Read efik MARK 13 Bible Online

MARK 13 - efik bible

MARK 13

¹EKEM nte Enye ɔwɔrɔde ke temple, owo kiet ke otu mbet Esie ɔdɔhɔ Enye ete, Andikpep, sese, itiat, emi ye mme ufɔk emi emokpon adaŋa didie.

²Jesus ete enye, Nte omokut ikpɔ ufɔk emi? Idikpɔŋke itiat kiet ke enyɔŋ itiat efen eke mididorokere enye iduɔk.

³Ekem nte Enye etiede ke Obot Olive ekem iso ye temple, Peter ye James ye John ye Andrew ebup Enye ke idem mmɔ ete, Sian nnyin ini eke mme ŋkpɔ emi edidide;

⁴nso idinyuŋ idi idiɔŋɔ ke ini mme ŋkpɔ emi kpukpru eyomde ndisu?

⁵Edi Jesus ɔtɔŋɔ ndidɔhɔ mmɔ ete, Ekpeme mbak owo baba kiet edida mbufo ewaha ɔkpɔŋ usuŋ.

⁶Ediwak owo eyedi ke enyiŋ Mi, ete, Ami ndi Enye; eyenyuŋ eda ediwak owo ewaha ekpɔŋ usuŋ.

⁷Edi adaŋemi mbufo edikopde ebaŋa ekɔŋ ye etop ekɔŋ, ekuyak esit etimere mbufo; mme ŋkpɔ emi enyene ndiwɔrɔ, edi idige utit kaŋa

⁸Koro idut eyedaha aŋwana ye idut, obio edidem kiet eyenyuŋ adaha aŋwana ye obio edidem efen, unyek-isɔŋ eyenyuŋ edu ke nsio-nsio ebiet; akaŋ eyedu: mme ŋkpɔ emi edi ntɔŋɔ ubiak-uman.

⁹Edi mbufo ekpeme idem mbufo; koro eyeyak mbufo esin ke ubɔk esop, eyenyuŋ emia mbufo ke mme synagogue; mbufo eyenyuŋ eda ke iso mme andikara ye ndidem kabaŋa Mi, man edi ntiense enɔ mmɔ.

¹⁰Ndien enyene ndibem iso ŋkwɔrɔ gospel nnɔ kpukpru mme idut.

¹¹Ndien ke ini edidade mbufo eyak enɔ ikpe, ekubem iso etimere esit ekere ebaŋa se mbufo editiŋde, edi ikɔ ekededi eke edinɔde mbufo idaha oro mbufo etiŋ. Koro idige mbufo etiŋ, edi Edisana Spirit.

¹²Ndien eyen-eka eyeda eyen-eka esie ɔnɔ mkpa, ete eyenyuŋ ada eyen ɔnɔ, nditɔ eyenyuŋ edaha eŋwana ye mme ete ye mme eka enyuŋ esin ewot mmɔ.

¹³Kpukpru owo eyenyuŋ esua mbufo kabaŋa enyiŋ Mi. Edi eyenyaŋa owo eke edimede ime tutu osim akpatre.

¹⁴Edi ke adaŋami mbufo edikutde ŋkpɔ mbubiam nsobo nte adade ke ɔtɔ eke mikpadaha (yak owo eke okotde ŋwed otim ɔfiɔk), adaŋoro yak mmɔ emi edude ke Judaea efeŋe eka ikpo obot;

¹⁵yak owo eke odude ke enyɔŋ ufɔk okusuhɔre oduk ekemen ŋkpɔ ekededi eke odude ke ufɔk esie;

¹⁶yak owo eke odude ke iŋwaŋ okunyuŋ afiak aka ufɔk ekemen ekura esie.

¹⁷Edi mbɔm mmɔ emi eyomode ye mmɔ emi enɔde nditɔ eba ke mme usen oro.

¹⁸Edi ekpe ubɔk ete okudi ke ini ukwɔ.

