Read efik MARK 3 Bible Online

MARK 3 - efik bible

MARK 3

¹EKEM Enye ɔtɔŋɔ ntak oduk ke synagogue: ndien owo emi ubɔk esie akpade odu do.

²Ndien mmɔ ekpeme Enye, mme Enye eyenam udɔŋɔ okure owo oro ke sabbath; kpaŋ mmɔ ekpodori Enye ikɔ.

³Edi Enye ɔdɔhɔ owo oro ubɔk esie akpade ete, Wɔrɔ di, da mi ke ufɔt.

⁴Ekem Enye ɔdɔhɔ mmɔ ete, Nte enen ndinam ufɔn ke sabbath, me ndinam idiɔk? ndinyaŋa uwem owo, me ndiwot? Edi mmɔ edodop.

⁵Ndien ke ini Enye ama akasuan enyin ese mmɔ ke iyaresit, koro nsɔŋesit mmɔ anamde Enye mfuhɔ, Enye ɔdɔhɔ owo oro ete, Nyanare ubɔk fo. Enye anyanare ubɔk: ubɔk esie onyuŋ akabare ɔfɔn.

⁶Edi mme Pharisee ewɔŋɔ ekeduk odu idaha oro ye mme Herodian ebaŋa Enye, eyom usuŋ nte mmɔ edisaŋade ewot Enye.

⁷Ekem Jesus adaha ye mbet Esie aka ke inyaŋ: ndien ata ediwak owo eto ke Galilee etiene Enye: ata ediwak owo ŋko, emi ekopde ikpɔ ŋkpɔ eke Enye anamde, eto ke Judea,

⁸ye ke Jerusalem, ye ke Idumaea, ye ke ŋkaŋ Jordan oko, ye ke edem Tyre ye Sidon, etiene Enye.

⁹Ndien Enye ɔnɔ mbet Esie uyo ete eda ekpri ubom ebet Imɔ, sia otu owo ewakde, mbak ndutime:

¹⁰koro Enye ama akanam udɔŋɔ okure ediwak owo, tutu kpukpru mmɔ emi enyenede udɔŋɔ ebere Enye man etuk Enye.

¹¹Ndien ini ekededi eke ndidehe spirit ekutde Enye, mmɔ eduɔ Enye ke iso, enyuŋ efiori ete, Afo edi Eyen Abasi.

¹²Edi Enye ɔsɔŋɔ owuk mmɔ ete ekuyarare Imɔ.

¹³Ekem Jesus ɔdɔk ke obot, onyuŋ okot mmɔ emi Enye oyomde, ndien mmɔ edi.

¹⁴Enye onyuŋ onim owo duopeba, ete mmɔ ekpedu ye Imɔ, Imɔ ikponyuŋ idɔŋ mmɔ eka ekɔkwɔrɔ ikɔ

¹⁵ekenyuŋ enyene odudu ndibin mme demon nduɔk.

¹⁶Enye odori Simon enyiŋ, ete, Peter;

¹⁷onyuŋ okot James eyen Zebedee ye John eyen-eka James; onyuŋ odori mmɔ enyiŋ, ete, Boanerges, oro edi, Nditɔ obuma:

¹⁸okot Andrew ŋko, ye Philip, ye Batholomew, ye Matthew, ye Thomas, ye James eyen Alphaeus, ye Thaddaeus,

¹⁹ye Simon emi edide Zealot, ye Judas Iscariot, emi onyuŋ adade Enye ɔnɔ.

²⁰Ekem Enye oduk ufɔk. Otu owo enyuŋ etɔŋɔ ntak ebono, tutu Jesus ye mbet Esie ikemeke ndidia ŋkpɔ.

²¹Edi ke ini iman Esie ekopde, mmɔ ewɔŋɔ eka ndimum Enye: koro mmɔ edɔhɔde ete, Ibuot ɔbɔhɔ Enye.

²²Ndien mme scribe emi etode ke Jerusalem esuhɔre edi, edɔhɔ ete, Enye enyene Beelzebub, ŋko, Enye ada ɔbɔŋ mme demon ebin mme demon ɔduɔk.

²³Ndien Enye okot mmɔ onyuŋ otop ŋke ɔnɔ mmɔ ete, Satan ekeme didie ndibin mme demon nduɔk?

²⁴Edieke obio edidem abaharede ada aŋwana ye idem esie, obio oro ikemeke ndisɔŋɔ nda.

²⁵Onyuŋ edieke ufɔk abaharede ada aŋwana ye idem esie, ufɔk oro ikemeke ndisɔŋɔ nda.

²⁶Ndien edieke Satan ama adaha aŋwana ye idem esie onyuŋ abahare, enye ikemeke ndisɔŋɔ nda, edi enyene nditak.

²⁷Edi baba owo kiet ikemeke ndiduk ke ufɔk ɔkpɔsɔŋ owo mbume inyene esie, ke enye mibemke iso ibɔp ɔkpɔsɔŋ owo oro; adaŋoro ndien ke enye edibume ufɔk esie.

²⁸Ke akpanikɔ ke ndɔhɔ mbufo nte, Eyefen nditɔ owo kpukpru ndudue mmɔ ye ikɔ-isuŋi ekededi eke mmɔ etiŋde:

²⁹edi owo ekededi eke editiŋde ikɔ-isuŋi adian Edisana Spirit inyeneke erifen ke nsinsi, edi edue isop eke odotde ubiom-ikpe ke nsinsi:

³⁰koro mmɔ edɔhɔde ete, Enye enyene edidehe spirit.

³¹Ndien eka Esie ye nditɔ-eka Esie edi, eda ke aŋwa, edɔŋ ekokot Enye.

³²Edi otu owo etie ekan Enye ekuk: mmɔ enyuŋ edɔhɔ Enye ete, Sese, uka ye nditɔ-uka ke eda ke aŋwa eyom Fi.

³³Edi Enye ɔbɔrɔ mmɔ ete, Anie edi eka Mi ye nditɔ-eka Mi?

³⁴Ndien Enye asuan enyin ese mmɔ emi ekande Enye ekuk etie, ete, Sese eka Mi ye nditɔ-eka Mi.

³⁵Koro owo ekededi eke anamde se Abasi amade, enye edi eyen-eka Mi eren ye eyen-eka Mi aŋwan ye eka Mi.