Read efik LUKE 12 Bible Online

LUKE 12 - efik bible

LUKE 12

¹KE idaha oro, ke adaŋemi ediwak thousand owo ema ekobono ɔtɔ kiet, tutu mme owo edigi kiet eken, Enye ɔtɔŋɔ ndidɔhɔ mbet Esie ke akpa, ete Ekpeme idem ye leaven mme Pharisee, emi edide mbubik.

²Edi ŋkpɔ iduhe eke efukde fuk, eke midiyarakere; ŋkpɔ inyuŋ iduhe eke edipde dip, eke owo midifiɔkke.

³Mmɔdo ikɔ ekededi eke mbufo etiŋde ke ekim ke eyekop ke uŋwana, odu eke mbufo edɔŋde ke utɔŋ owo ke ndibe ubet, ke eyekwɔrɔ ke enyɔŋ ɔkɔm.

⁴Edi mmɔdɔhɔ mbufo, mme ufan Mi, nte, Ekufehe mmɔ emi ewotde ikpɔhidem, ndien ke ebede oro, mikemeke ndinam nkpɔ efen.

⁵Edi nyesian mbufo Enye emi ekpefehede; efehe Enye emi, ke ama owot; onyuŋ enyenede odudu ndiduɔk ke hell: mmɔsɔŋɔ ndɔhɔ mbufo nte, efehe Enye.

⁶Nte inyamke ŋkpri inuen ition ke obubit okuk iba?

⁷Ndien Abasi ifreke ndomo mmɔ kiet. Edi emebat kpa idet kpukpru ke ibuot mbufo. Ekufehe ndien: mbufo emesɔŋ urua ekan ediwak ŋkpri inuen.

⁸Ndɔhɔ mbufo nte, Kpukpru owo eke edinyimede ke iso owo ete, Idi okim, Eyen Owo eyenyuŋ onyime ete, Mmɔ oro edi eke Imɔ ke iso mme angel Abasi:

⁹edi owo eke akaŋde mi ke iso owo ete, Imɔ idige okim, eyenyuŋ ekaŋ enye ke iso mme angel Abasi.

¹⁰Ndien kpukpru owo eke editiŋde ikɔ adian Eyen Owo, eyefen enye: edi owo eke editiŋde ikɔ-isuŋi adian Edisana Spirit, idifenke enye.

¹¹Edi kadaŋemi mmɔ edidade mbufo eka ke mme synagogue ye ke iso mme andikara, ye mme enyene-odudu, ekutimere esit ekere ebaŋa ido nte mbufo edibɔrɔde ke nyaŋa-idem, me se mbufo editiŋde:

¹²koro kpa ke idaha oro Edisana Spirit eyeteme mbufo se mbufo enyenede nditiŋ.

¹³Edi owo kiet ke otu oro ɔdɔhɔ Enye ete, Andikpep, dɔhɔ eyen-eka mi abahare akpa ete nnyin ye ami.

¹⁴Edi Jesus ete enye, Owo, anie okonim Mi nte ebierikpe ye edeme-udeme ke ufɔt mbufo?

¹⁵Enye onyuŋ ɔdɔhɔ mmɔ ete, Etim ekpeme idem mbufo ke kpukpru oruk erisin esit ke ŋkpɔ owo: koro owo enyene se enyenyene, uwem esie isineke enye ke ubɔk.

¹⁶Edi Enye otop ŋke ɔnɔ mmɔ ete, Iŋwaŋ owo inyene kiet ɔfɔn ŋkpɔ eti-eti;

¹⁷enye onyuŋ eneni ke esit esie ete, Ndinam nso ŋkpɔ? koro nnyeneke ebiet eke mbonde ŋkpɔ mi.

¹⁸Ndien enye ɔdɔhɔ ete, Nyenam emi: nyewuri mme ufɔk-ubon-udia mi, nnyuŋ mbɔp se ikponde ikan; do ke ndibon kpukpru mfri ye inyene mi.

¹⁹Ndien nyedɔhɔ ukpɔŋ mi nte, Ukpɔŋ mi, omobon ediwak ŋkpɔ nte edikemde ediwak isua; da nduɔk-odudu, dia nyuŋ ŋwɔŋ, nyuŋ dat esit.

²⁰Edi Abasi ɔdɔhɔ enye ete, Afo anana ibuot, eye-kpak ukpɔŋ fo ke ubɔk fo ke okoneyo emi; ndien anie edidia ŋkpɔ eke ɔkɔkɔde onim?

