Read efik MARK 12 Bible Online

MARK 12 - efik bible

MARK 12

¹EKEM Enye ɔtɔŋɔ ndimen ŋke ntiŋ ikɔ ye mmɔ ete,Owo kiet ɔkɔtɔ iŋwaŋ-vine, onyuŋ ɔbɔp ɔkɔ akan enye okuk, onyuŋ otibi obube unyimi-wine, onyuŋ ɔbɔp tower, onyuŋ ayak enye ɔnɔ mme ekpeme-iŋwaŋ, ndien adaha aka idut efen.

²Ekem ke edikem ini enye ɔdɔŋ isuŋutom ke ɔtɔ mme ekpeme-iŋwaŋ, man ɔbɔ ubak mfri iŋwaŋ-vine ke ubɔk mme ekpeme-iŋwaŋ.

³Edi mmɔ oro emum enye, emia enye, enyuŋ enam enye ɔnyɔŋ ubɔk-ubɔk.

⁴Ete-iŋwaŋ onyuŋ osio isuŋutom eŋwen ɔdɔŋ ke ɔtɔ mmɔ; mmɔ enyuŋ enɔ enye unan ke ibuot, enyuŋ enam enye ido esuene.

⁵Enye onyuŋ osio eŋwen ɔdɔŋ, ndien mmɔ ewot enye; enyuŋ enam ntre ye ediwak eŋwen; emia ndusuk, ewot ndusuk.

⁶Enye ke osuk enyene owo kiet, edima eyen. Ndien ke ukperedem ɔdɔŋ enye ke ɔtɔ mmɔ ete, Mmɔ eyeteŋe eyen mi.

⁷Edi mme ekpeme-iŋwaŋ edɔhɔ ke otu idem mmɔ ete, Emi edi andidia-ufɔk. Ekam eyak iwot enye, ndien ŋkpɔ-akpa eyenyene nnyin.

⁸Ekem mmɔ emum enye ewot, enyuŋ esio okpo ke iŋwaŋ-vine, etop eduɔk.

⁹Nso ndien ke ete iŋwaŋ-vine oro edinam? Enye eyedi edisobo mme ekpeme-iŋwaŋ oro, onyuŋ ayak iŋwaŋ-vine ɔnɔ mme ekpeme-iŋwaŋ eŋwen.

¹⁰Nte akanam mbufo ikotke kpa ikɔ emi ewetde ete, Itiat emi mme ɔbɔp-ufɔk esinde Amakabare edi etubom inuk;

¹¹Emi oto Jehovah, Nnyin inyuŋ ise enye ke utibe.

¹²Ndien mmɔ eyom ndimum Enye, edi mmɔ efehe otu owo; koro mmɔ efiɔkde ete, Enye ama otop ŋke emi adian mme imɔ. Mmɔ enyuŋ ekpɔŋ Enye enyɔŋɔ.

¹³Ekem mmɔ esio ndusuk mme Pharisee ye mme Herodian edɔŋ ke ɔtɔ Esie, man mmɔ ekpemum Enye ikɔ-inua.

¹⁴Ke ini mmɔ edide, edɔhɔ Enye ete, Andikpep, nnyin imɔfiɔk ite Afo edi akpanikɔ, unyuŋ ukereke owo; koro Afo uteŋeke owo enyin, edi ekpep owo usuŋ Abasi ke akpanikɔ. Nte enen ndinɔ Caesar utomo, mme inenke? Nte nnyin inɔ, mme ikunɔ?

¹⁵Edi Enye okut mbubik mmɔ, onyuŋ ɔdɔhɔ mmɔ ete, Nsinam mbufo edomode Mi? Eda okuk utomo esɔk Mi nse.

¹⁶Mmɔ eda edi. Ekem Enye ɔdɔhɔ mmɔ ete, Mbiet emi ye ŋwed emi enyene anie? Mmɔ ete Enye, Enyene Caesar.

¹⁷Jesus ete mmɔ, Enɔ Caesar se inyenede Caesar, enyuŋ enɔ Abasi se inyenede Abasi. Ndien akpa mmɔ idem eti-eti ye Enye.

¹⁸Ekem mme Sadducee, emi edɔhɔde ete eriset ke mkpa iduhe, etiene Enye, ebup Enye ete,

¹⁹Andikpep, Moses ekewet ɔnɔ nnyin ete, Edieke eyen-ete owo akpade ɔkpɔŋ ŋwan, edi mibonke eyen, yak owo oro emen ŋwan eyen-ete esie ɔdɔ, onyuŋ asiak ubon ɔnɔ eyen-ete esie.

²⁰Nditɔ ete itiaba ekedu. Akpa ada ŋwan ɔdɔ akpa, ibonke eyen.

²¹Udiana onyuŋ emen enye ɔdɔ, onyuŋ akpa, ibonke eyen,

²²Ɔyɔhɔ ita anam kpasuk ntre. Mmɔ mbitiaba inyuŋ ibonke eyen. Ke akpatre ŋwan oro nde akpa.

