Read efik LUKE 1 Bible Online

LUKE 1 - efik bible

LUKE 1

¹SIA ediwak owo ema ekesin ubɔk ndinam mbuk mbaŋa mme ŋkpɔ oro ekɔwɔrɔde esu ke otu nnyin;

²kpa nte mmɔ, emi ekedide mme ntiense toto ke eritɔŋɔ ye mme andikwɔrɔ ikɔ Abasi, ekayakde enɔ nnyin;

³sia mma ŋkɔtɔŋɔ ke eritɔŋɔ ntim ntiene nde kpukpru ŋkpɔ, eketie mi nde nteɔfɔn ndiwet ke itie ke itie nnɔ fi, ata eti Theophilus;

⁴man afo otim ɔfiɔk ete se ekekpepde fi edi ata akpanikɔ.

⁵Ke eyo Herod, edidem Judaea, oku kiet okodu, emi ekerede Zechariah, owo ŋka Abijah: ndien enye enyene ŋwan emi otode ke otu nditɔ Aaron, enyiŋ esie onyuŋ ekere Elizabeth.

⁶Mmɔ mbiba enyuŋ edi edinen ke enyin Abasi, esaŋa ke kpukpru mbet ye mme ewuhɔ Jehovah, enana ndo.

⁷Ndien mmɔ inyeneke eyen, koro Elisabeth edide ada; mmɔ mbiba enyuŋ esɔŋ.

⁸Edikem, ke ini Zechariah anamde utom itie oku ke iso Abasi ke iduɔk ŋka esie,

⁹nte ido mme oku edide, afia ɔwɔrɔ enye ndiduk ke temple Jehovah ndifɔp incense;

¹⁰ofuri otu owo enyuŋ ebɔŋ akam ke okure ke ini ufɔp-incense.

¹¹Ndien angel Jehovah ɔbiɔŋɔre enye ke iso, ada ke itie ufɔp-incense ke ubok nnasia.

¹²Ke ini Zechariah okutde, esit otimere enye, ndik onyuŋ anam enye.

¹³Edi angel ɔdɔhɔ enye ete, Kufehe ndik, Zechariah; koro ema ekop mkpe-ubɔk fo; ndien ŋwan fo Elizabeth eyeman eyen eren ɔnɔ fi, afo eyeyuŋ osio enye enyiŋ John.

¹⁴Ndien afo eyenyene inemesit ye idaresit; ediwak owo eyenyuŋ edara emana esie.

¹⁵Koro enye eyekpon ke iso Jehovah; idiŋwɔŋke wine ye ɔkpɔsɔŋ mmin; eyenyuŋ ɔyɔhɔ ye Edisana Spirit toto ke emana esie;

¹⁶enye eyenyuŋ anam ediwak nditɔ Israel ekabare etiene Jehovah Abasi mmɔ.

¹⁷Ndien enye eyeda spirit ye odudu Elijah ebem Enye (Messiah) iso, man enye akabare esit mme ete ɔnɔ nditɔ, onyuŋ akabare mbon nsɔŋibuot anam mmɔ esaŋa ke ɔniɔŋ ndinen owo; onyuŋ anam mmɔ emi ekenimde enɔ Ɔbɔŋ ebeŋe idem ebet Enye.

¹⁸Zehariah ɔdɔhɔ angel ete, Ndida nso mfiɔk emi? koro ami ndide ebiowo, ŋwan mi onyuŋ ɔsɔŋde.

¹⁹Ndien angel ɔbɔrɔ enye ete, Ami ndi Gabriel, emi ndade ke iso Abasi; ekenyuŋ edɔŋ mi ete ntiŋ nnɔ fi, nnyuŋ mbuk eti mbuk emi nnɔ fi.

²⁰Ndien sese, afo eyedi imum, udunyuŋ ukemeke nditiŋ ikɔ, tutu osim usen eke ŋkpɔ emi edisude, koro mukonimke ikɔ mi ke akpanikɔ, emi edisude ke edikem ini mmɔ.

²¹Edi mbio-obio ke ebebet Zacharias, enyuŋ eyik adaŋa ini nte enye ebigide ke temple.

²²Edi ke adaŋemi enye ɔwɔrɔde, ikemeke nditiŋ ikɔ nnɔ mmɔ: ntre ke mmɔ efiɔk ete, enye ama okut ŋkukut ke temple: ndien enye ada ibuot anam idiɔŋɔ ɔnɔ mmɔ, onyuŋ etie imum.

²³Edikem ke adaŋemi mme usen erida oku esie ekurede, enye ɔnyɔŋ ufɔk.

