Read efik MATTHEW 27 Bible Online

MATTHEW 27 - efik bible

MATTHEW 27

¹EDI ke ini eyo esierede, kpukpru ikpɔ oku ye mbiowo obio eduk ediomi ebaŋa Jesus, ete iwot Enye:

²ndien mmɔ ebɔp Enye ubɔk, eda Enye edaha ekayak enɔ Pilate andikara.

³Ekem ke ini Judas, emi akadade Enye ɔnɔ, okutde ete ebiom Enye ikpe, enye atua mkpɔfiɔk, onyuŋ ada mbak silver edip ye duop oro afiak ɔsɔk ikpɔ oku ye mbiowo, ete mmɔ, Mmanam idiɔk-ŋkpɔ, ke emi ŋkayakde iyip emi miduehe isop nnɔ.

⁴Edi mmɔ ete enye, Nnyin isaŋa nso do? Ikɔ fo edi oro.

⁵Ndien enye otomo mbak silver oro ɔduɔk ke temple, adaha ɔnyɔŋ ekeyire akpa.

⁶Edi ikpɔ oku etaŋ mbak silver oro, ete, Inenke ndisin okuk emi ke itie-unim-okuk temple, sia edide ekɔm-urua iyip.

⁷Ntre ke mmɔ eduk ediomi, eda okuk oro edep iŋwaŋ obot-eso, ndibuk isen owo ke esit.

⁸Mmɔdo ekotde iŋwaŋ oro, ete, Iŋwaŋ iyip, tutu osim mfin emi.

⁹Ntem ke se Jeremiah prophet eketiŋde osu, ete, Mmɔ eda mbak silver edip ye duop, ekɔm-urua owo emi mmɔ ekɔkɔmde urua esie, emi ndusuk nditɔ Israel ekɔmde,

¹⁰enɔ ke iŋwaŋ obot-eso, nte Jehovah eketemede mi.

¹¹Edi Jesus ada ke iso andikara: andikara onyuŋ obup Enye ete, Nte Afo edi edidem mme Jew? Jesus ɔdɔhɔ enye ete, Ndi Enye.

¹²Ndien ke ini ikpɔ oku ye mbiowo edoride Enye ikɔ, Enye ibɔrɔke baba ikɔ kiet.

¹³Pilate ɔdɔhɔ Enye ete, Nte ukopke adaŋa ediwak ŋkpɔ eke mmɔ etiŋde edian Fi?

¹⁴Ndien Enye ibɔrɔke baba ikɔ kiet, esin idem akpa andikara eti-eti.

¹⁵Edi ke kpukpru usɔrɔ andikara akam esisana owo-ŋkpɔkɔbi kiet, eke otu owo eyomde, ayak ɔnɔ mmɔ.

¹⁶Ini oro mmɔ enyene owo-ŋkpɔkɔbi kiet emi ɔwɔrɔde etop, emi ekerede Barabbas.

¹⁷Mmɔdo ke ini mmɔ ebonode ɔtɔ kiet, Pilate ɔdɔhɔ mmɔ ete, Mbufo eyom ete nsana anie nyak nnɔ mbufo? mme Barabbas, mme Jesus emi ekotde Christ?

¹⁸Koro enye ɔfiɔk ete, ke mmɔ ekayak Enye esin imɔ ke ubɔk ke ntak ufup.

¹⁹Edi ke adaŋemi enye etiede ke itie-ikpe, ŋwan esie ɔdɔŋ edidɔhɔ enye ete, Kusaŋa ŋkpɔ ye eti owo emi; koro mma ŋkut ukut eti-eti ke ndap mfin emi mbaŋa Enye.

²⁰Edi ikpɔ oku ye mbiowo ewɔŋɔre mme otu owo esit, ete mmɔ ebeŋe eyak Barabbas enyuŋ ewot Jesus.

²¹Edi andikara ɔbɔrɔ mmɔ ete, Mbufo eyom nsana anie ke otu owo iba emi nyak nnɔ mbufo? Mmɔ ete, Barabbas.

²²Pilate ete mmɔ, Nnam ndien didie ye Jesus emi ekotde Christ?

²³Mmɔ kpukpru ete, Ewot Enye ke cross. Edi enye ete, Ntak-e? nso idiɔk-ŋkpɔ ke Enye anam? Edi mmɔ edɔdiɔŋ efiori ete, Ewot Enye ke cross.

