Read efik MARK 10 Bible Online

MARK 10 - efik bible

MARK 10

¹EKEM Enye adaha ke ebiet oro, edi ke mme adaŋa Judea ye edem Jordan oko; otu owo enyuŋ etɔŋɔ ntak ebono etiene enye: ndien Enye ɔtɔŋ ntak ekpep mmɔ ŋkpɔ, nte akam esinamde.

²Ekem mme Pharisee edi edibup Enye ete, mme enen owo ndisio ŋwan esie ndɔ? man edomo Enye.

³Edi Enye ɔbɔrɔ mmɔ ete, Moses eketeme mbufo nso?

⁴Mmɔ ete, Moses akayak ewet ŋwed usio-ndɔ, ndien esio enye.

⁵Jesus ete mmɔ, Moses ekewet item emi ɔnɔ mbufo oto nsɔŋesit mbufo.

⁶Edi toto ke eritɔŋɔ eribot eke Abasi obotde ŋkpɔ, Enye okobot mmɔ eren ye ŋwan.

⁷Ke ntak emi owo eyekpɔŋ ete esie ye eka esie akadiana ye ŋwan esie:

⁸ndien mmɔ mbiba eyekabare edi obuk kiet: ntre ke mmɔ idige aba owo iba, edi edi obuk kiet.

⁹Mmɔdo se Abasi ama akadian, yak owo okudianare.

¹⁰Ekem ke ufɔk mbet Esie etɔŋɔ ntak ebup Enye ebaha ŋkpɔ emi.

¹¹Ndien enye ɔdɔhɔ mmɔ ete, Owo ekededi eke osiode ŋwan esie, onyuŋ ɔdɔde efen, esin efibe abiat enye:

¹²onyuŋ edieke ŋwan osiode ebe esie, ɔdɔ efen, enye esin efibe.

¹³Ndien eda ŋkpri nditɔ esɔk Enye ete, Enye otuk mmɔ ubɔk: edi mbet Esie esua enɔ mmɔ emi edade mmɔ edi.

¹⁴Edi ke ini Jesus okutde, Enye ayat esit, onyuŋ ete mbet Esie, Eyak ŋkpri nditɔ etiene Mi; ekukpan mmɔ: koro Obio Ubɔŋ Abasi edide eke oruk emi.

¹⁵Ke akpanikɔ ke ndɔhɔ mbufo, Owo ekededi eke midibɔhɔ Obio Ubɔŋ Abasi nte ekpri eyen, ididukke duk ke esit.

¹⁶Ndien Enye emen mmɔ akama, odori mmɔ ubɔk, onyuŋ ɔdiɔŋ mmɔ.

¹⁷Ekem nte Jesus ɔwɔrɔde oduk usuŋ, owo kiet efehe etiene Enye, ɔtɔŋɔ edɔŋ ɔnɔ Enye, onyuŋ obup Enye ete, Eti Andikpep, ndinam nso man nnyene nsinsi uwem?

¹⁸Edi Jesus ete enye, Nsinam afo okotde Mi eti? Enye emi edide eti iduhe, ke mibɔhɔke Kiet, kpa Abasi.

¹⁹Ɔmɔfiɔk mbet, Kuwot owo, Kusin efibe, Kuyip inɔ Kudi ntiense nsu, Kutuk owo, Kpono usɔ ye uka.

²⁰Edi owo oro ɔdɔhɔ Jesus ete, Andikpep, mma nonim kpukpru ŋkpɔ emi toto ke uyen mi.

²¹Edi Jesus owuk enyin ese enye, onyuŋ ama enye, ete, Ŋkpɔ kiet ɔsuhɔ fi; ka kanyam kpukpru se enyenede, yak nɔ mme ubuene, ndien enyenyene inyene ke heaven: nyuŋ di disaŋa ye Ami.

²²Edi iso ɔkpuhɔre enye ke ikɔ oro, enye onyuŋ ɔnyɔŋ ye mfuhɔ: koro edi owo emi enyenede ediwak inyene.

²³Ndien Jesus ɔwɔŋɔre enyin ɔdɔhɔ mbet Esie ete, Ɔsɔŋ adaŋa didie ye mbon-inyene ndiduk ke Obio Ubɔŋ Abasi!

²⁴Edi idem akpa mbet ke ikɔ Esie. Edi Jesus ɔtɔŋɔ ntak ɔbɔrɔ, onyuŋ ɔdɔhɔ mmɔ ete, Nditɔ, ɔsɔŋ adaŋa didie ye mmɔ eke ebuɔtde idem ke inyene ndiduk ke Obio Ubɔŋ Abasi.

²⁵Edi mmem-mmem ŋkpɔ ye camel ndibe ke odudu abiabon, akan owo inyene ndiduk ke Obio Ubɔŋ Abasi.

²⁶Ndien idem ɔdɔdiɔŋ akpa mmɔ, mmɔ enyuŋ edɔhɔ Enye ete, Anie ekeme ndibɔhɔ ndien?

²⁷Jesus owuk enyin ese mmɔ, ete, Owo ikemeke ndinam emi, edi Abasi emekeme: koro Abasi emekeme ndinam kpukpru ŋkpɔ.

²⁸Peter ɔtɔŋɔ ndidɔhɔ Enye ete, Sese, nnyin ikɔkpɔŋ kpukpru ŋkpɔ itiene Fi.

