Read efik MARK 14 Bible Online

MARK 14 - efik bible

MARK 14

¹EDI osuk usen iba edisim usɔrɔ passover ye uyo eke leaven miduhe: ndien ikpɔ oku ye mme scribe ke eyom usuŋ nte mmɔ edimumde Enye ke ŋkari ewot.

²Koro mmɔ edɔhɔde ete, Ikunam ke ini usɔrɔ, mbak ndutime edidu ke otu mbio-obio.

³Ekem ke ini Enye odude ke Bethany ke ufɔk Simon, ɔdɔŋɔ akpa-mfia, nte Enye etiede ke itie-udia, ŋwan kiet akama otu alabaster, eke esinde ata ɔsɔŋ-urua ufuɔŋkpɔ spikenard ke esit, edi; ndien enye obom otu oro, onyuŋ ɔtɔhɔ Enye ufuɔŋkpɔ ke ibuot.

⁴Edi ndusuk owo edu do emi eyatde esit ke otu idem mmɔ, ete, Ebiat ŋkpɔ emi ebaŋa nso?

⁵Koro ekpekeme ndinyam ufuɔŋkpɔ emi ke okuk eke ebede ikie ita, nda nnɔ mme ubuene. Mmɔ enyuŋ esuk ŋwan oro uyo.

⁶Edi Jesus ete, Ekpɔŋ enye; nsinam efinade enye? enye akanam eti utom ke idem Mi.

⁷Koro mbufo emenyene mme ubuene ye mbufo kpukpru ini, ndien ini eke emama, mbufo ekeme ndifɔn ido ye mmɔ, edi mbufo inyeneke Mi kpukpru ini.

⁸Enye akanam se ekemede; enye ebem iso eyet Mi ufuɔŋkpɔ ke idem ebeŋe ini eribuk Mi.

⁹Ke akpanikɔ ke ndɔhɔ mbufo, Ebiet ekededi eke edikwɔrɔde gospel ke ofuri ererimbot, eyenyuŋ etiŋ se ŋwan emi akanamde, ndida nti enye.

¹⁰Ekem Judas Iscariot, owo kiet ke otu mbet duopeba, adaha aka eketiene ikpɔ oku, man ada Enye ayak ɔnɔ mmɔ.

¹¹Ndien ke ini mmɔ ekopde, mmɔ edat esit, enyuŋ eŋwɔŋɔ ndinɔ enye okuk. Ndien enye oyom nte enye edisaŋade okut ifet ndida Enye nyak nnɔ mmɔ.

¹²Ekem ke akpa usen usɔrɔ uyo eke leaven miduhe, emi ewotde passover, mbet Esie edɔhɔ Enye ete, Oyom nnyin ika ikotim ŋkpɔ ke mmɔŋ, man Afo adia passover?

¹³Ndien Enye osio mbet Esie iba ɔdɔŋ, ete mmɔ, Eduk ke obio, ndien owo kiet, emi obiomde abaŋ mmɔŋ, eyesobo mbufo: etiene enye.

¹⁴Ndien ke ebiet eke enye odukde, edɔhɔ enyene-ufɔk oro ete, Andikpep ete, Ubet isen eke Mi odu mmɔŋ, emi ndidiade passover ke esit ye mbet Mi?

¹⁵Ekem enye eyewut mbufo akwa ubet enyɔŋ, emi ekediɔŋde ebeŋe enim: mbufo etim ŋkpɔ do ebeŋe nnyin.

¹⁶Ndien mbet oro ewɔŋɔ, eka ekeduk ke obio, enyuŋ ekut kpa nte Jesus ɔkɔdɔhɔde mmɔ; mmɔ enyuŋ etim passover ebeŋe.

¹⁷Ndien ke mbubreyo Enye asaŋa ye mbet duopeba edi.

¹⁸Ndien nte mmɔ etiede edia ŋkpɔ, Jesus ete, Ke akpanikɔ ke ndɔhɔ mbufo, owo kiet ke otu mbufo eyeda Mi ɔnɔ kpa owo eke adiade ŋkpɔ ye Ami.

¹⁹Mmɔ etɔŋɔ ndifuhɔ, ndinyuŋ ndɔhɔ Enye kiet kiet ete, Ndi ami ke edi?

²⁰Edi Enye ete mmɔ, Edi, owo kiet ke otu mbufo mboduopeba, owo emi edebide udia ke usan ye Ami.

²¹Koro Eyen Owo ɔmɔŋ ɔnyɔŋ kpa nte ekewetde ebaŋa Enye; edi eyedɔdiɔk ɔnɔ owo oro adade Eyen owo ɔnɔ; ɔkpɔfɔn ye owo oro nte enye mikamanake.

²²Ekem nte mmɔ ediade, Enye emen uyo, ndien ke ama ɔkɔdiɔŋ, obuŋ onyuŋ ɔnɔ mmɔ, ete, Ebɔ: emi edi ikpɔhidem Mi.

²³Enye onyuŋ emen cup, ndien ke Enye ama ɔkɔnɔ ekɔm, ayak ɔnɔ mmɔ kpukpru mmɔ enyuŋ eŋwɔŋ.