²¹Ntem ke etie ye owo eke ɔkɔde inyene ɔnɔ idem esie, edi minyeneke inyene ke ŋkaŋ Abasi.

²²Edi Enye ɔdɔhɔ mbet Esie ete, Mmɔdo ndɔhɔ mbufo nte, Ekutimere esit ebaŋa uwem mbufo, ete, ididia nso? mme ikpɔhidem mbufo, ete, idisine nso?

²³Uwem akan udia, ikpɔhidem onyuŋ akan edisine-ŋkpɔ.

²⁴Ese mme inuen enyɔŋ, ete, mmɔ itɔhɔ tɔ, inyuŋ idɔkke dɔk; inyeneke ubet ubon-ŋkpɔ ye ufɔk ibokpot; ndien Abasi ɔbɔk mmɔ; mbufo emekpon ekan mme inuen adaŋa didie!

²⁵Anie ke otu mbufo ekeme ndida ekikere ndian ibio idomo okuk kiet ke idaha esie?

²⁶Edieke mbufo mikemeke ndien ndinam kpa se idide ata ekpri, nsinam mbufo etimerede esit ekere ebaŋa mme ŋkpɔ efen?

²⁷Ese ekpɔŋ-idim nte mmɔ ekɔride: mmɔ ifiakke ndidi, inyuŋ idɔkke ɔfɔŋ; edi ndɔhɔ mbufo nte, Solomon ke ofuri ubɔŋ esie ikesineke se iyede nte kiet ke otu mmɔ.

²⁸Edi edieke Abasi esinede mbiet iŋwaŋ ŋkpɔ ntem, kpa mbiet eke odude mfin, ndien mkpɔŋ emen esin ke usaŋ-uyo; adaŋa didie akan oro ke Enye edisine mbufo ŋkpɔ, O nditɔ ekpri mbuɔtidem?

²⁹Mbufo ekunyuŋ eyom se mbufo edidiade, ye se mbufo ediŋwɔŋde, ekunyuŋ eyik ke ekikere esit mbufo.

³⁰Koro mme idut ererimbot eyom kpukpru mme ŋkpɔ emi: edi Ete mbufo ɔmɔfiɔk ete mme ŋkpɔ emi enana mbufo.

³¹Ekam eyom Obio Ubɔŋ Abasi, ndien eyedian mme ŋkpɔ emi enɔ mbufo.

³²Ekufehe ndik, ekpri otu erɔŋ; koro edide eti uduak Ete mbufo ndida Obio Ubɔŋ oro nnɔ mbufo.

³³Enyam se mbufo enyenede eda efɔn ido ye mme ubuene; enam ekpat-okuk eke midikanike enɔ idem mbufo; ebon inyene ke heaven eke midikpuhu mbufo, ke ɔtɔ inɔ misaŋake ikpere, uta-ŋkpɔ minyuŋ ibiatke.

³⁴Koro ɔtɔ nte ŋkpɔ-uto mbufo odude, do ke esit mbufo edinyuŋ odu.

³⁵Efak ɔfɔŋ ke isin mbufo eda, enam mme utuenikaŋ mbufo esak;

³⁶mbufo ke idem mbufo enyuŋ ebiet mmɔ emi etiede ebet ete-ufɔk mmɔ, ke ini enye editode udia-ndɔ ɔnyɔŋ; man ke adaŋemi enye edidide edituak usuŋ, mmɔ ekpeberere enɔ enye ini kiet.

³⁷Ɔfɔfɔn ɔnɔ mme asaŋutom emi ete mmɔ edidide okut mmɔ etiede ekpeme; ke akpanikɔ ke ndɔhɔ mbufo nte, enye ke idem esie eyefak ɔfɔŋ, anam mmɔ etetie ke okpokoro udia, onyuŋ ada mbet ɔnɔ mmɔ.

³⁸Edieke edinyuŋ edide ufɔt okoneyo, mme ŋkpɔusen, ke enye edidi okut mmɔ enamde ntem, ɔfɔfɔn ɔnɔ mme asaŋutom oro.

³⁹Edi efiɔk emi ete, edieke enyene-ufɔk ɔkpɔfiɔkde ini eke inɔ edidide, enye ekpekpeme, ikponyuŋ iyakke ebuŋ ufɔk esie eduk.

⁴⁰Mbufo nde ebeŋe idem: koro Eyen Owo eyedi ke ini eke mbufo midorike enyin.

⁴¹Edi Peter ɔdɔhɔ Enye ete, Ɔbɔŋ, nte Afo otop ŋke emi ɔnɔ nnyin, mme otop ɔnɔ kpukpru owo?