²³Ke eriset ke mkpa enye eyedi ŋwan anie ke otu mmɔ mbitiaba? Ke emi mmɔ mbitiaba ema ekɔdɔ enye.

²⁴Jesus ɔdɔhɔ mmɔ ete, Nte idige ntak emi esinde mbufo edue, emi mbufo mifiɔkke ŋwed Abasi ye odudu Abasi?

²⁵Koro ke adaŋemi owo esetde ke mkpa, mmɔ idɔhɔ ndɔ, inyuŋ idaha mmɔ inɔ ndɔ, edi mmɔ etie nte mme angel emi edude ke heaven.

²⁶Edi kabaŋa mme akpa-mkpa, nte enamde mmɔ eset; nte mbufo ikokotde ke ŋwed Moses, ke itie emi etiŋde abaŋa eto, ite Abasi ɔkɔdɔhɔ enye ete, Ami ndi Abasi Abraham, ye Abasi Isaac, ye Abasi Jacob.

²⁷Enye idige Abasi mme akpa-mkpa, edi eke mme odu-uwem. Mbufo emedue eti-eti.

²⁸Ekem owo kiet ke otu mme scribe edi, onyuŋ okop nte mmɔ enenide eneni ye kiet eken; ndien ke ini enye; ɔfiɔkde ete Jesus ama otim ɔbɔrɔ mmɔ, enye obup Jesus ete, Ewe edi ebe-iso item ke ofuri ibet?

²⁹Jesus ɔbɔrɔ ete, Ebe-iso edi, Ekop O Israel, Jehovah Abasi nnyin, edi Jehovah kiet.

³⁰Afo nyuŋ ma Jehovah Abasi fo ke ofuri esit fo, ye ke ofuri ukpɔŋ fo, ye ke ofuri ekikere fo, ye ke ofuri odudu fo.

³¹Udiana -akpa edi emi, Ma mbiɔhiduŋ fo nte idem fo.

³²Ibet eŋwen eke okponde akan mmɔ emi iduhe. Ndien scribe oro ɔdɔhɔ Enye ete, Ke akpanikɔ, Andikpep, omotim etiŋ ete Abasi edi kiet; efen inyuŋ iduhe ke mibɔhɔke Enye:

³³ndien owo ndima Enye ke ofuri esit, ye ke ofuri asian ye ke ofuri odudu, ndinyuŋ mma mbɔhiduŋ esie nte idem esie omotim okpon akan kpukpru erifɔp enɔ ye uwa.

³⁴Ndien ke ini Jesus okutde ete enye ɔbɔrɔ ɔniɔŋ-ɔniɔŋ, ete enye, Afo uyomke usuŋ ye Obio Ubɔŋ Abasi. Ndien ke oro ebede, baba owo kiet idehede ibup Enye aba mbume kiet.

³⁵Ekem nte Jesus ekpepde mmɔ ŋkpɔ ke temple, Enye ɔbɔrɔ ete, Nsinam mme scribe edɔhɔde ete Christ edi eyen David?

³⁶David ke idem esie etiŋ ke Edisana Spirit, ete, Jehovah ɔdɔhɔ Ɔbɔŋ mi ete, Tie Mi ke ubɔk nnasia, Tutu nda mme usua Fo nnim Fi ke udorukot.

³⁷David ke idem esie okot Enye, ete, Ɔbɔŋ, didie ndien ke Enye edi Eyen esie? Ndien mbio-obio ekop ikɔ Esie ye idaresit.

³⁸Ke ukpep-ŋkpɔ Esie Enye ɔdɔhɔ ete, Ekpeme idem mbufo ye mme scribe, emi emade ndisaŋa ye nduɔ-nduɔ ɔfɔŋidem, ndinyuŋ mbɔ ekɔm ke aŋwa-urua,

³⁹ye ikpɔ itie ke mme synagogue, ye itie ukpono ke udia;

⁴⁰mmɔ emi ediade ufɔk mme ebe-akpa, enyuŋ ebɔŋde nyan akam ke mbubik: mmɔ eyebɔ ubiom-ikpe eke okponde akan.

⁴¹Ekem Enye ɔsuhɔre etetie ekem iso ye usin-etibe, onyuŋ okut nte otu owo esinde okuk ke usin-etibe; ediwak mbon inyene enyuŋ esin ediwak okuk.

⁴²Edi ubuene ebe-akpa kiet edi, esin ŋkpri okudɔk iba, eke edide farthing kiet.

⁴³Ndien Enye okot mbet Esie edi, onyuŋ ɔdɔhɔ mmɔ ete, Ke akpanikɔ ke ndɔhɔ mbufo nte, Ubuene ebe-akpa emi ama esin akan kpukpru mmɔ emi ekesinde okuk ke usin-etibe.

⁴⁴Koro kpukpru mmɔ ekosiode ŋkpɔ ke nyɔhɔ-nsuhɔ, mmɔ esin; edi enye ama osio kpukpru se enye enyenede ke unana esie ɔnɔ, kpa ofuri se enye akpadade odu uwem.