²⁴Ndien Enye ɔdɔhɔ mmɔ ete, Emi edi iyip Mi, eke ediomi, emi eduɔkde kabaŋa ediwak owo.

²⁵Ke akpanikɔ ke ndɔhɔ mbufo, ndiŋwɔŋke aba mfri vine, tutu osim usen oro ndiŋwɔŋde enye obufa ke Obio Ubɔŋ Abasi.

²⁶Ekem ke mmɔ ema ekwɔ ikwɔ, mmɔ ewɔŋɔ eka ke Obot Olive.

²⁷Ndien Jesus ɔdɔhɔ mmɔ ete, Kpukpru mbufo eyeduɔŋɔ ke idomo; koro ewetde ete, Nyewot ekpemerɔŋ, ndien erɔŋ eyesuana.

²⁸Edi ke mma nset ke mkpa, nyebem mbufo iso ŋka ke Galilee.

²⁹Edi Peter ɔdɔhɔ Enye ete, Kpukpru owo ekpɔduɔŋɔ, ami ndiduɔhɔ.

³⁰Edi Jesus ɔdɔhɔ enye ete, Ke akpanikɔ ke ndɔhɔ fi nte, Mfin emi, kpa ke okoneyo emi, ke ini ekikɔ mikpɔkke kaŋa utim ikaba, afo eyekaŋ Mi utim ikata.

³¹Edi enye obumere ɔsɔŋ uyo etiŋ ete, Akpanana nte ŋkpa ye Afo, ndikaŋke Fi. Kpukpru mmɔ enyuŋ edɔhɔ kpa ntre.

³²Ndien mmɔ edi ke ebiet emi ekerede Gethsemane; Enye onyuŋ ɔdɔhɔ mbet Esie ete, Mbufo etie mi, ke ini mbɔŋde akam.

³³Ndien Enye ada Peter ye James ye John adian idem, idem onyuŋ ɔtɔŋɔ ndikpa Enye, Enye onyuŋ odu ke nnanenyin.

³⁴Enye onyuŋ ɔdɔhɔ mmɔ ete, Ukpɔŋ Mi ɔfuhɔ eti-eti tutu ekpere mkpa; mbufo etie mi ekpeme.

³⁵Ndien Enye aka ke iso esisit, ɔduɔ ke isɔŋ, onyuŋ ɔbɔŋ akam ete, Edieke usuŋ odude, eyak hour oro ɔkpɔŋ Imɔ.

³⁶Enye onyuŋ ɔdɔhɔ ete, Abba, Ete, Afo emekeme ndinam kpukpru ŋkpɔ: men cup ke iso Mi fep: edi okudi nte Ami nnyimede, edi nte Afo onyimede.

³⁷Ndien Enye edi edikut nte mmɔ edede, onyuŋ ɔdɔhɔ Peter ete, Simon, nte ede idap? Nte ukemeke nditie ŋkpeme hour kiet?

³⁸Ekpeme enyuŋ ebɔŋ akam, mbak mbufo ediduk ke idomo.

³⁹Ke akpanikɔ spirit ɔsɔp, edi obukidem edi mmem-mmem. Enye ɔtɔŋɔ ntak afiak aka ɔkɔbɔŋ akam, etiŋ kpasuk ikɔ oro.

⁴⁰Enye afiak edi edikut nte mmɔ edede, koro enyin etiede mmɔ idap-idap, mmɔ inyuŋ ifiɔkke se ekpɔbɔrɔde Enye

⁴¹Ekem Enye edi ɔyɔhɔ utim ikata, ɔdɔhɔ mmɔ ete, Edɔdiɔŋ ede idap ndien, enyuŋ eda nduɔk-odudu. Ekem adaŋoro; ini oro ama edi; ema eda Eyen Owo esin mme idiɔk owo ke ubɔk.

⁴²Edaha ke enyɔŋ, nnyin inyɔŋ. Sese, owo eke adade Mi ɔnɔ ke ekpere.

⁴³Ekem idaha oro, ke adaŋemi Enye osuk etiŋde ntem, Judas, owo kiet ke otu mbet duopeba, edi; otu owo eke etode ke ikpɔ oku ye mme scribe ye mbiowo, enyuŋ esaŋa ye enye ye ofut ye eto ke ubɔk.

⁴⁴Ndien andida Enye nnɔ ɔkɔnɔ mmɔ idiɔŋɔ, ete, Owo emi nditimde Enye inua edi Enye; emum Enye, eda Enye edaha suŋ-ŋ.

⁴⁵Ndien enye edi, etiene Jesus ini kiet, ete, Rabbi, onyuŋ otim Enye inua.

⁴⁶Ndien mmɔ edori Enye ubɔk emum Enye.

⁴⁷Edi owo kiet ke otu mmɔ emi edade ekpere adabare ofut ekpi owo akwa oku, osibe enye utɔŋ.

