Read efik MATTHEW 6 Bible Online

MATTHEW 6 - efik bible

MATTHEW 6

¹EKPEME ekunam edinen ido mbufo ke iso owo, ete mmɔ ekut: enamde ntre, mbufo inyeneke utip ke ubɔk Ete mbufo emi odude ke heaven.

²Mmɔdo ke ini ɔnɔde eyen ubuene ŋkpɔ, kutaŋ ese, nte mbio mbubik enamde ke mme synagogue ye mme efak, ete owo ekpono mme imɔ. Ke akpanikɔ ke ndɔhɔ mbufo, Mmɔ ema ebɔ utip mmɔ.

³Edi ke ini afo ɔnɔde eyen ubuene ŋkpɔ, kuyak ubɔk ufien fo ɔfiɔk se ubɔk nnasia fo anamde:

⁴man erinɔ fo edi ke ndibe: ndien Ete fo emi okutde ke ndibe eyenɔ fi usiene.

⁵Ke ini mbufo enyuŋ ebɔŋde akam, ekubiet mbon mbubik: koro mmɔ ema ndida ke mme synagogue ye ke mme inuk efak mbɔŋ akam, ete iwut owo idem. Ke akpanikɔ ke ndɔhɔ mbufo, Mmɔ ema ebɔ utip mmɔ.

⁶Edi ama edi afo, ke ini ɔbɔŋde akam, duk ke esit ubet fo, beri usuŋ, bɔŋ akam nɔ Ete fo emi odude ke ndibe, ndien Ete fo emi okutde ke ndibe eyenɔ fi usiene.

⁷Ndien ke ini ebɔŋde akam, ekuyire nditetiŋ ikpikpu ikɔ, nte mme Gentile enamde: koro etie mmɔ nte erikop akam oto ke uwak ikɔ eke etiŋde.

⁸Mmɔdo ekubiet mmɔ: koro Ete mbufo ɔmɔfiɔk ŋkpɔ eke enanade mbufo, ndien mbufo edibeŋe Enye.

⁹Ebɔŋ akam ntem ndien, ete, Ete nnyin emi odude ke heaven: Yak ikpono enyin Fo,

¹⁰Yak Ubɔŋ Fo edi; Yak inam uduak Fo; Nte enamde ke heaven, yak inam ke isɔŋ kpasuk ntre;

¹¹Nɔ nnyin udia eke ekemde nnyin ke usen mfin;

¹²Nyuŋ dahado ke isɔn eke ikamade Fi, nte emi nnyin ikadahadedo inɔ mmɔ emi ekamade nnyin isɔn;

¹³Kunyuŋ uda nnyin usin ke idomo; Edi sio nnyin ke ubɔk andidiɔk.

¹⁴Koro edieke mbufo edahadedo enɔ owo ke ndudue mmɔ, Ete mbufo ke heaven eyenyuŋ adahado ɔnɔ mbufo.

¹⁵Edi edieke mbufo midahakedo inɔ owo ke ndudue mmɔ, Ete mbufo idinyuŋ idahakedo ke ndudue mbufo.

¹⁶Edi ke ini mbufo etrede udia, ekunim iso mfuhɔ-mfuhɔ, nte mbio mbubik enamde; koro mmɔ ekpuhɔre iso mmɔ, man owo ekut ete mmɔ ke etre udia. Ke akpanikɔ ke ndɔhɔ mbufo, Mmɔ ema ebɔ utip mmɔ.

¹⁷Edi ama edi afo, ke ini etrede udia, da aran yet ke ibuot, nyuŋ yet iso:

¹⁸man okuwut owo idem ete itre udia, edi man owut Ete fo emi odude ke ndibe idem: ndien Ete fo emi okutde ke ndibe eyenɔ fi usiene.

¹⁹Ekubon ŋkpɔ-uto enim enɔ idem ke isɔŋ, ke ɔtɔ nte uta-ŋkpɔ ye ŋkarafaŋ ebiatde ŋkpɔ, inɔ enyuŋ ebuŋde, eduk, eyip:

²⁰edi ebon ŋkpɔ-uto enim enɔ idem ke heaven, ke ɔtɔ nte uta-ŋkpɔ ye ŋkarafaŋ mibiatke ŋkpɔ, inɔ minyuŋ ibuŋke, iduk, iyip:

²¹koro ɔtɔ nte ŋkpɔ-uto fo odude, do ke esit fo edinyuŋ odu.

²²Utuenikaŋ ikpɔhidem edi enyin: ntre edieke enyin fo eneŋerede ese, ofuri ikpɔhidem fo eyeyama.

²³Edi edieke enyin fo ɔdiɔkde, ofuri ikpɔhidem fo eyekim. Ntre edieke uŋwana emi odude fi ke idem edide ekim, ekim emi odude fi ke idem ɔsɔŋ adaŋa didie!

²⁴Baba owo kiet ikemeke ndisaŋa utom mme ete iba: koro enye eyesua kiet, ama eken; midige ntre, enye eyesɔŋɔ ada ye kiet, esin enye eken ke ndek. Mbufo ikemeke ndisaŋa utom Abasi ye eke mammon.

²⁵Mmɔdo ndɔhɔ mbufo nte, Ekutimere esit ebaŋa uwem mbufo, ete ididia nso? mme idiŋwɔŋ nso? mme ebaŋa ikpɔhidem mbufo, ete idisine nso? Nte uwem ikanke udia? nte ikpɔhidem inyuŋ ikanke edisine-ŋkpɔ?

²⁶Ese mme inuen enyɔŋ, ete mmɔ itɔhɔ-tɔ inyuŋ idɔkke-dɔk, inyuŋ ibonke inim ke ubet; ndien Ete mbufo emi odude ke heaven ɔbɔk mmɔ. Nte mbufo ikponke ikan mmɔ?

²⁷Anie ke otu mbufo ekeme ndida ekikere ndian ibio idomo okuk kiet ke idaha esie?

²⁸Nsinyuŋ idi ntak eke mbufo etimerede esit mbufo ebaŋa edisine-ŋkpɔ? Ekere ekpɔŋidim ke ikɔt nte mmɔ ekɔride; mmɔ inamke ɔkpɔsɔŋ utom, inyuŋ ifiakke ndidi:

²⁹edi ndɔhɔ mbufo nte, kpa Solomon ke ofuri ubɔŋ esie ikesineke se iyede nte kiet ke otu mmɔ.

³⁰Edi edieke Abasi esinede mbiet iŋwaŋ nkpɔ ntem, kpa mbiet eke odude mfin, ndien mkpɔŋ emen esin ke usaŋ-uyo, nte Enye idisineke mbufo ŋkpɔ ikan, O mbufo nditɔ ekpri mbuɔtidem?

³¹Mmɔdo ekutimere esit ebup ete, Nso ke nnyin ididia? Nso ke nyin idiŋwɔŋ? Nso ke nnyi indisine?

³²Koro mme Gentile eyom kpukpru ŋkpɔ emi: koro Ete mbufo ke heaven ɔmɔfiɔk ete kpukpru ŋkpɔ emi enana mbufo.

³³Ekam ebem iso eyom Obio Ubɔŋ Esie ye edinen ido Esie; ndien eyedian kpukpru ŋkpɔ emi enɔ mbufo.

³⁴Ekutimere esit ebaŋa mkpɔŋ ndien; koro mkpɔŋ eyeda utimere-esit esie edi. Afanikɔŋ usen ekem ye usen.