Read efik MARK 6 Bible Online

MARK 6 - efik bible

MARK 6

¹EKEM Enye ɔwɔrɔ ɔkpɔŋ ɔtɔ oro, onyuŋ edi ke obio Esiemɔ; mbet Esie enyuŋ esaŋa ye Enye.

²Ndien ke osimde sabbath, Enye ɔtɔŋɔ ndikpep owo ŋkpɔ ke synagogue; ediwak mmɔ eke ekopde Enye enyuŋ edu ke mkpa-idem, ete, Owo emi ada ŋkpɔ emi ke mmɔŋ? Ɔniɔŋ eke enɔde owo emi edi nso, ye oruk utom odudu emi ubɔk Esie anamde?

³Nte Enye idige anamusɔ, eyen Mary, ye eyen-eka James ye Joses ye Judas ye Simon? Nte nditɔ-eka Esie iban inyuŋ iduhe ye nnyin? Ndien mmɔ eduɔ ke ntak Esie.

⁴Edi Jesus ɔdɔhɔ mmɔ ete, Prophet inanake ukpono ke mibɔhɔke ke obio esie, ye ke otu iman esiemɔ, ye ke ufɔk esiemɔ.

⁵Ndien Enye ikemeke ndinam utom odudu do ibɔhɔke ndidori ndusuk mbon udɔŋɔ ubɔk nnyuŋ nnam mmɔ ekop nsɔŋidem

⁶Ndien Enye eyik abaŋa unana mbuɔtidem mmɔ. Ekem Enye asaŋa akanare obio-iŋwaŋ ekpep owo ŋkpɔ.

⁷Ndien Enye okot mbet Esie duopeba edi, onyuŋ ɔtɔŋɔ ndisio mmɔ iba iba ndɔŋ mmɔ utom: onyuŋ ɔnɔ mmɔ odudu ndikan ndidehe spirit.

⁸Enye onyuŋ ɔnɔ mmɔ uyo ete, Ekukama ŋkpɔ ke isaŋ ke mibɔhɔke esaŋ ikpɔŋ; ekukama uyo, mme ekpat-isaŋ, mme okuk ke ubɔp-isin;

⁹edi esine ikpa-ukot ke ukot; ekunyuŋ esine ɔfɔŋidem iba.

¹⁰Enye onyuŋ ɔdɔhɔ mmɔ ete, Ke ebiet ekededi eke mbufo edukde ke ufɔk, etie do tutu mbufo enyɔŋɔ ke ebiet oro.

¹¹Ndien ebiet ekededi eke midinyimeke ndidara mbufo, minyuŋ ikopke uyo mbufo, nte mbufo ewɔŋɔde do, ekeŋ ntan ikpat mbufo enɔ mmɔ nte ŋkpɔ ntiense.

¹²Mbet edaha ekɔkwɔrɔ ete, Ekabare esit.

¹³Mmɔ enyuŋ ebin ediwak demon eduɔk, enyuŋ eyet ediwak mbon udɔŋɔ aran, enyuŋ enam udɔŋɔ ekure mmɔ.

¹⁴Ekem edidem Herod okop; koro enyiŋ Jesus ɔwɔrɔde etop: Herod onyuŋ ɔdɔhɔ ete, John Baptist emeset ke mkpa, mmɔdo mme odudu emi enamde utom enye ke idem.

¹⁵Edi owo efen ete, Edi Elijah: mmɔ efen edɔhɔ ete, Edi prophet emi etiede nte owo kiet ke otu mme prophet.

¹⁶Edi ke ini Herod okopde, enye ɔdɔhɔ ete, John emi ŋkebigide, enye emeset.

¹⁷Koro Herod ke idem esie ɔkɔdɔŋ ekomum John, onyuŋ ɔkɔbi enye ke ufɔk-ŋkpɔkɔbi ke ntak Herodias, ŋwan Philip, eyen-ete esie: koro Herod ama ɔkɔdɔ ŋwan oro.

¹⁸Koro John ɔdɔhɔde Herod ete, Inenke fi ndida ŋwan eyen-usɔ ndɔ.

