Read efik MARK 4 Bible Online

MARK 4 - efik bible

MARK 4

¹EKEM Enye ɔtɔŋɔ ntak ɔtɔŋɔ ndikpep owo ŋkpɔ ke mben akwa inyaŋ. Ata akamba otu owo enyuŋ ebono etiene Enye, tutu esin Enye oduk ke ubom etie ke inyaŋ; ofuri otu owo enyuŋ eda ke obot ke mben inyaŋ.

²Ndien Enye ekpep mmɔ ediwak ŋkpɔ ke ŋke, onyuŋ ɔdɔhɔ mmɔ ke erikpep Esie ete, Ekpaŋ utɔŋ.

³Sese, asuan-mkpasip ɔwɔrɔ aka ndisuan;

⁴Ndien, edikem, nte enye asuande, ndusuk mkpasip eduɔŋɔ ke mben ɔkpɔusuŋ, mme inuen enyuŋ edi nditaŋ eta.

⁵Ndusuk eduɔŋɔ ke isɔŋ itiat, ke ɔtɔ eke mmɔ minyeneke uwak ntan; enyuŋ etibe idaha oro,

⁶koro ntan mituŋɔke; ekem ke ini utin asiahade, ɔfɔp mmɔ; ndien sia minyeneke oruŋ eyemere.

⁷Ndusuk eduɔŋɔ ke ikɔt ŋkukim, ndien ŋkukim oro ekɔri ebaba mmɔ ewot, mmɔ inyuŋ iŋwumke mfri.

⁸Mmɔ eken eduɔŋɔ ke eti isɔŋ, enyuŋ efiari mfri, ekɔri enyuŋ etɔt, esioŋo mfri utim ikedip ye duop, ye utim ikaata, ye utim ikikie.

⁹Enye onyuŋ ɔdɔhɔ ete, Owo eke enyenede utɔŋ ndikop, yak okop.

¹⁰Ekem ke adaŋemi Enye odude ke Idem Esie, mmɔ emi edude ye Enye ye mbet duopeba ebup Enye ebaŋa mme ŋke oro

¹¹Ndien Enye ɔdɔhɔ mmɔ ete, Eyak ndibe ŋkpɔ Obio Ubɔŋ Abasi enɔ mbufo; edi mmɔ emi edude ke edem, kpukpru ŋkpɔ ke esine ke ŋke esim mmɔ;

¹²man mmɔ esuk ese ŋkpɔ, edi ekukut; enyuŋ esuk ekop ŋko, edi ekufiɔk; mbak mmɔ edikabare, ndien edahado enɔ mmɔ.

¹³Enye onyuŋ ɔdɔhɔ mmɔ ete, Nte mbufo ifiɔkke se ŋke emi ɔwɔrɔde? edinam didie ndien efiɔk kpukpru ŋke?

¹⁴Asuan-mkpasip asuan ikɔ Abasi

¹⁵Mmɔ emi edi mbon mben ɔkpɔusuŋ, emi ikɔ eduɔŋɔde ke esit: ke adaŋemi mmɔ ekokopde, Satan edi kpa idaha oro editaŋ ikɔ eke esuande ke esit mmɔ efep.

¹⁶Kpasuk ntre emi edi mmɔ emi mkpasip eduɔŋɔde ke isɔŋ itiat, ke adaŋemi mmɔ ekokopde ikɔ, mmɔ ebɔ kpa idaha oro ye idaresit;

¹⁷edi mmɔ inyeneke oruŋ ke idemmɔ, edi ebigi ke ini esisit; ndien ke ini ukut mme isin-enyin otibede kabaŋa ikɔ idaha oro eduɔ.

¹⁸Mmɔ efen edi mmɔ emi mkpasip eduɔŋɔde ke ufɔt ŋkukim; emi edi mmɔ emi ekokopde ikɔ, ndien ekikere ŋkpɔ eyo emi,

¹⁹ye abiaŋa inyene, ye mme idiɔk itɔŋ ŋkpɔ eŋwen eduk ebaba ikɔ ewot; ntre ke ikɔ akabare anana mfri.

²⁰Mmɔ emi mkpasip eduɔŋɔde ke eti isɔŋ, edi mmɔ emi ekopde ikɔ enyuŋ edarade enye, enyuŋ eŋwum mfri utim ikedip ye duop, ye utim ikaata, ye utim ikikie.