¹⁹Koro mme usen oro edidi mme usen ukut, eke oruk oro akanam miduhe toto Abasi ɔkɔtɔŋɔ ndibot ŋkpɔ tutu osim emi, midinyuŋ iduhe aba.

²⁰Koro mikpedige nte Ɔbɔŋ ama esibe mme usen oro emuhɔ, baba owo kiet ikpɔbɔhɔke: edi kabaŋa ndimek ikɔt Esie, emi Enye emekde, Enye ama esibe mme usen oro emuhɔ.

²¹Ke ini oro, edieke owo ɔdɔhɔde mbufo ete, Sese, Christ mmɔmi, me, sese, Enye mmɔko;

²²ekunim ke akpanikɔ; mme Christ nsu ye mme prophet nsu eyewɔrɔ edi, eyenyuŋ ewut mme idiɔŋɔ ye mme utibe ŋkpɔ, man, edieke mmɔ ekpekemede, eda ndimek ikɔt Abasi ekpɔŋ usuŋ.

²³Edi mbufo ekpeme: sese, mmebem iso ntiŋ kpukpru ŋkpɔ do nnɔ mbufo.

²⁴Edi ke mme usen oro ke ini ukut oro ama ebe, utin eyekabare okim,

²⁵ɔfiɔŋ idinyuŋ inɔŋɔ uŋwana esie, mme ntantafiɔŋ eyeyuŋ eto ke ikpa-enyɔŋ eduɔŋɔ, eyenyuŋ enyeŋe mme odudu ikpa-enyɔŋ.

²⁶Adaŋoro mmɔ eyekut Eyen Owo odorode ke obubit enyɔŋ edi ye akwa odudu ye ubɔŋ.

²⁷Ndien Enye eyesio mme angel ɔdɔŋ editaŋ ndimek ikɔt Esie eto ke ikpehe ofim mbinaŋ ebon ɔtɔ kiet, ɔtɔŋɔde ke ata utit isɔŋ tutu osim ata utit ikpa-enyɔŋ.

²⁸Edi ekpep ŋke ke eto fig. Ke ini ŋkɔk esie ama akabare esehe, onyuŋ asiahade ikɔŋ, mbufo efiɔk ete ndaeyo ke ekpere.

²⁹Kpasuk ntre mbufo ŋko, ke ini ekutde nte ŋkpɔ emi etibede, efiɔk ete Enye ke ekpere, odu ke enyin-usuŋ.

³⁰Ke akpanikɔ ke ndɔhɔ mbufo, emana emi idibehe ifep tutu kpukpru ŋkpɔ emi ewɔrɔ esu.

³¹Enyɔŋ ye isɔŋ eyebe efep, edi ikɔ Mi idibehe ifep.

³²Edi baba owo kiet ifiɔkke ibaŋa usen oro mme hour oro, kpa mme angel ke heaven, Eyen inyuŋ ifiɔkke, ibɔhɔke Ete ikpɔŋ.

³³Mbufo etiŋ enyin ese, ekpeme, enyuŋ ebɔŋ akam; koro mbufo mifiɔkke edikem ini.

³⁴Etie nte owo ɔkpɔŋde ufɔk esie aka akadaŋ ke idut efen, onyuŋ ɔnɔ mme anam utom esie odudu, ɔnɔ owo kiet kiet utom esie, onyuŋ ɔdɔhɔ etie-usuŋ ŋko ete etie ekpeme.

³⁵Mbufo ekpeme ndien; koro mbufo mifiɔkke ini eke ete-ufɔk edidide, me ke mbubreyo, me ke ufɔt okoneyo, me ke ini ekikɔ ɔkpɔkde, me ke usiere;

³⁶mbak enye edidi ke mbuat edikut mbufo nte edede.

³⁷Se ndɔhɔde mbufo, mmonyuŋ ndɔhɔ kpukpru owo nte, Ekpeme.