²⁹Jesus ɔdɔhɔ ete, Ke akpanikɔ ke ndɔhɔ mbufo, baba owo kiet iduhe, eke ɔkɔkpɔŋde ufɔk, me nditɔ-eka iren, me nditɔ-eka iban, mme eka, mme ete, me nditɔ,

³⁰me isɔŋ, ke ntak Mi ye ntak gospel, emi midibɔhɔ ŋkpɔ utim ikikie ke emi ke ini emi, me ufɔk, ye nditɔ-eka iren, ye nditɔ-eka iban, ye me eka, ye nditɔ, ye isɔŋ, ikɔrɔ ye ukut: ye nsinsi uwem ke eyo emi edidide.

³¹Edi ediwak mmɔ eke ebemde iso eyekpere edem; mme ekpere edem eyenyuŋ ebe iso.

³²Ekem mmɔ esaŋa ke usuŋ edɔk eka Jerusalem; ndien Jesus ebem mmɔ iso, ndien idem akpa mmɔ: mmɔ emi etienede Enye enyuŋ efehe ndik. Ekem Enye ɔtɔŋɔ ntak ada mbet duopeba esihere ada ŋkaŋ kiet, onyuŋ ɔtɔŋɔ ndisian mmɔ ŋkpɔ eke ediwɔrɔde enɔ Enye, ete,

³³Sese, nnyin imɔŋ idɔk ika Jerusalem; ndien eyeda Eyen Owo eyak enɔ ikpɔ oku ye mme scribe; mmɔ eyenyuŋ ebiom Enye ikpe, ete iwot Enye, eyeyuŋ eyak Enye enɔ mme Gentile:

³⁴ndien mmɔ eyesak Enye nsahi, eyeyuŋ efiari Enye etap, enyuŋ emia Enye, enyuŋ ewot Enye; ndien ke usen ita ema ebe, Enye eyeset ke mkpa.

³⁵Ekem James ye John, nditɔ Zebedee, etiene Enye, enyuŋ edɔhɔ Enye ete, Andikpep, nnyin iyom Afo anam ɔnɔ nnyin ŋkpɔ ekededi eke nnyin idibeŋede Fi.

³⁶Ndien Enye ete mmɔ, mbufo eyom ete nnam nso nnɔ mbufo?

³⁷Mmɔ ete Enye, Nɔ nnyin ete owo nnyin kiet editie Fi ke ubɔk nnasia, kiet eken ke ubɔk ufien, ke Obio Ubɔŋ Fo.

³⁸Edi Jesus ete mmɔ, mbufo ifiɔkke se ebeŋede. Nte mbufo emekeme ndiŋwɔŋ cup emi Ami ŋŋwɔŋde? me ndina baptism emi Ami nnade?

³⁹Mmɔ ete Enye, Nnyin imekeme. Ndien Jesus ete mmɔ, Mbufo eyeŋwɔŋ cup emi Ami ŋŋwɔŋde; mbufo eyenyuŋ ena baptism emi Ami nnade;

⁴⁰edi nditie ke ubɔk nnasia Mi mme ke ufien inyeneke Mi ndinɔ; edi enyene mmɔ emi ekenimde enye enɔ.

⁴¹Ndien ke adaŋemi mbet duop ekopde, esit ɔtɔŋɔ ndiyat mmɔ mbaŋa James ye John.

⁴²Edi Jesus okot mmɔ edi, onyuŋ ɔdɔhɔ mmɔ ete, Mbufo efiɔk ete mmɔ emi owo ebatde nte mme andikara mme Gentile esɔŋ ubɔk ekara mmɔ; ikpɔ owo mmɔ enyuŋ ebre odudu ye mmɔ.

⁴³Edi idige ntre ke otu mbufo: edi owo ekededi eke oyomde ndikabare ŋkpon ke otu mbufo eyedi asaŋutom mbufo;

⁴⁴owo ekededi eke onyuŋ oyomde ndidi ebe-iso ke otu mbufo eyeduk ufin ɔnɔ kpukpru mbufo.

⁴⁵Koro Eyen Owo ke Idem Esie ikedige man enam ŋkpɔ enɔ Enye, edi man Enye anam ŋkpɔ ɔnɔ owo, onyuŋ ɔnɔ uwem Esie ndifak ediwak owo.

⁴⁶Ekem mmɔ edi ke Jericho: ndien nte Enye ɔwɔrɔde ke Jericho ye mbet Esie ye akamba otu owo, Bartimaeus eyen Timaeus, nnan emi ebeŋede ebeŋe, etie ke mben-usuŋ.

⁴⁷Ndien ke ini enye okopde ete edi Jesus eyen Nazareth, enye ɔtɔŋɔ ndifiori ete, Jesus, Afo Eyen David, tua mi mbɔm.

⁴⁸Edi ediwak owo esua enɔ enye, ete enye okibi inua: edi enye ɔdɔdiɔŋ ofiori aka iso ete, Afo Eyen David, tua mi mbɔm.

⁴⁹Ndien Jesus atuak ada, ɔdɔhɔ ete ekot enye edi. Mmɔ ekot nnan oro, ete enye, Sɔŋ esit, daha ke enyɔŋ, Enye ke okot fi.

⁵⁰Edi enye otop ɔfɔŋidem esie ɔduɔk, obumere adaha ke enyɔŋ, editiene Jesus.

⁵¹Jesus ɔbɔrɔ enye ete, Oyom ete nnam nso nnɔ fi? Nnan oro ete Enye, Rabboni, nyom nditɔŋɔ ntak ŋkut usuŋ.

⁵²Jesus ete enye, Ka okuo; mbuɔtidem fo ama anyaŋa fi. Ndien ndo-ndo oro enye okut usuŋ, onyuŋ etiene Enye ke usuŋ.