Read efik LUKE 10 Bible Online

LUKE 10 - efik bible

LUKE 10

¹EKEM ke mme ŋkpɔ emi ema ekebe, Ɔbɔŋ onim owo ata ye duop eŋwen, onyuŋ ɔdɔŋ mmɔ esaŋa iba iba ebem Enye iso, eka ekeduk ke kpukpru obio ye ebiet, eke Enye ke Idem Esie oyomde ndika.

²Ndien do Enye ɔdɔhɔ mmɔ ete, Ke akpanikɔ idɔk okpon, edi mme enam-utom iwakke; ebeŋe ndien Enyene-idɔk, ete, Enye osio mme anamutom ɔdɔŋ edi ke idɔk Esie.

³Eka eke mbufo: sese, mmesio mbufo ndɔŋ nte nditɔ-erɔŋ ke ufɔt mme ekpe-ikɔt:

⁴Ekukama ekpat okuk, mme ekpat udia, mme ikpa-ukot: ekunyuŋ ekɔm owo ke usuŋ.

⁵Edi ufɔk ekededi eke mbufo edukde, ebem iso edɔhɔ ete, Yak emem odu ke ufɔk emi.

⁶Ndien edieke eyen emem odude do, emem mbufo eyedoro enye ke idem: edi edieke eyen emem miduhe, emem mbufo eyefiak etiene mbufo.

⁷Edi etie kpa ke ufɔk oro, edia enyuŋ eŋwɔŋ se enimde ke iso mbufo: koro eyen-utom odot ŋkpɔ-eyen-utom esie. Ekukpuhɔre itie-idaŋ mbufo ke erisaŋa ke ufɔk ke ufɔk.

⁸Ndien obio ekededi eke mbufo edukde, mbio oro enyuŋ enyimede ndidara mbufo, edia ŋkpɔ eke mmɔ enimde ke iso mbufo,

⁹enyuŋ enam udɔŋɔ okure mbon-udɔŋɔ emi edude do, enyuŋ esian mmɔ ete, Ubɔŋ Abasi ama asaŋa ekpere mbufo.

¹⁰Edi obio ekededi eke mbufo edukde, mbio oro minyuŋ inyimeke ndidara mbufo, ewɔrɔ ke efak esie, enyuŋ edɔhɔ ete,

¹¹Kpa ntan obio mbufo, eke adianade nnyin ke ikpat, ke nnyin ikeŋ ifep idian mbufo: edi efiɔk emi ete, Ubɔŋ Abasi ama asaŋa ekpere.

¹²Mmɔdɔhɔ mbufo nte, Ŋkpɔ eyefɔn ye Sodom ke usen ikpe akan ye obio oro.

¹³Eyedɔdiɔk ɔnɔ fi Chorazin! eyedɔdiɔk ɔnɔ fi Bethsaida! koro edieke ekpanamde ke Tyre ye sidon utom odudu emi ekanamde ke esit mbufo, mmɔ ekpakabare esit anyan ini esine ɔfɔŋ-ikpo, enyuŋ etie ke ntɔŋ.

¹⁴Edi ŋkpɔ eyefɔn ye Tyre ye Sidon ke ikpe akan ye mbufo.

¹⁵Ndien afo Capernaum, nte eyemenere okoŋ osim ikpa-enyɔŋ? eyesuhɔre fi osim obio ekpo.

¹⁶Owo eke okopde uyo mbufo okop uyo Mi; owo eke onyuŋ esinde mbufo esin Mi; owo eke esinde mi onyuŋ esin Enye emi ɔkɔdɔŋde Mi.

¹⁷Ndien mbet ata ye duop oro efiak edi ye idaresit edidɔhɔ Enye ete, Ɔbɔŋ, kpa mme demon esuk ibuot enɔ nnyin ke enyiŋ Fo.

¹⁸Edi Enye ɔdɔhɔ mmɔ ete,Mma ŋkut Satan otode ke enyɔŋ ɔduɔ nte emireŋ-mireŋ.

¹⁹Sese, mmɔnɔ mbufo odudu ndidigi urukikɔt ye ikpeyen ke ikpat, nnyuŋ ŋkara ofuri odudu usua: ndien baba ŋkpɔ kiet idinamke mbufo idiɔk.

²⁰Edi ekudat esit koro mme spirit esukde ibuot enɔ mbufo; edi edat esit koro ema ewet enyiŋ mbufo ke heaven.

²¹Ke ini oro Jesus okop idaresit ke Edisana Spirit, onyuŋ ɔdɔhɔ ete, Mmɔkɔm Fi, O Ete, Ɔbɔŋ enyɔŋ ye isɔŋ, koro Afo okodipde mbon eti ibuot ye mme asian mme ŋkpɔ emi, onyuŋ ayararede mmɔ ɔnɔ nsek-nditɔ. Edi ntre, Ete, koro enemde Fi ntem ke enyin.

