Read efik MATTHEW 9 Bible Online

MATTHEW 9 - efik bible

MATTHEW 9

¹EKEM Enye ediere ke ubom ebe, edi ke obio Esiemɔ.

²Ndien sese mmɔ eda owo ɔdɔŋɔ-akpa-ubeŋ, emi ebiomde ke mbri, esɔk Enye: ndien ke ini Jesus okutde mbuɔtidem mmɔ, Enye ɔdɔhɔ ɔdɔŋɔ-akpa-ubeŋ oro ete, Eyen Mi, sɔŋ esit; emefen mme idiɔk-nkpɔ fo.

³Ndien sese, ndusuk mme scribe edɔhɔ ke esit mmɔ ete, Owo emi ke osuŋi Abasi.

⁴Edi Jesus ɔfiɔk ekikere mmɔ, onyuŋ ete mmɔ, Nsinam mbufo ekerede idiɔk ekikere ke esit mbufo?

⁵Koro ewe emem akan, mme ndidɔhɔ nte, Emefen mme idiɔk-ŋkpɔ fo; me ndidɔhɔ nte, Daha ke enyɔŋ, saŋa?

⁶Edi man mbufo efiɔk ete, Eyen Owo enyene odudu ke isɔŋ ndifen mme idiɔk-ŋkpɔ (Enye ɔdɔhɔ ɔdɔŋɔ-akpa-ubeŋ, ete), Daha ke enyɔŋ men mbri fo, nyɔŋ ufɔk.

⁷Owo oro adaha ke enyɔŋ, ɔnyɔŋ ufɔk.

⁸Edi ke ini mme otu owo ekutde ŋkpɔ emi, ndik anam mmɔ, mmɔ enyuŋ etoro Abasi emi akayakde oruk odudu emi ɔnɔ owo.

⁹Ekem nte Jesus otode do asaŋa ebe, Enye okut owo kiet, emi ekerede Matthew, etiede ke itie ubɔ-utomo; onyuŋ ɔdɔhɔ enye ete, Tiene Mi. Ndien Matthew adaha ke enyɔŋ, etiene Enye.

¹⁰Edikem, nte Jesus etiede ke itie-udia ke esit ufɔk, sese, ediwak mme publican ye mme idiɔk owo edi edisuhɔre etie ye Enye ye mbet Esie.

¹¹Ke adaŋemi mme Pharisee ekutde ŋkpɔ emi, mmɔ edɔhɔ mbet Esie, ete, Nsinam Andikpep mbufo adiade ŋkpɔ ye mme publican ye mme idiɔk owo?

¹²Edi ke ini Jesus okopde, Enye ete, Mmɔ emi enyenede nsɔŋidem iyomke abia-ibɔk, edi mmɔ emi edɔŋɔde eyom.

¹³Edi eka ekekpep se ikɔ emi ɔwɔrɔde, Edi mbɔm ke nyom, idige uwa. Koro ŋkedige ndikot ndinen owo, edi mme idiɔk owo.

¹⁴Ekem mbet John edi ke ɔtɔ Esie ete, Nsidi ntak eke nnyin ye mme Pharisee iwakde nditre udia, edi mbet Fo mitreke?

¹⁵Ndien Jesus ɔdɔhɔ mmɔ ete, Nte nditɔ ufɔk-ndɔ emekeme ndifuhɔ adaŋa ini nte ebe-ndɔ odude ye mmɔ? Edi mme usen eyedi eke edibɔde mmɔ ebe-ndɔ; mmɔ eyetre udia adaŋoro.

¹⁶Edi baba owo kiet idaha ubak ɔfɔŋ eke midiɔŋke ikim idian ke akani ɔfɔŋidem; koro se edade esiri nde akabare awak ɔfɔŋidem, onyuŋ anam enye awaha ɔdiɔk akan.

¹⁷Owo inyuŋ insinke obufa wine ke ŋkani ikpa; ama anam ntre, ikpa asiaha, wine onyuŋ ɔduɔhɔ, ikpa enyuŋ etak. Edi esin obufa wine ke mbufa ikpa, ntem ke ekpeme mbiba.