²⁴Ke mme usen oro ema ekebe, Elisabeth ŋwan esie oyomo, onyuŋ odibe ɔfiɔŋ ition;

²⁵onyuŋ ɔdɔhɔ ete, Ntem ke Jehovah akanam ye ami ke usen emi Enye osukde enyin ese mi, ndimen but mi ke otu owo mfep.

²⁶Edi ke ɔyɔhɔ ɔfiɔŋ itiokiet Abasi ɔdɔŋ angel Gabriel utom.

²⁷Ke obio Galilee emi ekerede Nazareth, etiene eyen-aŋwan, emi ekedade enɔ owo ufɔk David emi ekerede Joseph ke ndɔ; enyiŋ eyen-aŋwan oro ekere Mary.

²⁸Ndien angel oduk etiene enye, onyuŋ ɔdɔhɔ ete, Mmɔkɔm fi, afo emi enyenede akwa mfɔn-iso, Jehovah odu ye afo.

²⁹Edi ikɔ oro otimere Mary esit eti-eti, enye onyuŋ ekere ke esit esie se oruk ekɔm oro ɔkpɔwɔrɔde.

³⁰Ndien angel ɔdɔhɔ enye ete, Kufehe ndik, Mary: koro afo ama okut mfɔn-iso ke iso Abasi.

³¹Ndien sese, afo eyeyomo, onyuŋ aman eyeneren, onyuŋ osio Enye enyiŋ JESUS.

³²Enye eyekpon, eyenyuŋ ekere Eyen Andikoŋ-ŋkan; Jehovah Abasi eyenyuŋ ɔnɔ Enye ebekpo ete Esie David:

³³Enye eyeda ubɔŋ ufɔk Jacob ke nsinsi; Ubɔŋ Esie idinyuŋ ikureke.

³⁴Edi Mary ɔdɔhɔ angel ete, Ŋkpɔ emi edikeme didie ndisu, sia mmenyeneke ebe?

³⁵Ndien angel ɔbɔrɔ enye ete, Edisana Spirit eyedoro fi ke idem, odudu Andikoŋ-ŋkan eyeyuŋ ofuk fi: mmɔdo se idimanade eyekere Edisana, Eyen Abasi.

³⁶Ndien sese, Elisabeth iman fo, enye ŋko omoyomo eyeneren ke usɔŋ esie, ndien emi edi ɔyɔhɔ ɔfiɔŋ itiokiet ye enye emi ekokotde ada.

³⁷Koro ikɔ baba kiet eke otode Abasi idinanake odudu.

³⁸Mary ete, Sese, ofin-aŋwan Jehovah; akpakam osu ɔnɔ mi kpa nte uyo fo edide. Ekem angel adaha ɔkpɔŋ enye.

³⁹Edi ke mme usen oro Mary adaha ke enyɔŋ ke usɔp aka ke obio Judah kiet, ke edem obot-obot;

⁴⁰onyuŋ oduk ke ufɔk Zecharias ɔkɔm Elizabeth.

⁴¹Edikem, ke ini Elisabeth okopde ekɔm Mary, eyen ɔfrɔ ke idibi esie; ndien Elizabeth ɔyɔhɔ ye Edisana Spirit,

⁴²onyuŋ ofiori ke ɔkpɔsɔŋ uyo, ete, Ɔfɔfɔn ɔnɔ fi ke otu iban, onyuŋ ɔfɔfɔn ɔnɔ mfri idibi fo.

⁴³Ke ntak ewe ɔwɔrɔ ntem ɔnɔ mi, ete eka Ɔbɔŋ mi ekpedi edise mi?

⁴⁴Koro sese, uyo ekɔm fo okododuk mi utɔŋ, eyen ɔfrɔ mi ke idibi ɔnɔ idaresit.

⁴⁵Onyuŋ ɔfɔfɔn ɔnɔ ŋwan emi onimde ke akpanikɔ; koro mme ŋkpɔ oro Jehovah eketiŋde ɔnɔ enye eyesu.

⁴⁶Ndien Mary ɔdɔhɔ ete, Ukpɔŋ mi ke okpono Jehovah,

⁴⁷Spirit mi omonyuŋ adara ke Abasi Andinyaŋa mi.

⁴⁸Koro Enye ekesede usuhɔre-itie ofin-aŋwan Esie. Koro, sese, ɔtɔŋɔde ke emi kpukpru emana eyedɔhɔ ete, Ɔfɔfɔn ɔnɔ mi.

⁴⁹Koro Enye emi enyenede odudu ama anam ikpɔ ŋkpɔ ɔnɔ mi: Enyiŋ Esie onyuŋ edi Edisana.

⁵⁰Mbɔm Esie onyuŋ ana ɔnɔ kpukpru emana, Ɔnɔ mmɔ emi ebakde Enye.

