Read efik MATTHEW 4 Bible Online

MATTHEW 4 - efik bible

MATTHEW 4

¹EKEM Spirit ada Jesus ɔdɔk aka ke desert, man Satan odomo Enye.

²Enye inyuŋ idiaha ŋkpɔ uwemeyo aba ye okoneyo aba, ndien oro ema ekebe, Enye okop biɔŋ.

³Ndien andidomo edi edidɔhɔ Enye ete, Edieke Afo edide Eyen Abasi, wuk mme itiat emi ekabare edi uyo.

⁴Edi Jesus ɔbɔrɔ ete, Ema ewet ete, Idige uyo ikpɔŋ ke owo edida idu uwem, edi edida kpukpru ikɔ eke ewɔrɔde Abasi ke inua odu.

⁵Ekem Satan ada Enye oduk ke edisana obio, emen Enye odori ke edikoŋ ebiet temple, onyuŋ ɔdɔhɔ Enye ete,

⁶Edieke Afo edide Eyen Abasi, sio Idem Fo duɔk ke isɔŋ; koro ema ewet ete, Enye eyenɔ mme angel Esie uyo abaŋa: Fi Ndien mmɔ eyekama Fi ke ubɔk mmɔ, Mbak Afo edituak ukot Fo ke itiat.

⁷Jesus ɔdɔhɔ enye ete, Ema ewet ŋko ete, Kudomo Jehovah Abasi fo.

⁸Ŋko Satan ada Enye aka ke ata edikoŋ obot, onyuŋ owut Enye kpukpru mme obio ererimbot ye ubɔŋ mmɔ;

⁹onyuŋ ɔdɔhɔ Enye ete, Nyenɔ Fi kpukpru ŋkpɔ emi, edieke ɔduɔde ke isɔŋ atuak ibuot ɔnɔ Mi.

¹⁰Ekem Jesus ɔdɔhɔ enye ete, Daha Mi ke usuŋ, Satan: koro ema ewet ete, Tuak ibuot nɔ Jehovah Abasi fo, nyuŋ nam ŋkpɔ nɔ Enye ikpɔŋ-ikpɔŋ.

¹¹Ekem Satan adaha ɔkpɔŋ Enye; ndien sese, mme angel edinam ŋkpɔ enɔ Enye.

¹²Edi ke ini Jesus okopde ete ekeyak John enɔ, Enye ɔnyɔŋ aka Galilee;

¹³onyuŋ ɔkpɔŋ Nazareth ebe edi ediduŋ ke Capernaum, emi odude ke mben inyaŋ, ke adaŋa Zebulon ye Naphtali;

¹⁴man osu nte Isaiah prophet ɔkɔhɔde, ete,

¹⁵Isɔŋ Zebulon ye isɔŋ Naphtali, Usuŋ inyaŋ, ke edem Jordan oko, Galilee mme Gentile.

¹⁶Mbio oro eketiede ke ekim Ekut akwa uŋwana, Ama edi mmɔ eketiede ke isɔŋ mfut mkpa, Uŋwana ayama ɔnɔ mmɔ.

¹⁷Toto ke ini oro Jesus ɔtɔŋɔ ndikwɔrɔ, ndinyuŋ ndɔhɔ, ete, Ekebare esit; koro Ubɔŋ Heaven ke ekpere.

¹⁸Edi nte Enye asaŋade ke mben Inyaŋ Galilee, enye okut nditɔeka iba, kpa Simon emi ekerede Peter ye Andrew eyen-eka esie, nte eduɔŋɔde iyire ke inyaŋ; koro mmɔ edide mme ɔkɔ-iyak.

¹⁹Enye onyuŋ ɔdɔhɔ mmɔ ete, Etiene Mi, ndien nyenam mbufo edi mme ɔkɔ-owo.

²⁰Ndien ndo-ndo oro mmɔ edaha ekpɔŋ iyire, etiene Enye.

²¹Nte Enye ebede asaŋa ke iso, Enye okut nditɔ-eka iba efen, kpa James eyen Zebedee ye John eyen-eka esie, nte etiede ke ubom ye ete mmɔ Zebedee ediɔŋ iyire mmɔ; Enye onyuŋ okot mmɔ.

²²Ndien ndo-ndo oro mmɔ edaha ekpɔŋ ubom ye ete mmɔ, etiene Enye.

²³Ndien Jesus asaŋa ke ofuri Galilee, ekpep mme owo ŋkpɔ ke synagogue mmɔ, onyuŋ ɔkwɔrɔ gospel Ubɔŋ Heaven, onyuŋ anam kpukpru oruk ubiak ye kpukpru oruk udɔŋɔ eke enamde mbio-obio ekure.

²⁴Etop Esie onyuŋ asuana ke ofuri Syria; mmɔ enyuŋ eda kpukpru mbon udɔŋɔ esɔk Enye, kpa mmɔ eke nsio-nsio udɔŋɔ ye ndutuhɔ enamde mmɔ, ye mmɔ eke enyenede mme demon, ye mmɔ eke edɔŋɔde mbukpi ye akpa-ubeŋ; Enye onyuŋ anam mmɔ ekop nsɔŋidem.

²⁵Ndien ata ediwak otu owo eto ke Galilee ye Decapolis ye Jerusalem ye Judaea ye edem Jordan oko esaŋa ye Enye.