²⁴Edi ke ini Pilate okutde ete, imɔ ikemeke ndinam ndomo ŋkpɔ kiet, edi utu ke oro ndutime edidu, enye ada mmɔŋ eyet ubɔk ke iso otu owo, ete mmɔ, Nsaŋake ŋkpɔ ke iyip eti owo emi: mbuhehe mbufo edi oro.

²⁵Ndien mbiobio kpukpru ebɔrɔ enye ete, Iyip Esie akpakam ɔkɔbɔ nnyin ye nditɔ nnyin.

²⁶Ntre ke Pilate asana Barabbas ayak ɔnɔ mmɔ: edi amia Jesus, onyuŋ ayak Enye ɔnɔ mmɔ, ete eda Enye ekowot ke cross.

²⁷Ekem mbon-ekɔŋ andikara eda Jesus eduk ke akwa ufɔk andikara, enyuŋ ekot ɔfuri ŋka mmɔ edi ke ɔtɔ Esie.

²⁸Mmɔ enyuŋ ekpɔk Enye edisine-ŋkpɔ Esie ke idem efep, emen ididuot ekura efɔri Enye ke idem.

²⁹Mmɔ enyuŋ edɔk anyanya ŋkukim eyara Enye ke ibuot, enyuŋ efak Enye esaŋ ke ubɔk nnasia; enyuŋ etɔŋɔ edɔŋ ke iso Esie, esak Enye nsahi, ete, Etia! Edidem mme Jew!

³⁰Ndien mmɔ ekɔk etap etɔ Enye, enyuŋ ewabare esaŋ oro ebɔ eyibi Enye ke ibuot.

³¹Ndien ke ini mmɔ ema ekasak Enye ema, mmɔ efɔrɔre Enye ekura oro, esine Enye ɔfɔŋidem Esie, enyuŋ eda Enye edaha eka ndiwot ke cross.

³²Edi ke adaŋemi mmɔ ewɔrɔde, mmɔ ekut owo Cyrene, emi ekerede Simon: mmɔ enyik enye etiene mmɔ, man obiom cross Jesus.

³³Ndien ke ini mmɔ esimde ebiet emi ekerede Golgotha (oro ɔwɔrɔ ete, Ebiet mkpɔkpɔrɔ),

³⁴enɔ Enye wine emi abuahade ye etidot, ɔŋwɔŋ; edi ke ini Enye atabide enye, iŋwɔŋke.

³⁵Edi ke ini mmɔ ema ekɔkɔŋ Enye ke cross, mmɔ esin afia, ete ideme edisine-ŋkpɔ Esie ida ke idem mme imɔ:

³⁶mmɔ enyuŋ etie do ekpeme Enye.

³⁷Mmɔ enyuŋ ewet ŋwed eridori-ikɔ edian cross ke enyɔŋ ibuot Esie, ete,

³⁸EMI EDI JESUS EDIDEM MME JEW. Mmɔ enyuŋ ekɔŋ mbon-ŋwo iba ke cross ye Enye, kiet ke ubɔk nnasia, enye eken ke ufien.

³⁹Mmɔ emi esaŋade ebe enyuŋ esuene Enye, enyeŋe ibuot, ete,

⁴⁰Afo, emi owuride temple, onyuŋ ɔbɔpde enye ke usen ita, nyaŋa idem; edieke Afo edide Eyen Abasi, suhɔre ke cross.

⁴¹Kpasuk ntre ikpɔ oku ye mme scribe ye mbiowo esak Enye nsahi, ete,

⁴²Enye akanyaŋa owo efen; ikemeke ndinyaŋa Idem Esie. Yak Enye ɔsuhɔre ke cross idaha emi, ndien nnyin iyenim Enye ke akpanikɔ.

⁴³Enye ɔbuɔt idem ye Abasi: yak Abasi anyaŋa Enye idaha emi, edieke oyomde Enye. Koro Enye ɔkɔdɔhɔ ete, Ndi Eyen Abasi.

⁴⁴Mbon-ŋwo emi ekɔkɔŋde ye Enye ke cross enyuŋ etɔk Enye kpa ntre.

