Read efik MARK 9 Bible Online

MARK 9 - efik bible

MARK 9

¹NDIEN Enye ete mmɔ, Ke akpanikɔ ke ndɔhɔ mbufo Ndusuk owo edu ke otu mmɔ emi edade mi, emi miditabike mkpa tutu mmɔ ekut Ubɔŋ Abasi nte edide ke odudu.

²Ekem ke usen itiokiet ema ekebe, Jesus ada Peter, ye James, ye John, ɔdɔk ke akwa obot ke idem mmɔ ikpɔŋ:

³ndien mbiet Esie ɔkpuhɔre ke iso mmɔ edisine-ŋkpɔ Esie onyuŋ akabare esem afia eti-eti adaŋa nte baba ɔdiɔŋ-ɔfɔŋ kiet ke isɔŋ mikemeke ndinam.

⁴Ndien Elijah ye Moses ebiɔŋɔ mmɔ ke iso: mmɔ enyuŋ eneme nneme ye Jesus.

⁵Ndien Peter ɔbɔrɔ Jesus ete, Rabbi, ɔfɔn nnyin ndidu mi: yak nnyin inyuŋ ibɔp ataya ita: kiet enyene Fi, kiet enyene Moses kiet onyuŋ enyene Elijah.

⁶Koro enye mifiɔkke se ɔkpɔbɔrɔde: koro akwa ndik omumde mmɔ.

⁷Ndien ikpa enyɔŋ edi edifuk mmɔ; uyo onyuŋ oto ke ikpa-enyɔŋ ɔwɔrɔ ete, Emi edi edima Eyen Mi: ekop uyo Esie.

⁸Ndien idaha oro, ke ini mmɔ esuande enyin ese, mmɔ ikwe owo aba ye mmɔ, ke mibɔhɔke Jesus ikpɔŋ.

⁹Ndien nte mmɔ etode ke obot esuhɔre, Jesus owuk mmɔ ete, ekutiŋ se ekekutde enɔ baba owo kiet, ibɔhɔke ke ini eke Eyen Owo edisetde ke mkpa.

¹⁰Ndien mmɔ emum ikɔ oro ekama, enyuŋ ebup kiet eken se eriset ke mkpa oro ɔkpɔwɔrɔde.

¹¹Mmɔ enyuŋ ebup Enye ete, Mme scribe edɔhɔ ete, Elijah enyene ndibem iso ndi.

¹²Enye ɔdɔhɔ mmɔ ete, Ke akpanikɔ Elijah ke ebem iso edi edidiɔŋ kpukpru ŋkpɔ: edi ekanam didie ewet ebaŋa Eyen Owo ete, Enye eyekut ediwak ukut, idinyuŋ idaha Enye ikɔm ŋkpɔ?

¹³Edi ndɔhɔ mbufo nte Elijah ededi ama, mmɔ ema enyuŋ enam ye enye se mmɔ emade, kpa nte ewetde ebaŋa enye.

¹⁴Ekem ke ini mmɔ esimde mbet, mmɔ ekut akamba otu owo nte ekande mmɔ ekuk, ye mme scribe nte enenide eneni ye mmɔ.

¹⁵Ndien idaha oro, ke ini ofuri otu owo ekutde Enye, idem akpa mmɔ eti-eti, mmɔ enyuŋ efehe etiene Enye ekekɔm Enye.

¹⁶Enye obup mmɔ ete, Mbufo eneni nso ye mmɔ?

¹⁷Ekem owo kiet ke ufɔt otu oro ɔbɔrɔ Enye ete, Andikpep, ŋkada eyen eren mi, emi enyenede spirit imum, nsɔk Fi;

¹⁸ndien ɔtɔ nte spirit oro omumde enye, osio enye ɔduɔk ke isɔŋ, enye onyuŋ osio efot, onyuŋ ata edet, idem onyuŋ ɔdɔdiɔŋ ɔdiɔk enye: mmonyuŋ ndɔhɔ mbet Fo nte ebin enye eduɔk, edi mmɔ ikemeke.

¹⁹Edi Jesus ɔbɔrɔ mmɔ ete, O emana emi ananade mbuɔtidem, adaŋa didie ke ndidu ye mbufo? adaŋa didie ke ndime ime ye mbufo? da enye sɔk Mi. Mmɔ eda enye esɔk Jesus.

²⁰Ke ini eyen oro okutde Jesus, idaha oro spirit esiŋere enye idiɔk-idiɔk, enye onyuŋ ɔduɔ ke isɔŋ amiaŋa, osio efot.

²¹Jesus obup ete esie ete, Ebigi adaŋa didie nte ŋkpɔ emi ɔkɔtɔŋɔ ndinam enye? Ete ɔdɔhɔ ete, Toto ke uyen.

²²Spirit onyuŋ awawak ndisio enye nduɔk ke ikaŋ ye ke mmɔŋ, ete iwot enye: edi edieke Afo ekemede ndinam ŋkpɔ, tua nnyin mbɔm, nyuŋ ŋwam nnyin.

²³Jesus ɔbɔrɔ enye ete, Edieke ekemede ndibuɔt idem! Kpukpru ŋkpɔ ekeme ndiwɔrɔ nnɔ enye emi ɔbuɔtde idem.

²⁴Idaha oro ete eyen oro ofiori ete, Mmɔbuɔt idem; ŋwam unana mbuɔtidem mi.

