Read efik MARK 5 Bible Online

MARK 5 - efik bible

MARK 5

¹EKEM mmɔ edi ke edem inyaŋ oko, eduk ke idut mme Gerasene.

²Ndien ke ini Enye ɔwɔrɔde ke ubom, idaha oro owo kiet, emi enyenede edidehe spirit, oto ke mme udi edisobo ye Enye; enye ke ododuŋ ke mme udi:

³owo inyuŋ ikemeke ndifan enye, ekpedi ke ŋkpɔkɔbi.

⁴Koro ediwak ini ema ekɔkɔbi enye ke ebuka ye ŋkpɔkɔbi; ndien enye okibi ŋkpɔkɔbi; onyuŋ obuŋ ebuka mbio-mbio, owo inyuŋ ikemeke ndisuk enye.

⁵Kpukpru ini, ke okoneyo ye ke uwemeyo, ke mme udi ye ke ikpɔ obot, enye ke ofofiori onyuŋ ekpeŋe idem ke itiat.

⁶Ndien ke ini enye adade nsan-nsan okut Jesus, enye efehe etiene Enye akatuak ibuot ɔnɔ Enye;

⁷onyuŋ ofiori ke okpɔsɔŋ uyo ete, Nsaŋa nso ye Afo, Jesus, Eyen Abasi Ibom? Mmɔsɔŋɔ ŋwuk Fi ke enyiŋ Abasi, nte, Kutuhɔre mi.

⁸Koro Jesus ɔkɔdɔhɔde enye ete, Afo edidehe spirit, wɔrɔ owo oro ke idem.

⁹Ndien Jesus obup enye ete, Nso idi enyiŋ fo? Owo oro ɔdɔhɔ ete, Enyiŋ mi ekere Legion (udim): koro nnyin iwakde

¹⁰Ndien enye ɔsɔŋɔ ebeŋe Enye ete, okubin mme imɔ osio ke idut oro.

¹¹Edi akamba otu edi edu do ke ŋkaŋ obot, edia ŋkpɔ.

¹²Ntre mme demon ebeŋe Jesus ete, Dɔŋ nnyin ika ke otu mme edi man iduk mmɔ ke idem. Enye onyime.

¹³Ndidehe spirit oro enyuŋ ewɔŋɔ ekoduk mme edi ke idem; ndien otu edi ebumere efeŋe esuhɔre ke ebedeŋ, eduɔŋɔ ke inyaŋ, ekpaŋa ke mmɔŋ; ibat mmɔ ekpere thousand iba.

¹⁴Mme andibɔk mmɔ enyuŋ efeŋe ekobuk ŋkpɔ emi ke obio ye ke iŋwaŋ. Mbio-obio enyuŋ ewɔŋɔ edi ndise se ikotibede.

¹⁵Mmɔ edi edisim Jesus, enyuŋ ekut owo emi mme demon ekomumde, etiede tie, esine ɔfɔŋ, onyuŋ enyene eti ibuot, kpa owo emi ekenyenede legion: ndien ndik anam mmɔ.

¹⁶Mmɔ emi ekokutde ŋkpɔ emi enyuŋ ebuk enɔ mmɔ nte ɔkɔwɔrɔde ɔnɔ owo emi mme demon ekemumde, ye se ibaŋade mme edi.

¹⁷Ndien mmɔ etɔŋɔ ndikpe Enye ubɔk ete, ɔwɔrɔ ke adaŋa mme imɔ onyɔŋ.

¹⁸Edi nte Jesus edierede ke ubom, owo emi mme demon ekemumde ekpe Enye ubɔk ete, ayak imɔ idu ye Enye.

¹⁹Edi Jesus inyimeke inɔ enye, edi ɔdɔhɔ enye ete, Nyɔŋ ufɔk tiene mme ufan fo, nyuŋ sian mmɔ ikpɔ ŋkpɔ eke Ɔbɔŋ akanamde ɔnɔ fi, ye nte Enye akatuade fi mbɔm.

²⁰Owo oro ɔnyɔŋ ɔtɔŋɔ ndisaŋa ke Decapolis mbe nsuan mbuk ikpɔ ŋkpɔ eke Jesus akanamde ɔnɔ enye: ndien idem akpa kpukpru owo.

²¹Ekem ke ini Jesus ama ɔkɔtɔŋɔ ntak ebe inyaŋ ke ubom osim edem eken, akwa otu owo ebono etiene Enye: Enye onyuŋ odu ke mben inyaŋ.