²²Ete Mi amayak kpukpru ŋkpɔ ɔnɔ Mi: ndien baba owo kiet ifiɔkke enye emi Eyen edide ke mibɔhɔke Ete: owo inyuŋ ifiɔkke enye emi Ete edide ke mibɔhɔke Eyen, ye owo ekededi eke Eyen amade ndiyarare Enye nnɔ.

²³Ekem Enye ɔwɔŋɔre ese mbet Esie, onyuŋ ɔdɔhɔ mmɔ ke ndibe ete, Ɔfɔfɔn ɔnɔ mme enyin emi ekutde mme ŋkpɔ eke mbufo ekutde. Koro mmɔdɔhɔ mbufo nte,

²⁴ediwak mme prophet ye ndidem ema eyom ndikut mme ŋkpɔ eke mbufo ekutde, ndien ikekwe, ndinyuŋ ŋkop mme ŋkpɔ eke mbufo ekopde, ndien ikokopke.

²⁵Ndien sese, ɔfiɔk-ibet kiet adaha ke enyɔŋ edidomo Enye ete, Andikpep, ndinam nso man nnyene nsinsi uwem?

²⁶Edi Jesus ete enye, Ewewet didie ke ibet? okot didie?

²⁷Enye ɔbɔrɔ ete, Ma Jehovah Abasi fo ke ofuri esit fo, ye ke ofuri ukpɔŋ fo, ye ke ofuri odudu fo, ye ke ofuri ekikere fo; nyuŋ ma mbɔhiduŋ fo nte idem fo.

²⁸Jesus ɔdɔhɔ enye ete, Omotim ɔbɔrɔ: nam ntre, ndien eyedu uwem.

²⁹Edi sia owo oro oyomde ndiwut ete imɔ imenen, enye obup Jesus ete, Anie edi mbɔhiduŋ mi naŋa?

³⁰Jesus okpobi ikɔ esie, ete, Owo kiet okoto Jerusalem ɔsuhɔre aka Jericho; ndien ɔduɔ ke otu mbon ŋwo, emi ekpɔkde enye edisine-ŋkpɔ ke idem efep, emia enye, enyuŋ edaha ekpɔŋ enye ekpere mkpa.

³¹Edi nte ŋkpɔ anade, oku kiet ɔsuhɔre edi ke usuŋ oro, okut owo oro, onyuŋ asaŋa ebe ke ŋkaŋ eken.

³²Kpasuk ntre Levite kiet osim ɔtɔ oro, ada ese enye, onyuŋ asaŋa ebe ke ŋkaŋ eken.

³³Edi eyen Samaria kiet, emi asaŋade isaŋ, edisim ɔtɔ emi owo oro odude,

³⁴onyuŋ okut enye, atua enye mbɔm, asaŋa adiana enye, ɔtɔhɔ wine ye aran ke unan esie, onyuŋ ɔbɔp mmɔ: onyuŋ emen enye odori ke enyɔŋ enaŋ esiemɔ, ada enye edi ke ufɔk-isen, onyuŋ ekpeme enye.

³⁵Ndien ke ndaŋ-nsiere enye osio okuk iba ɔnɔ ete ufɔk, ete enye, Kpeme owo emi; ndien mma mfiak ndi, nyesio se edibiatde akan oro nnɔ fi.

³⁶Ke otu owo ita oro, ese ete anie edi mbɔhiduŋ owo emi ɔkɔduɔde ke otu mbon ŋwo?

³⁷Ɔfiɔk-ibet ɔbɔrɔ ete, Edi owo emi akatuade enye mbɔm. Ekem Jesus ɔdɔhɔ ete, Ke kanam kpasuk ntre.

³⁸Edikem nte mmɔ esaŋade isaŋ, Jesus oduk ke obio-iŋwaŋ kiet; ŋwan emi ekerede Martha onyuŋ ada Enye oduk ke ufɔk.

³⁹Ndien Martha enyene eyen-eka aŋwan emi ekerede Mary, emi onyuŋ etiede ke isɔŋ ke ukot Ɔbɔŋ, okop ikɔ Esie.

⁴⁰Edi utom eke Martha aŋwanade ndinam nnɔ isen efihe enye akaha; ndien enye edi edidɔhɔ ete, Ɔbɔŋ, nte ukereke emi eyen-eka mi ɔkpɔŋde utom ɔnɔ mi ikpɔŋ? dɔhɔ enye edi ediŋwam mi naŋa.

⁴¹Edi Ɔbɔŋ ɔbɔrɔ ete, Martha, Martha, afo ayak ediwak ŋkpɔ etimere fi ekikere, enyuŋ enɔ fi afanikɔŋ:

⁴²ŋkpɔ kiet edi se nyomde; koro Mary ememek eti udeme, eke midibɔhɔ enye ifep.