⁴⁸Ndien Jesus ɔbɔrɔ mmɔ ete, Nte mbufo emewɔŋɔ edi ye ofut ye eto ke ubɔk ndimum Mi, nte ŋkpɔ eke ebinede owo ŋwo?

⁴⁹Mma ndu ye mbufo ke temple ŋkpep ŋkpɔ ke usen ke usen, edi mbufo imumke Mi. Edi enam emi man se ewetde ɔkpɔwɔrɔ osu.

⁵⁰Ndien kpukpru mbet ekpɔŋ Enye efeŋe.

⁵¹Ndien akparawa kiet, emi esinede ɔfɔŋ linen ke idem ofuk iferi, etiene Enye aka: mmɔ enyuŋ emum enye.

⁵²Edi enye ɔkpɔŋ ɔfɔŋ linen mmɔ ke ubɔk, efehe iferi.

⁵³Ekem mmɔ eda Jesus edaha ke ufɔk akwa oku; kpukpru ikpɔ oku ye mbiowo ye mme scribe ema ebono ye enye do.

⁵⁴Peter onyuŋ etiene Jesus nsan-nsan, tutu oduk ke idem esit okure akwa oku, onyuŋ etetie ye mme asaŋutom akwa oku ewebe ikaŋ.

⁵⁵Edi ikpɔ oku ye ofuri esop eyom ikɔ-ntiense edian Jesus, man ewot Enye, edi ikwe.

⁵⁶Koro ediwak owo emen ikɔ-ntiense nsu edian Enye, edi ikɔ-ntiense mmɔ isaŋake kiet.

⁵⁷Ekem ndusuk owo edaha eda, etiŋ nsu edian Enye ete,

⁵⁸Nnyin ikokop nte Enye ɔdɔhɔde ete, Nyewuri temple emi edade ubɔk ebɔp, ndien ke usen ita nyebɔp efen emi midaha ubɔk ibɔp.

⁵⁹Ndien kpa ke oro, ikɔ-ntiense mmɔ isaŋake kiet.

⁶⁰Ekem akwa oku adaha ke enyɔŋ ke ufɔt esop, obup Jesus ete, Nte ubɔrɔke ikɔ? Nso idi emi eke mmɔ oro etiŋde edian Fi?

⁶¹Edi Jesus isioroke uyo, ibɔrɔke bɔrɔ. Akwa oku ɔtɔŋɔ ntak obup Enye ete, Nte Afo edi Christ, Eyen Andinyene-itoro?

⁶²Jesus ete, enye, Ndi Enye; mbufo eyenyuŋ ekut nte Eyen Owo etiede ke ubɔk nnasia Odudu, onyuŋ edide ke ikpa-enyɔŋ heaven.

⁶³Edi akwa oku awai ɔfɔŋidem esie, onyuŋ ɔdɔhɔ ete, Nnyin iyom nso aba ye ntiense?

⁶⁴Mbufo emekop ikɔ esuene emi Enye etiŋde. Mbufo ese didie? Kpukpru mmɔ ebiom Enye ikpe ete, Enye odot mkpa.

⁶⁵Ekem ndusuk mmɔ etɔŋɔ nditɔ Enye etap, ndinyuŋ mfuk iso Esie, nnyuŋ ntuai Enye, nnyuŋ ndɔhɔ Enye ete, Tiŋ nte prophet: mme asaŋutom enyuŋ ebɔ Enye ke ubɔk mmɔ oro ye ufia.

⁶⁶Ekem nte Peter odude ke isɔŋ ke esit okure, eyen-aŋwan akwa oku edi;

⁶⁷ndien ke ini enye okutde Peter nte ewebede ikaŋ, owuk enyin ese enye, ete, Afo nde okodu ye owo Nazareth emi, kpa Jesus.

⁶⁸Edi enye akaŋ ete, Ndiɔŋɔke, nnyuŋ mfiɔkke se ikɔ fo ɔwɔrɔde: ekem Peter ɔwɔrɔ oduk ke ɔtɔ otop; ndien ekikɔ ɔkpɔk.

⁶⁹Aŋwan oro onyuŋ okut enye, onyuŋ ɔtɔŋɔ ntak ɔdɔhɔ mmɔ emi edade ekpere, ete, Emi edi owo kiet ke otu mmɔ.

⁷⁰Edi enye ɔtɔŋɔ ntak akaŋ. Ndien ke ekpri ini ebede, mmɔ emi edade ekpere edɔhɔ Peter ete, Ke akpanikɔ afo edi owo kiet ke otu mmɔ, koro afo edi owo Galilee.

⁷¹Edi enye ɔtɔŋɔ ndisioŋo ikɔ-isuŋi ndinyuŋ ntomo ete, Ndiɔŋɔke owo oro mbufo etiŋde ebaŋa.

⁷²Ndien idaha oro ekikɔ ɔkpɔk utim ikaba. Peter onyuŋ eti ikɔ oro Jesus eketiŋde ɔnɔ enye, ete, Ke ini ekikɔ mika-ikpɔkke kaŋa utim ikaba, afo eyekaŋ Mi utim ikata. Ndien ke ini enye ekerede ŋkpɔ emi, enye atua eyet.