɔbɔrɔ Enye ete, Kpukpru owo ekpɔduɔŋɔ kabaŋa Fi ami ndiduɔhɔ tutu amama.

³⁴Jesus ete enye, Ke akpanikɔ ke ndɔhɔ fi nte, Okoneyo emi, ke ekikɔ mikpɔkke kaŋa, afo eyekaŋ Mi utim ikata.

³⁵Peter ete Enye, Akpanana nte ŋkpa ye Afo, ndikaŋke Fi. Kpukpru mbet enyuŋ edɔhɔ kpa ntre.

³⁶Ekem Jesus asaŋa ye mmɔ edisim ebiet emi ekerede Gethsemane, onyuŋ ɔdɔhɔ mbet Esie ete, Mbufo etie mi, tutu ŋka ko ŋkɔbɔŋ akam.

³⁷Ndien Enye ada Peter ye nditɔ Zebedee iba adian idem, onyuŋ ɔtɔŋɔ ndifuhɔ, nnyuŋ ndu ke nnanenyin.

³⁸Ekem Enye ɔdɔhɔ mmɔ ete, Ukpɔŋ Mi ɔfuhɔ eti-eti ekpere ndikpa; mbufo etie mi, ekpeme ye Ami.

³⁹Ndien Enye aka ke iso esisit, ɔduɔ okibi iso ke isɔŋ, ɔbɔŋ akam ete, O Ete Mi, edieke usuŋ odude, yak cup emi ebe ɔkpɔŋ Mi; edi yak okudi nte Ami nnyimede; edi yak edi nte Afo onyimede.

⁴⁰Ndien Enye etiene mbet, okut nte mmɔ edede, onyuŋ ɔdɔhɔ Peter ete, Nso idi emi? nte mbufo ikemeke nditiene Mi ŋkpeme ke hour kiet?

⁴¹Ekpeme, enyuŋ ebɔŋ akam, mbak mbufo ediduk ke idomo: ukpɔŋ ɔsɔp ke akpanikɔ, edi obukidem edi mmem-mmem.

⁴²Enye ɔtɔŋɔ ntak aka ɔyɔhɔ utim ikaba ɔkɔbɔŋ akam ete, O Ete Mi, edieke cup emi mikemeke ndibe ŋkpɔŋ Mi ke mmeŋwɔŋke enye, yak edi nte Afo onyimede.

⁴³Ndien Enye afiak edi edikut nte mmɔ edede, koro enyin etiede mmɔ idap-idap.

⁴⁴Enye ɔtɔŋɔ ntak ɔkpɔŋ mmɔ, aka ɔkɔbɔŋ akam ɔyɔhɔ utim ikata, etiŋ kpasuk ikɔ oro.

⁴⁵Ekem Enye asaŋa ekpere mbet Esie, ete, Edɔdiɔŋ ede idap, eda nduɔkodudu: sese, ini ke ekpere; emonyuŋ eda Eyen Owo esin mme idiɔk owo ke ubɔk.

⁴⁶Edaha ke enyɔŋ; nnyin inyɔŋ; sese, owo emi adade Mi ɔnɔ ke ekpere.

⁴⁷Ndien ke adaŋemi Enye osuk etiŋde ntem, sese, Judas, emi edide owo kiet ke otu mbet duopeba, edi; akwa otu owo, eke etode ke ikpɔ oku ye mbiowo obio, enyuŋ esaŋa ye enye, ye ofut ye eto ke ubɔk.

⁴⁸Andida Enye nnɔ ama ɔnɔ mmɔ idiɔŋɔ, ete, Owo emi nditimde enye inua, oro edi enye: emum Enye.

⁴⁹Ntem enye etiene Jesus ini kiet, ete Enye, Mmɔkɔm Fi, Rabbi, onyuŋ otim Enye inua.

⁵⁰Jesus ete enye, Ufan, nam se edide ndinam. Ekem mmɔ edi edidori Jesus ubɔk, emum Enye.

⁵¹Ndien sese, owo kiet ke otu owo oro edude ye Jesus anyan ubɔk adabare ofut, ekpi owo akwa oku, osibe enye utɔŋ.

⁵²Jesus ɔdɔhɔ enye ete, Sin ofut fo ke efɔk: koro kpukpru owo eke emende ofut eyekpaŋa ke ofut.

⁵³Mme ese ete ŋkemeke ndikpe Ete Mi ubɔk, mbɔ Enye se ibede legion mme angel duopeba idaha emi?

⁵⁴Edi se ewetde, ete, Ŋkpɔ enyene ndiwɔrɔ ntem, edinam didie ndien osu?