¹⁸Nte Enye etetiŋ ntem ye mmɔ, sese, ɔbɔŋ kiet edi edituak ibuot ɔnɔ Enye ete, Eyen mi aŋwan ama akpa kpa idem idahaemi; edi di didori enye ubɔk, ndien enye eyedu uwem.

¹⁹Ndien Jesus adaha etiene enye, mbet Esie enyuŋ esaŋa ye Enye.

²⁰Ndien sese, ŋwan kiet, emi ɔkɔdɔŋɔdɔ eriwɔrɔ-iyip isua duop-eba, etiene Jesus ke edem edituk nnyeriye ɔfɔŋidem Esie:

²¹koro enye ɔdɔhɔde ke esit esie ete, Mma ŋkam ntotuk ɔfɔŋidem Esie, nyekop nsɔŋidem.

²²Edi Jesus ɔwɔŋɔre idem okut ŋwan oro, onyuŋ ɔdɔhɔ enye ete, Eyen Mi, sɔŋ esit: mbuɔtidem fo amanam fi okop nsɔŋidem. Ndien idem ɔsɔŋ ŋwan oro tɔŋɔ ini oro.

²³Ndien ke ini Jesus odukde ke ufɔk ɔbɔŋ oro, onyuŋ okutde mme efri-ifiom, ye nte owo enamde ndutime, Enye ete mmɔ,

²⁴Edaha ke usuŋ; eyen-aŋwan ikpaha mkpa, edi edede.

²⁵Ndien mmɔ esak Enye nsahi. Edi ke ini ema ekosioŋo otu owo ke ufɔk, Enye oduk omum eyen oro ke ubɔk; ndien enye adaha ke enyɔŋ.

²⁶Ndien etop ŋkpɔ emi asuana ke ofuri edem oro.

²⁷Ekem nte Jesus otode do asaŋa ebe, nnan iba etiene Enye, efiori ete, Eyen David, tua nnyin mbɔm.

²⁸Edi ke adaŋemi Enye odukde ufɔk, mme nnan oro etiene Enye: ndien Jesus ete mmɔ, Nte mbufo emenim ke akpanikɔ ete, mmekeme ndinam ŋkpɔ emi? Mmɔ ete Enye, Nnyin imenim, Ɔbɔŋ.

²⁹Ekem Enye otuk mmɔ ubɔk ke enyin, ete mmɔ, Yak osu ɔnɔ mbufo nte mbuɔtidem mbufo edide.

³⁰Ndien enyin mmɔ etara. Jesus ɔsɔŋɔ owuk mmɔ ete, Etim ese ete owo baba kiet okufiɔk.

³¹Edi mmɔ ewɔŋɔ ekesuan etop Esie ke ofuri ŋkaŋ oro.

³²Ekem nte mmɔ ewɔŋɔde, sese, eda owo imum kiet emi enyenede demon esɔk Enye.

³³Ndien ke Enye ama ekebin demon ɔduɔk, owo imum etiŋ ikɔ: ndien enyene mme otu owo ndyɔ, mmɔ enyuŋ edɔhɔ ete Akananam owo ikwe oruk ŋkpɔ eke etiede ntem ke Israel.

³⁴Edi mme Pharisee ete, Enye ada odudu ɔbɔŋ mme demon ebin mme demon ɔduɔk.

³⁵Ndien Jesus asaŋa akanare kpukpru obio ye obio-inwaŋ, ekpep owo ŋkpɔ ke mme synagogue mmɔ, onyuŋ ɔkwɔrɔ gospel Ubɔŋ Heaven, onyuŋ anam kpukpru oruk udɔŋɔ ye kpukpru oruk mmemidem ekure.

³⁶Edi ke adaŋemi Enye okutde mme otu owo, atua mmɔ mbɔm, koro mmɔ edude ke nnanenyin enyuŋ esuanade, nte erɔŋ eke minyeneke andikpeme.

³⁷Ekem Enye ɔdɔhɔ mbet Esie, ete, Ke akpanikɔ idɔk okpon, edi mme anam-utom iwakke.

³⁸Ebeŋe ndien Enyene-idɔk ete, Enye osio mme anam-utom ɔdɔŋ edi ke idɔk Esie.