¹⁹Edi Herodias ayat esit ye John, onyuŋ oyom ndiwot enye:

²⁰edi ikemeke: koro Herod efefehe John, sia ɔfiɔkde ete enye edi edinen ye edisana owo, onyuŋ ekpeme enye. Ndien ke ini enye okopde uyo John, ekikere otimere enye; enye onyuŋ okop uyo oro ke inemesit.

²¹Ekem ke ini usen eke ekemde ama edi, Herod anam akwa udia ke usen emana esie ɔnɔ mbɔŋ esie, ye mme etubom-ekɔŋ esie, ye ikpɔ owo Galilee;

²²eyen Herodias aŋwan onyuŋ oduk edinek unek, enem Herod ye mmɔ emi etiede ye enye ke itie-udia esit; ndien edidem ɔdɔhɔ eyen-aŋwan oro ete, Beŋe mi ŋkpɔ ekededi eke amade, ndien nyenɔ fi. Herod ɔŋwɔŋɔ ɔnɔ enye ete,

²³Ŋkpɔ ekededi eke edibeŋede ke nyenɔ fi, ekpedi idem ubak edem kiet ubɔŋ.

²⁴Ndien enye oro ɔwɔrɔ okobup eka esie ete, Nso ke ŋkpebeŋe? Enye ɔbɔrɔ ete, Ibuot John Baptist.

²⁵Ekem kpa idaha oro eyen-aŋwan awara oduk ke ɔtɔ edidem, ebeŋe ete, Nyom afo ɔnɔ mi ibuot John Baptist idahemi ke usan.

²⁶Edidem ayat esit eti-eti; edi ke ntak uŋwɔŋɔ esie, ye mmɔ emi etiede ye enye ke itie-udia, enye imaŋa ndisin eyen-aŋwan ebeŋe esie.

²⁷Ndien idaha oro edidem osio owo-ekɔŋ kiet ke otu mme andikpeme enye, ɔdɔŋ, ɔnɔ uyo ete eda ibuot John edi: owo oro onyuŋ aka ekebigi enye ke ufɔk-ŋkpɔkɔbi,

²⁸ada ibuot esie ke usan edi edinɔ eyen-aŋwan oro, ndien eyen-aŋwan ada ɔnɔ eka esie.

²⁹Ekem ke ini mbet John ekopde, mmɔ edi edimen okpo esie, eka ekebuk ke udi.

³⁰Ekem mme apostle ebono etiene Jesus, esian Enye kpukpru ŋkpɔ, se ededi mmɔ ekanamde, ye se ededi mmɔ ekekpepde.

³¹Ndien Enye ɔdɔhɔ mmɔ ete, Edi ke idem mbufo ke ebiet desert ediduɔk odudu esisit. Koro ediwak owo ke ededi enyɔŋyɔŋɔ, mmɔ inyuŋ ikwe ifet kpa ndidia ŋkpɔ.

³²Ekem mmɔ ediere ke ubom edaha eka ke ebiet desert ke idem mmɔ ikpɔŋ.

³³Edi owo ekut mmɔ nte ekade, ediwak enyuŋ ediɔŋɔ mmɔ, enyuŋ eto ke kpukpru obio, efehe ukot-ukot ebem mmɔ iso ekesim ebiet oro.

³⁴Ndien Jesus ɔwɔrɔ ke ubom okut akwa otu owo, onyuŋ atua mmɔ mbɔm, koro mmɔ ebietde mme erɔŋ eke minyeneke andikpeme: Enye onyuŋ ɔtɔŋɔ ndikpep mmɔ ediwak ŋkpɔ.

³⁵Edi ke ini ekperede mbubreyo, mbet Esie etiene Enye, ete, Ebiet emi edi desert, onyuŋ ekpere mbubreyo ke emi;

³⁶dɔŋ mmɔ enyɔŋɔ, man mmɔ eka ke iŋwaŋ ye obio-iŋwaŋ ke ŋkan-ŋkuk ekedep udia enɔ idem mmɔ.