⁴⁵Edi ɔtɔŋɔde ke ufɔt uwemeyo tutu osim hour ita ke uwemeyo, ekim ofuk ɔfuri isɔŋ.

⁴⁶Ndien ke ini ekperede hour ita ke uwemeyo, Jesus ofiori ke ɔkpɔsɔŋ uyo, ete, Eli, Eli, lama sabachthani? oro ɔwɔrɔ ete, Abasi Mi, Abasi Mi, nsinam Afo ɔkpɔŋde Mi?

⁴⁷Edi ke ini ndusuk owo emi edade do ekopde, mmɔ ete, Owo emi ke okot Elijah.

⁴⁸Ndien idaha oro owo kiet ke otu mmɔ efehe akada ndɔbɔ, edebi ke vinegar, owuk ke eto, ɔnɔ Enye ɔŋwɔŋ.

⁴⁹Edi mmɔ eken edɔhɔ ete, Yak etie; nnyin ise mme Elijah ke edi edinyaŋa Enye.

⁵⁰Edi Jesus ɔtɔŋɔ ntak ofiori ke ɔkpɔsɔŋ uyo, ndien ayak ukpɔŋ Esie.

⁵¹Ndien sese, ukara temple asiaha mbak iba, ɔtɔŋɔde ke enyɔŋ osim ke isɔŋ; isɔŋ onyuŋ enyek;

⁵²ikpɔ itiat enyuŋ esiaha; mme udi enyuŋ ekibɔre; enyuŋ enam ediwak mme okpo nti ikɔt abasi, emi ekedede, eset;

⁵³mmɔ oro enyuŋ ewɔŋɔ ke udi, ke Enye ama ekeset ke mpka, eduk ke edisana obio, ewut ediwak owo idem.

⁵⁴Edi ke ini centurion, ye mmɔ emi edude ye enye ekpeme Jesus, ekutde unyek-isɔŋ, ye mme ŋkpɔ oro etibede, mmɔ efehe akwa ndik eti-eti, enyuŋ edɔhɔ ete, Ke akpanikɔ emi ekedi Eyen Abasi.

⁵⁵Ndien ediwak iban, emi ekotode ke Galilee esaŋa ye Jesus ese ebaŋa Enye, edu do, eda nsan nsan ese;

⁵⁶Mary Magdalene, ye Mary eka James ye Joseph, ye eka nditɔ Zebedee edu ke otu mmɔ.

⁵⁷Edi ke ini osimde mbubreyo, owo inyene emi otode Arimathea, emi ekerede Joseph, edi; enye ke idem esie edi owo mbet Jesus;

⁵⁸owo emi etiene Pilate ekebeŋe okpo Jesus.

⁵⁹Pilate onyuŋ ɔnɔ uyo ete, eyak enɔ enye. Ndien Joseph ada okpo Jesus ɔbɔp ke edisana ɔfɔŋ linen,

⁶⁰onim ke obufa udi esiemɔ, emi enye okotuŋde ke itiat; onyuŋ akpat akambia itiat eberi ke iso usuŋ udi, ɔnyɔŋ.

⁶¹Mary Magdalene onyuŋ odu do, ye Mary eken, etie esak iso ese udi.

⁶²Edi ke ndaŋ-nsiere, emi etienede usen mbeŋe-idem ke edem, ikpɔ oku ye me Pharisee ebono eka ke ɔtɔ Pilate, enyuŋ edɔhɔ enye, ete,

⁶³Ɔbɔŋ, nnyin imeti ite, ke ini owo abiaŋa oro okodude uwem, Enye ɔdɔhɔ ete, Usen ita ema ebe Imɔ iyeset.

⁶⁴Nɔ uyo ndien etim ekpeme udi tutu osim ɔyɔhɔ usen ita, mbak ndusuk mbet Esie edidi ediyip Enye, enyuŋ edɔhɔ ete, Enye ama eset ke mkpa.

⁶⁵Ndien ukperedem abiaŋa eyediɔk akan mbemiso. Pilate ete mmɔ, Mbufo emenyene mbon-ukpeme: mbufo eka ekekpeme udi nte ekekeme.

⁶⁶Mmɔ enyuŋ eka ekanam etim ekpeme udi, enim idiɔŋɔ ke itiat, mbon-ukpeme enyuŋ edu ye mmɔ.