²⁵Edi ke ini Jesus okutde nte otu owo ekibede edi, Enye asua ɔnɔ edidehe spirit ete enye. Afo spirit imum ye inan, mmowuk fi, wɔrɔ enye ke idem, kunyuŋ uduk enye ke idem aba.

²⁶Ekem spirit ofiori, onyuŋ esiŋere enye eti-eti, ɔwɔrɔ enye ke idem: ndien eyen oro ɔsuhɔ, tutu ediwak owo edɔhɔ ete, enye ama akpa.

²⁷Edi Jesus omum enye ke ubɔk, emenere enye: ndien enye adaha ke enyuŋ.

²⁸Ekem ke ini Enye odukde ke ufɔk, mbet Esie ebup Enye ke ndibe ete, Nsinam nnyin mikekemeke ndibin enye nduɔk?

²⁹Edi Enye ete mmɔ, Oruk emi ikemeke ndiwɔrɔ, ibɔhɔke ke akam.

³⁰Ekem mmɔ ewɔrɔ do esaŋa ebe ke Galilee; ndien Enye iyomke owo ekededi ɔfiɔk.

³¹Koro Enye ekpepde mbet Esie ŋkpɔ, ete mmɔ, Emayak Eyen Owo esin mme owo ke ubɔk, ndien mmɔ eyewot Enye; ndien ke ini ewotde Enye, usen ita ema ebe, Enye eyeset.

³²Edi mmɔ ifiɔkke se ikɔ oro ɔwɔrɔde, onyuŋ anam mmɔ ndik ndibup Enye.

³³Ekem mmɔ edi ke Capernaum; ndien ke ini Enye odude ke ufɔk, Enye obup mmɔ ete, Mbufo ekeneni nso ke usuŋ?

³⁴Edi mmɔ edodop; koro ke usuŋ mmɔ ekeneni ye kiet eken, ete, mme anie ke otu mme imɔ okpon akan,

³⁵Ndien Enye etetie, okot mbet duopeba edi, onyuŋ ɔdɔhɔ mmɔ ete, Edieke owo ekededi oyomde ndidi ebe iso, enye enyene ndikpere edem, ndinyuŋ nsaŋa utom nnɔ kpukpru mmɔ eken,

³⁶Ndien Enye ada ekpri eyen ɔwɔŋ onim ke ufɔt mmɔ; onyuŋ emen enye akama ke ubɔk Esie,

³⁷onyuŋ ɔdɔhɔ mmɔ ete, Owo ekededi eke adarade kiet ke otu oruk ŋkpri nditɔwɔŋ emi ke enyiŋ Mi adara Mi: ndien owo ekededi eke adarade Mi, idige Ami ke adadara, edi Enye emi ɔkɔdɔŋde Mi.

³⁸John ete Enye, Andikpep, nnyin ikokut owo ebinde mme demon ɔduɔk ke enyiŋ Fo, nnyin inyuŋ ikpan enye, koro enye misaŋake ye nnyin.

³⁹Edi Jesus ete, Ekukpan enye: koro baba owo kiet iduhe eke anamde utom odudu ke enyiŋ Mi, edinyuŋ ekemede ndisɔp inua ntiŋ idiɔk ndian Mi.

⁴⁰Koro owo eke mibiɔŋɔke nnyin adada ye nnyin.

⁴¹Koro owo ekededi eke edinɔde mbufo cup mmɔŋ eŋwɔŋ ke ntak enyiŋ Mi, koro mbufo enyenede Christ, ke akpanikɔ ke ndɔhɔ mbufo, enye iditreke tre ndibɔ utip esie.

⁴²Ndien owo ekededi eke edisinde kiet ke otu ŋkpri nditɔwɔŋ emi enimde ke akpanikɔ ɔduɔ, ɔfɔn akan ye enye nte ekpadade akwa itiat ukɔk-ŋkpɔ ekɔŋɔ enye ke itɔŋ, enyuŋ etop enye eduɔk ke inyaŋ.

⁴³Ndien edieke ubɔk fo esinde fi ɔduɔ, sibe enye fep:

⁴⁴ɔfɔn fi ndiduk ke uwem ye unan akan ndikpenyene ubɔk iba nduk ke hell ke nsisi ikaŋ.

⁴⁵Onyuŋ edieke ukot fo esinde fi ɔduɔ, sibe enye fep:

⁴⁶ɔfɔn fi ndidi mbuŋɔ nduk ke uwem akan ndikpenyene ukot iba, ndien eduɔk fi ke hell.

⁴⁷Onyuŋ edieke enyin fo esinde fi ɔduɔ, wubere enye duɔk: ɔfɔn fi ndida enyin kiet nduk ke Obio Ubɔŋ Abasi akan ndikpenyene enyin iba, ndien eduɔk fi ke hell;

⁴⁸ke ɔtɔ eke ndɔŋ mmɔ mikpaha, ikaŋ minyuŋ inimeke.

⁴⁹Koro eyetuk kpukpru owo ikaŋ, nte etukde uwa inuŋ.

⁵⁰Inuŋ ɔfɔn: edi inuŋ ama akabare adaba, mbufo edida nso enam enye enem? Enyene inuŋ ke esit mbufo, enyuŋ etie ke emem ye kiet eken.