⁵¹Enye akada ubɔk Esie ayarare odudu; Enye akasuan mbon ntaŋidem ke ekikere esit mmɔ.

⁵²Enye ekemen mbɔŋ efep ke ebekpo mmɔ, Onyuŋ ofori mmɔ emi ekpride.

⁵³Enye akada nti ŋkpɔ ɔyuhɔ mmɔ emi biɔŋ ɔdɔŋde, Okonyuŋɔdɔŋ mbon-inyene enyɔŋɔ ubɔk-ubɔk.

⁵⁴Enye akanyaŋa Israel owo Esie, Man Enye eti mbɔm Esie,

⁵⁵(Kpa nte Enye eketiŋde ɔnɔ mme ete nnyin) Mbɔm emi Enye atuade Abraham ye nditɔ esie ke nsinsi.

⁵⁶Mary adaŋ ye enye ŋkpɔ nte ɔfiɔŋ ita, ndien ɔnyɔŋ ufɔk.

⁵⁷Ekem osim ini emi Elizabeth edimande eyen, ndien enye aman eyeneren.

⁵⁸Mbɔhiduŋ ye iman esie enyuŋ ekop ete, Jehovah ama anam mbɔm Esie okpon ɔnɔ enye; mmɔ enyuŋ edara ye enye.

⁵⁹Ekem ke ɔyɔhɔ usen itiaita mmɔ edi edinim eyen mbobi; ndien mmɔ emɔŋ edisio enye enyiŋ ete esie Zechariah.

⁶⁰Edi eka esie ɔbɔrɔ ete, baba; enye edikere John.

⁶¹Ndien mmɔ edɔhɔ enye ete, Baba owo kiet ke oruk fo ikereke enyiŋ oro.

⁶²Edi mmɔ enam idiɔŋɔ ebup ete esie enyiŋ eke enye oyomde esio enye.

⁶³Enye ete enɔ imɔ itiat-ŋwed, onyuŋ ewet ete, Enyiŋ esie edi John.

⁶⁴Ndien idem akpa mmɔ kpukpru. Idaha oro inua ye edeme esie atara, enye onyuŋ etiŋ ikɔ otoro Abasi.

⁶⁵Ndik omum kpukpru mbɔhiduŋ mmɔ: mmɔ enyuŋ esuan mbuk kpukpru ŋkpɔ oro ke edem obot-obot Judaea.

⁶⁶Ndien kpukpru owo eke ekopde emum mbuk oro ekama ke esit, ete, Nso oruk owo ke eyen emi edidi? Koro ubɔk Jehovah ododu ye enye.

⁶⁷Ekem Zechariah ete esie ɔyɔhɔ ye Edisana Spirit, enye onyuŋ etiŋ nte prophet, ete,

⁶⁸Itoro enyene Jehovah Abasi Israel; Koro Enye emedi ndise ikɔt Esie, onyuŋ afak mmɔ;

⁶⁹Onyuŋ anam nduk erinyaŋa otibe ɔnɔ nnyin Ke ufɔk owo Esie David,

⁷⁰(Kpa nte Enye akadade inua nti prophet Esie etiŋ toto ke eritɔŋɔ ererimbot),

⁷¹Ndinyaŋa nnyin nsio ke ubɔk mme asua nnyin, ye ke ubɔk kpukpru mmɔ emi esuade nnyin:

⁷²Nditua mme ete nnyin mbɔm, Ndinyuŋ nti edisana ediomi Esie,

⁷³Uŋwɔŋɔ oro Enye ɔkɔŋwɔŋɔde ɔnɔ Abraham ete nnyin,

⁷⁴Ete, ke ima isio nnyin, ke ubɔk mme asua nnyin, iyeyak nnyin Inam ŋkpɔ inɔ Imɔ ke ifure,

⁷⁵Ke edisana ido ye edinen ido ke iso Imɔ ke ofuri uwem nnyin.

⁷⁶Edi afo, eyen mi, eyekere prophet Andikoŋ-ŋkan: Koro afo eyebem Ɔbɔŋ iso ndidiɔŋ usuŋ Esie;

⁷⁷Ndinɔ ikɔt Esie ifiɔk erinyaŋa Ke erifen mme idiɔk-ŋkpɔ mmɔ

⁷⁸Oto ke esit mbɔm Abasi nnyin, Emi esinde usiere oto ke enyɔŋ edisim nnyin,

⁷⁹Ndiyama nnɔ mmɔ eke etiede ke ekim ye mfut mkpa; Nditeme ukot nnyin ndiduk ke usuŋ emem.

⁸⁰Edi eyen oro ɔkɔri, onyuŋ okop idem ke spirit; onyuŋ oduŋ ke desert tutu osim usen eke eyararede enye enɔ Israel.