⁴²Ndien Ɔbɔŋ ɔdɔhɔ ete, Anie ndien edi akama-ukpɔhɔre, emi anamde akpanikɔ onyuŋ edide ɔniɔŋ, emi ete-ufɔk esie edinimde enye nte andikara kpukpru mbon ufɔk esie, man enye edeme udia ɔnɔ mmɔ ke edikem ini?

⁴³Ɔfɔfɔn ɔnɔ asaŋutom oro ete-ufɔk esie edidide okut enye anamde ntem.

⁴⁴Ke akpanikɔ ke ndɔhɔ mbufo nte, ete ufɔk esie eyenam enye edi andikara kpukpru se enyenede.

⁴⁵Edi edieke asaŋutom oro edidɔhɔde ke esit esie ete, Ete-ufɔk mi ebigi eridi, edinyuŋ ɔtɔŋɔde ndimia ifin iren ye ifin iban eken, ndinyuŋ ndia ŋkpɔ, nnyuŋ ŋŋwɔŋ mmin nyuhɔ;

⁴⁶ete-ufɔk owo oro eyedi ke usen eke enye midorike enyin, ye ke hour eke enye mifiɔkke, eyenyuŋ amia enye akamba ufen, onyuŋ ɔnɔ enye udeme ke otu mmɔ emi minimke ke akpanikɔ.

⁴⁷Edi ofin emi ɔkɔfiɔkde mbet ete esie, ndien mibeŋeke idem, minyuŋ inamke nte uduak esie etemede, eyemia enye ediwak ubɔk ikpa; edi enye emi mifiɔkke,

⁴⁸ndien anamde ŋkpɔ eke edotde ufen, eyemia enye ubɔk eke miwakke. Ndien owo ekededi eke enɔde enye ediwak ŋkpɔ, ke ediyom ediwak ŋkpɔ ke ubɔk esie: kpa ntre ŋko owo eke eyakde ediwak ŋkpɔ enɔ enye, ke ubɔk esie ke edibup se iwakde ikan.

⁴⁹Ŋkedi ndisin ikaŋ ke isɔŋ: ikaŋ oro akpakam obubere naŋa!

⁵⁰Edi mmenyene baptism eke edinimde Mi; ndien ndu ke mbaba adaŋa didie tutu enam enye ema!

⁵¹Nte mbufo ese ete ŋkedi ndida emem ndi ke isɔŋ? Ndɔhɔ mbufo nte, Baba;

⁵²akam edi ubahare ke nda ndi; koro ɔtɔŋɔde ke emi ubahare eyedu ke otu owo ition ke ufɔk kiet, owo ita eda ŋkaŋ kiet, iba eda ke ŋkaŋ eken.

⁵³Ete eyedianare ye eyen-eren esie, eyen eyenyuŋ adianare ye ete; eka eyedianare ye eyen esie aŋwan, eyen-aŋwan eyenyuŋ adianare ye eka; eka ebe eyedianare ye ŋwan eyen, ŋwan eyen eyenyuŋ adianare ye eka ebe.

⁵⁴Enye onyuŋ ɔdɔhɔ mme otu owo ete, Ke ini mbufo ekutde idiɔk enyɔŋ ɔwɔrɔde ke edem usop-utin, idaha oro mbufo ete, Edim ke edi; ndien osu ke uyo mbufo.

⁵⁵Ke ini ofim usuk onyuŋ abarade, mbufo ete, Eyo eyefiop eti-eti; ndien ɔwɔrɔ kpasuk ntre.

⁵⁶Mme mbubik, mbufo emefiɔk mme idiɔŋɔ eke edude ke iso isɔŋ ye ikpa-enyɔŋ; nsidi ndien ntak eke mbufo midomoke ini emi ifiɔk.

⁵⁷Nsinyuŋ idi ntak eke mbufo ke idem mbufo midomoke ŋkpɔ ibiere se inende?

⁵⁸Ke ini afo asaŋade ye owo-utɔk fo aka ke iso ebierikpe, ŋwana eti-eti ndinam emem ye enye ke usuŋ; mbak enye edidudi fi aka ke iso ebierikpe, ebierikpe onyuŋ ayak fi iɔnɔ isuŋutom, isuŋutom onyuŋ esin fi ke ufɔk-ŋkpɔkɔbi.

⁵⁹Ndɔhɔ fi nte, uduwɔrɔke do, tutu osio akpatre okuk isɔn fo.