Read efik MARK 2 Bible Online

MARK 2 - efik bible

MARK 2

¹EKEM ke ini Enye ɔtɔŋɔde ntak oduk ke Capernaum ke ndusuk usen ema ekebe, etop asuana ete Enye odu ke ufɔk.

²Ndien ediwak owo edibono ke ɔtɔ Esie, tutu ufaŋ iduhe inɔ mmɔ, kpa ke enyin-usuŋ ufɔk: Enye onyuŋ etiŋ ikɔ ɔnɔ mmɔ.

³Ndien owo edi edida ɔdɔŋɔ-akpa-ubeŋ, emi owo inaŋ ebiomde, esɔk Enye.

⁴Edi sia mmɔ mikemeke ndida enye ŋkpere Jesus ke ntak otu owo, mmɔ ekibɔre ɔkɔm ufɔk ke ebiet eke Enye etiede: ndien ke mmɔ ema esiak ɔkɔm, mmɔ esuhɔre mbri emi ɔdɔŋɔ-akpa-ubeŋ anade ke esit.

⁵Ndien ke ini Jesus okutde mbuɔtidem mmɔ, Enye ɔdɔhɔ ɔdɔŋɔ-akpa-ubeŋ ete, Eyen Mi, emefen mme idiɔk-ŋkpɔ fo.

⁶Edi ndusuk mme scribe etie do eneni ke esit mmɔ ete,

⁷Nsinam owo emi etiŋde ikɔ ke usuŋ emi? Enye ke osuŋi Abasi: anie ekeme ndifen mme idiɔk-ŋkpɔ ke mibɔhɔke kiet, kpa Abasi?

⁸Edi idaha oro Jesus ɔfiɔk ke spirit Esie ete mmɔ eneni ntre ke esit mmɔ, onyuŋ ɔdɔhɔ mmɔ ete, Nsinam mbufo enenide ŋkpɔ emi ke esit mbufo?

⁹Ewe emem akan, mme ndidɔhɔ ɔdɔŋɔ-akpa-ubeŋ ete, Emefen mme idiɔk-ŋkpɔ fo; me ndidɔhɔ enye ete, Daha ke enyɔŋ, men mbri fo, nyɔŋ?

¹⁰Edi man mbufo efiɔk ete, Eyen Owo enyene odudu ke isɔŋ ndifen mme idiɔk-ŋkpɔ (Enye ɔdɔhɔ ɔdɔŋɔ-akpa-ubeŋ ete),

¹¹Ndɔhɔ fi nte, Daha ke enyɔŋ, men mbri fo, nyɔŋ ufɔk.

¹²Ekem owo oro adaha ke enyɔŋ, emen mbri esie ini kiet, onyuŋ asaŋa ɔwɔrɔ ke iso mmɔ kpukpru: esin idem akpa mmɔ kpukpru, mmɔ enyuŋ etoro Abasi ete, Akananam nnyin ikwe oruk ŋkpɔ emi.

¹³Ekem Jesus ɔtɔŋɔ ntak ɔwɔrɔ aka ke mben inyaŋ: ndien ofuri otu owo etiene Enye, Enye onyuŋ ekpep mmɔ ŋkpɔ.

¹⁴Ndien nte Enye asaŋade ebe, Enye okut Levi eyen Alphaeus etiede ke itie ubɔ-utomo, onyuŋ ɔdɔhɔ enye ete, Tiene Mi. Levi onyuŋ adaha ke enyɔŋ etiene Enye.

¹⁵Edikem, Jesus ke etie ke itie-udia ke ufɔk Levi, ediwak mme publican ye mme idiɔk-owo enyuŋ esuhɔre etetie ye Enye ye mbet Esie; koro mmɔ ewakde, mmɔ enyuŋ etiene Enye.

¹⁶Ndien ke ini mme scribe, emi etode ke otu mme Pharisee, ekutde nte Enye adiade ŋkpɔ ye mme publican ye mme idiɔk-owo, mmɔ edɔhɔ mbet Esie ete, Enye adia onyuŋ; oŋwɔŋ ŋkpɔ ye mme publican ye mme idiɔk-owo.

¹⁷Edi ke adaŋemi Jesus okopde, Enye ete mmɔ, Mmɔ emi enyenede nsɔŋidem iyomke abia-ibɔk, edi mmɔ emi edɔŋɔde eyom: ŋkedige ndikot ndinen owo, edi mme idiɔk owo.

¹⁸Ndien mbet John ye mme Pharisee ke etre udia: mmɔ enyuŋ etiene Enye, edɔhɔ Enye ete, Nsidi ntak eke mbet John ye eke mme Pharisee etrede udia, edi mbet Fo mitreke?

¹⁹Ndien Jesus ɔdɔhɔ mmɔ ete, Nte nditɔ ufɔk-ndɔ ekeme nditre udia ke ini ebendɔ odude ye mmɔ? adaŋa ini nte mmɔ enyenede ebe-ndɔ ye mmɔ, mmɔ ikemeke nditre udia.

²⁰Edi mme usen eyedi eke edibɔde mmɔ ebe-ndɔ; ndien mmɔ eyetre udia ke usen oro.

²¹Baba owo kiet idaha ubak ɔfɔŋ eke midiɔŋke ikim idian ye akani ɔfɔŋidem: ama anam ntre, se edade esiri nde akani ɔfɔŋ akabare awak enye, obufa awak akani, onyuŋ anam awaha ɔdiɔk akan.

²²Baba owo kiet inyuŋ isinke obufa wine ke ŋkani ikpa: ama anam ntre, wine eye-siak ikpa, ɔduɔhɔ, atak, ikpa enyuŋ ebiara ŋko: edi esin obufa wine ke mbufa ikpa.

²³Edikem, Enye asaŋa ebe ke iŋwaŋ ibokpot ke usen sabbath; ndien mbet Esie etɔŋɔ ndikibi ibokpot nte mmɔ esaŋade.

²⁴Ndien mme Pharisee ete Enye, Sese, nsidi ntak eke mmɔ enamde se minenke ke usen sabbath?

²⁵Edi Jesus ɔdɔhɔ mmɔ ete, Nte akanam mbufo ikotke se David akanamde, ke ini enye odude ke unana, onyuŋ okopde biɔŋ, kpa enye ye mmɔ emi edude ye enye?

²⁶nte enye odukde ke ufɔk Abasi, ke ini Abiathar edide akwa oku, onyuŋ adiade uyo-iso-Abasi, eke minenke owo ndidia, ke mibɔhɔke mme oku; ye nte emende ɔnɔ mmɔ emi edude ye enye ŋko?

²⁷Ndien Jesus ɔdɔhɔ mmɔ ete, Ekanam usen sabbath enɔ owo, inamke owo inɔ usen sabbath;

²⁸ntre ke Eyen Owo edi Ɔbɔŋ kpa sabbath.