²²Ndien ɔbɔŋ synagogue kiet, emi ekerede Jairus, edi; ndien ke ini enye okutde Jesus,

²³ɔduɔ Enye ke ukot, ɔsɔŋɔ ekpe Enye ubɔk, ete, Ekpri eyen mi aŋwan ekpere ndikpa: mmekpe fi ubɔk nte Afo edi edidori enye ubɔk, man enye okop nsɔŋidem, onyuŋ odu uwem.

²⁴Ndien Jesus adaha asaŋa ye enye, ata ediwak owo enyuŋ etiene enye enyuŋ ebere Enye.

²⁵Ndien ŋwan kiet, emi ɔkɔdɔŋɔde eriwɔrɔ iyip isua duopeba,

²⁶okonyuŋ okutde ediwak ndutuhɔ ke ubɔk ediwak mbia-ibɔk, onyuŋ abiatde kpukpru se enye enyenede, minyuŋ ikopke ufɔn baba esisit, edi utu ke oro idem esie akabare ɔdiɔk akan,

²⁷ke adaŋemi enye okopde ŋkpɔ abaŋa Jesus, asaŋa ke ufɔt otu owo etiene Enye ke edem, onyuŋ otuk ɔfɔŋidem Esie.

²⁸Koro enye ɔdɔhɔde ete, Mmaŋkam ntuk ekpedi ɔfɔŋidem Esie, nyekop nsɔŋidem.

²⁹Ndien idaha oro eriwɔrɔ iyip ekpehe enye; enye onyuŋ okop ke idem esie ete ema enam udɔŋɔ okure imɔ.

³⁰Idaha oro, ke ini Jesus ɔfiɔkde ke Idem Esie ete odudu okoto Imɔ ke idem ɔwɔrɔ, Enye ɔwɔŋɔre ke ufɔt otu owo, ete, Anie owo okotuk ɔfɔŋidem Mi?

³¹Mbet Esie ete Enye, Omokut nte otu owo eberede Fi, Ndien Afo ete, Anie okotuk mi?

³²Ndien Enye asuan enyin ete ikut ŋwan emi akanamde ŋkpɔ emi.

³³Edi ŋwan oro, sia ɔfiɔkde se ikotibede inɔ enye, edi ke ndik ye nnyek-idem ediduɔ Enye ke iso, onyuŋ etiŋ ofuri akpanikɔ ɔnɔ Enye.

³⁴Edi Jesus ɔdɔhɔ enye ete, Eyen-aŋwan, mbuɔtidem fo akanam fi okop nsɔŋidem; nyɔŋ ke oduk ke emem, nyuŋ bɔhɔ idiɔk udɔŋɔ fo.

³⁵Nte Enye osuk etiŋde ikɔ, owo eto ke ufɔk ɔbɔŋ synagogue edidɔhɔ ete, Eyenaŋwan fo ama akpa: nsinam afo osuk afinade Andikpep?

³⁶Edi Jesus ikereke se mmɔ etiŋde, edi ɔdɔhɔ ɔbɔŋ synagogue ete, Kufehe, kam nim ke akpanikɔ.

³⁷Enye inyuŋ iyakke baba owo kiet asaŋa ye Enye, ke mibɔhɔke Peter, ye James, ye John eyen-eka James.

³⁸Ndien mmɔ edi ke ufɔk ɔbɔŋ synagogue; Jesus onyuŋ okut ndutime, ye ediwak owo nte etuaŋade enyuŋ esemede ɔkpɔsɔŋ.

³⁹Ndien ke Enye odukde ufɔk, Enye ɔdɔhɔ mmɔ ete, Nsinam mbufo esinde ndutime enyuŋ etuaŋade? eyen emi ikpaha mkpa, edi edede.

⁴⁰Edi mmɔ esak Enye nsahi. Edi ke Enye ama akanam kpukpru mmɔ ewɔŋɔ, Enye ada ete ye eka eyen oro, ye mmɔ emi edude ye Enye, oduk ke ebiet eke eyen odude.

⁴¹Ndien Enye omum eyen ke ubɔk, ɔdɔhɔ enye ete, Talitha cumi; emi ɔwɔrɔde ete, Eyen-aŋwan, ndɔhɔ fi nte, daha ke enyɔŋ.

⁴²Ekem idaha oro eyen-aŋwan adaha ke enyɔŋ, onyuŋ asaŋa; koro enye osimde isua duopeba.

⁴³Idaha oro akamba mkpa-idem omum mmɔ. Edi Jesus ɔsɔŋɔ owuk mmɔ ete, ekuyak baba owo kiet ɔfiɔk ŋkpɔ emi; Enye onyuŋ ɔdɔhɔ mmɔ ete, Enɔ eyen ŋkpɔ adia.