⁵⁵Ke ini oro Jesus ɔdɔhɔ mme otu owo ete, Nte mbufo emɔwɔŋɔ edi ye ofut ye eto ndimum Mi nte ŋkpɔ eke ebinede owo ŋwo? Mma ntie ye mbufo ke temple ŋkpep ŋkpɔ ke usen ke usen, edi mbufo imumke Mi.

⁵⁶Edi kpukpru emi ɔwɔrɔ, man se mme prophet ekewetde osu. Ndien mbet Esie kpukpru ekpɔŋ Enye efeŋe.

⁵⁷Edi mmɔ emi emumde Jesus eda Enye edaha ke ufɔk Caiaphas, akwa oku, ke ɔtɔ nte mme scribe ye mbiowo ebonode do.

⁵⁸Edi Peter asaŋa nsan-nsan ke edem edisim esit okure akwa oku, onyuŋ oduk ɔsuhɔre etetie ye mme asaŋutom, ete, ikut se idiwɔrɔde.

⁵⁹Edi ikpɔ oku ye ɔfuri akwa esop eyom ikɔ nsu eke ekpetiŋde edian Jesus, man mmɔ ewot Enye:

⁶⁰ndien mmɔ ikwe, okposuk edi nte ediwak ntiense nsu ewɔŋɔde edi.

⁶¹Ekem owo iba edi edidɔhɔ ete, Da emi ɔkɔdɔhɔ ete, Mmekeme ndiwuri temple Abasi, ndinyuŋ ntɔŋɔ ntak mbɔp enye ke usen ita.

⁶²Ndien akwa oku adaha ke enyɔŋ, ete Enye, Nte ubɔrɔke baba ikɔ kiet? Nso ikɔ edi emi mmɔ oro etiŋde edian Fi?

⁶³Edi Jesus isioroke uyo. Ntre ke akwa oku ɔdɔhɔ Enye ete, Mmowuk Fi ke enyiŋ Abasi emi odude uwem, nte, asian nnyin me Afo edi Christ, Eyen Abasi.

⁶⁴Jesus ɔbɔrɔ enye ete, Edi ntre; edi ndɔhɔ mbufo nte ɔtɔŋɔde ke emi mbufo eyekut nte Eyen Owo etiede ke ubɔk nnasia Odudu, onyuŋ odorode ke obubit enyɔŋ edi.

⁶⁵Ekem akwa oku awai ekura esie, ete, Enye ama etiŋ ŋkpɔ esuene Abasi: nnyin iyom nso aba ye ntiense? sese, mbufo emokop ikɔ-esuene eke Enye etiŋde.

⁶⁶Mmɔ ebɔrɔ ete, Enye edue isop mkpa.

⁶⁷Ekem mmɔ etɔ Enye etap ke iso, enyuŋ etɔŋɔ Enye ita:

⁶⁸ndusuk mmɔ enyuŋ eyibi Enye ufia, ete Enye, Siak enyiŋ owo emi oyibide Fi, O Christ.

⁶⁹Edi Peter etie ke esien ke esit okure: ndien eyen-aŋwan kiet asaŋa ekpere enye, ete, Afo nde okodu ye Jesus eyen Galilee.

⁷⁰Edi enye akaŋ ke iso mmɔ kpukpru, ete, Mfiɔkke se etiŋde.

⁷¹Ndien ke ini enye ɔwɔrɔde ke otop, eyen-aŋwan efen okut enye, onyuŋ ɔdɔhɔ mmɔ emi edade do, ete, Owo emi nde okodu ye Jesus eyen Nazareth.

⁷²Ndien enye ɔtɔŋɔ ntak akaŋ onyuŋ ɔŋwɔŋɔ ete, Ndiɔŋɔke owo oro.

⁷³Ke ekpri ini ebede, mmɔ emi edade ekpere etiene Peter, ete, Ke akpanikɔ afo edi owo kiet ke otu mmɔ, koro ikɔ-inua fo ayarare fi.

⁷⁴Ekem enye ɔtɔŋɔ ndisioŋo ikɔ isuŋi nnyuŋ ŋwɔŋɔ ŋkpɔ, ete, Ndiɔŋɔke owo emi; ndien idaha oro ekikɔ ɔkpɔk.

⁷⁵Ndien Peter eti ikɔ oro Jesus eketiŋde ɔnɔ enye, ete, Eyekaŋ Mi utim ikata, ndien ekikɔ edikpɔk. Ndien Enye ɔwɔrɔ ke aŋwa atua eyet eti-eti.