²¹Ekem Enye ɔdɔhɔ mmɔ ete, Nte eda utuenikaŋ edi, man emen enim ke idak abaŋ, me ke idak mkpana ekunyuŋ ewuk ke uwukutuenikaŋ?

²²Koro baba ŋkpɔ kiet idibeke, ibɔhɔke man akpayarare; baba ŋkpɔ kiet inyuŋ ifuhɔke ina, ibɔhɔke man ɔkpɔwɔrɔ ke uŋwana.

²³Edieke owo enyenede utɔŋ ndikop, yak okop.

²⁴Enye onyuŋ ɔdɔhɔ mmɔ ete, Etiŋ enyin ekpeme se mbufo ekopde. Udomo eke mbufo edade edomo enɔ owo, ke eyeda edomo enɔ mbufo, eyenyuŋ ekɔrɔ enɔ mbufo.

²⁵Koro eyeda enɔ owo eke enyenede edian; edi ama edi owo eke minyeneke, eyebɔ enye kpa se enye enyenede.

²⁶Enye onyuŋ ɔdɔhɔ ete, Obio Ubɔŋ Abasi etie ntem, nte ŋkpɔ eke owo asuande mkpasip ke isɔŋ;

²⁷onyuŋ edede idap onyuŋ adahade ke enyɔŋ, ke okoneyo ye ke uwem-eyo; ndien mkpasip otibe onyuŋ ɔkɔri, enye ifiɔkke nte asaŋade ɔkɔri.

²⁸Isɔŋ osioŋɔ mfri ke idem esie; ebem iso afiari ikɔŋ, ndien editop idem, ndien edidian ɔyɔhɔ ibokpot.

²⁹Ndien ke ini ibokpot ɔsɔŋde, enye osio ofut ukpeŋe-ŋkpɔ ini kiet, koro ekemde ini ukpeŋe.

³⁰Enye onyuŋ ɔdɔhɔ ete, Nnyin idisaŋa didie iwut mbiet Obio Ubɔŋ Abasi? mme nso oruk ŋke ke nnyin idida iyarare enye iwut?

³¹Ebiet mkpasip mustard kiet, emi ekpride akan kpukpru mkpasip eke edude ke isɔŋ, ke ini etɔde enye ke isɔŋ;

³²edi ema etɔ enye, enye ɔkɔri akabare okpon akan kpukpru mbiet, onyuŋ asiaha ikpɔ ŋkɔk; ntre ke mme inuen enyɔŋ ekeme ndikubɔ ke mfut esie.

³³Enye onyuŋ ada ediwak ŋke eke etiede ntem etiŋ ikɔ ɔnɔ mmɔ nte mmɔ ekemede ndikop;

³⁴minyuŋ idige ke ŋke, Enye itiŋke ikɔ inɔ mmɔ; edi Enye asiak kpukpru ŋkpɔ ɔnɔ mbet Esie ke idem mmɔ ikpɔŋ.

³⁵Ndien ke usen oro, ke ini osimde mbubreyo, Enye ɔdɔhɔ mmɔ ete, Eyak iwat ibe ika ke edem oko.

³⁶Ntre ke mmɔ ekpɔŋ otu owo, eda Enye kpa nte Enye etiede ye mmɔ ke ubom.

³⁷Mme ubom efen enyuŋ edu ye Enye. Edi akwa oyobio otibe ofime, mbufut onyuŋ adaha oduk ke esit ubom, tutu mmɔŋ ɔtɔŋɔ ndiyɔhɔ ke ubom.

³⁸Ndien Enye ke Idem Esie odu ke etak ubom, ke ede idap ke udoribuot: ndien mmɔ edemere Enye, ete Enye, Andikpep, nte Afo ukereke ete nnyin itak?

³⁹Ndien Enye edemere asua ɔnɔ ofim, onyuŋ ɔdɔhɔ inyaŋ ete, Dobo, na suŋ. Ndien ofim odobo, mmɔŋ onyuŋ ana suŋ-ŋ.

⁴⁰Ndien Enye ɔdɔhɔ mmɔ ete, Nsinam mbufo efehede ndik? nte mbufo inyeneke kaŋa mbuɔtidem?

⁴¹Ndien ndik anam mmɔ eti-eti, mmɔ enyuŋ edɔhɔ kiet eken ete, Anie naŋa edi emi, emi, kpa ofim ye inyaŋ ekopde uyo Esie?