³⁷Edi Enye ɔbɔrɔ mmɔ ete, Mbufo enɔ mmɔ ŋkpɔ edia. Mmɔ edɔhɔ Enye ete, nte nnyin idika ikedep uyo ke okuk ikie iba inɔ mmɔ edia?

³⁸Edi Enye ete mmɔ, Enyene uyo ifaŋ? Eka ekese. Ndien ke ini mmɔ efiɔkde, mmɔ ete, uyo ition ye iyak iba.

³⁹Enye ɔnɔ uyo ete kpukpru owo esuhɔre etetie ke udim ke udim ke awawa mbiet.

⁴⁰Mmɔ etetie udim-udim, owo ikie ikie, ye aba ye duop aba ye duop.

⁴¹Ndien Enye emen uyo ition ye iyak iba oro, emenere enyin ese enyɔŋ, ɔdiɔŋ mmɔ, onyuŋ obuŋ uyo, ayak ɔnɔ mbet, ete enim mbio-obio ke iso: Enye onyuŋ edeme iyak iba oro ɔnɔ mmɔ kpukpru.

⁴²Kpukpru mmɔ enyuŋ edia eyuhɔ.

⁴³Mmɔ enyuŋ etaŋ mbubek uyo, edɔŋ ke akpan duopeba eyɔhɔ, ye iyak ŋko.

⁴⁴Ndien mmɔ emi ediade uyo edi thousand owo ition.

⁴⁵Ndien idaha oro Enye enyik mbet Esie ediere ke ubom, ete ebem Imɔ iso eka ke Bethsaida ke edem eken, tutu Imɔ ke Idem Imɔ idɔŋ otu owo enyɔŋɔ.

⁴⁶Ekem ke Enye ama ɔkɔkpɔŋ mmɔ, Enye adaha aka ke akamba obot ndibɔŋ akam

⁴⁷Ke ini osimde mbubreyo, ubom odu ke ufɔt inyaŋ, Enye onyuŋ odu ikpɔŋ ke obot.

⁴⁸Ekem ke ini Enye okutde nte ɔsɔŋde mmɔ idem ndiwat, koro ofim ɔbiɔŋde mmɔ, ke ɔyɔhɔ efen inaŋ ke okoneyo, Enye asaŋa ke enyɔŋ inyaŋ etiene mmɔ: Enye okponyuŋ oyom ndisaŋa mbe.

⁴⁹Edi ke ini mmɔ ekutde Enye asaŋade ke enyɔŋ inyaŋ, ese ete edi ekpo, enyuŋ esio mkpo. Koro kpukpru mmɔ ekut Enye, esit onyuŋ otimere mmɔ:

⁵⁰Edi idaha oro Enye etiŋ ye mmɔ, onyuŋ ɔdɔhɔ ete, Esɔŋ esit: edi Ami: ekufehe ndik.

⁵¹Ndien Enye etiene mmɔ ediere ke ubom; ndien ofim odobo:

⁵²idem onyuŋ akpa mmɔ eti-eti; koro mmɔ mitimke ifiɔk ibaŋa uyo, edi esit mmɔ ɔsɔsɔŋ.

⁵³Ekem ke ini mmɔ ebede inyaŋ esim obot, mmɔ ebehe ke isɔŋ Gennesaret, enyuŋ eyiri ubom ke esuk.

⁵⁴Ndien ke ini mmɔ ema ekɔwɔŋɔ ke ubom, idaha oro mbio-obio ediɔŋɔ Enye,

⁵⁵enyuŋ efehe ekanare ofuri edem oro, etɔŋɔ ndibiom mbon udɔŋɔ ke mkpana ŋka ɔtɔ nte mmɔ ekopde ete Enye ke odu.

⁵⁶Ndien ebiet ekededi eke Enye odukde, mme obio-iŋwaŋ, mme ikpɔ obio, mme iŋwaŋ, mmɔ enim mbon udɔŋɔ ke aŋwa-urua, enyuŋ ekpe Enye ubɔk ete mmɔ oro etuk ekpedi nnyeriye ɔfɔŋidem Esie. Ndien adaŋa ibat owo nte etukde Enye ekop nsɔŋidem.