Read efik LUKE 13 Bible Online

LUKE 13 - efik bible

LUKE 13

¹NDUSUK owo edu do ke ini oro, emi etiŋde enɔ Jesus ebaŋa mbio Galilee, emi Pilate akadade iyip mmɔ abuak ye uwa mmɔ.

²Enye ɔbɔrɔ mmɔ ete, Nte mbufo ese ete mbio Galilee emi ediɔk ekan ofuri mbio Galilee, koro mmɔ ekutde utɔ ukut-ukut ŋkpɔ oro?

³Ndɔhɔ mbufo nte, idige ntre: edi ke mbufo mikabakere esit, mbufo kpukpru eyetak kpa ntre.

⁴Ŋko-ŋko owo efureta emi tower Siloam ɔkɔduɔde ɔtɔ mmɔ owot, nte mbufo ese ete mmɔ edi mme abiat-ibet ekan kpukpru mme andiduŋ ke Jerusalem?

⁵Ndɔhɔ mbufo nte, idige ntre: edi ke mbufo mikabakere esit, mbufo kpukpru eyetak kpa ntre.

⁶Enye onyuŋ otop ŋke emi ete, Owo kiet ekenyene eto fig emi etɔde ke iŋwaŋ-vine esie; enye onyuŋ edi ediyom mfri ke esit, edi ikwe.

⁷Ekem enye ɔdɔhɔ ekpeme-iŋwaŋ-vine esie, ete, Sese, mmedi isua ita emi nyom mfri ke eto emi, ndien ŋkwe: kpi enye duɔk; enye ada mi didie onyuŋ abiat isɔŋ ikpikpu?

⁸Edi ekpeme-iŋwaŋ-vine ɔbɔrɔ enye ete, Ɔbɔŋ mi, yak enye ada do ke isua emi iŋko, tutu ntibi isɔŋ ŋkanare enye ŋkuk, nnyuŋ nduɔŋɔ mbio ke esit:

⁹ndien edieke enye ediŋwumde mfri isua efen, eyefɔn; edi miŋwumke, kpi enye duɔk.

¹⁰Enye ke ekpep mmɔ ŋkpɔ ke synagogue kiet ke sabbath.

¹¹Ndien sese, ŋwan emi enyenede spirit mbiak-idem isua efureta; enye onyuŋ ɔnuhɔ, inyuŋ ikemeke ndineŋere nda baba esisit.

¹²Edi ke ini Jesus okutde enye, okot enye ete, Ŋwan owo, etat uruk mbiak-idem fo.

¹³Enye onyuŋ odori enye ubɔk ke idem: ndien ndo-ndo oro idem esie eneŋere, enye onyuŋ otoro Abasi.

¹⁴Edi etubom synagogue ayat esit koro Jesus anamde udɔŋɔ okure ke sabbath onyuŋ ɔdɔhɔ mbio oro, ete, Usen itiokiet edu nte owo ekpenamde utom ke esit: mbufo edi ke mme usen oro, man enam udɔŋɔ ekure mbufo; ekudi ke sabbath.

¹⁵Edi Ɔbɔŋ ɔbɔrɔ enye ete, Mbon mbubik, nte kpukpru mbufo kiet kiet itatke enaŋ ye ass esie ke ufɔk-enaŋ ke sabbath, ida mmɔ iwɔrɔ ika itie uŋwɔŋ-mmɔŋ?

¹⁶Edi ama edi ŋwan emi, emi edide eyen Abraham, emi Satan ɔkɔbɔpde ofuri isua efureta emi, nte ikpatatke enye uruk ke usen sabbath?

¹⁷Ndien ke ini Enye ɔdɔhɔde ikɔ emi, but anam kpukpru mme asua Esie: kpukpru mbio-obio enyuŋ edat esit ke kpukpru mme utibe ŋkpɔ eke Enye anamde.

¹⁸Ntre ke Enye ɔdɔhɔ ete, Ubɔŋ Abasi ebiet nso? nso ke ndinyuŋ nda ndomo ye enye?

¹⁹Ebiet mkpasip mustard kiet, eke owo adade ɔtɔ ke iŋwaŋ -esa esie; ndien ɔkɔri okpon, akabare eto; mme inuen enyɔŋ enyuŋ ekubɔ ke mme ŋkɔk esie.

²⁰Enye ɔtɔŋɔ ntak ɔdɔhɔ ete, Nso ke ndida ndomo ye Ubɔŋ Abasi?

²¹Ebiet leaven eke ŋwan emende esin ke udomo ndom-uyo ita, tutu leaven asuana ɔyɔhɔ ofuri ndom-uyo.

²²Ekem Enye asaŋa ebe ke ikpɔ obio ye obio-iŋwaŋ ekpep owo ŋkpɔ, onyuŋ asaŋa aka Jerusalem.

²³Edi owo kiet ɔdɔhɔ Enye ete, Ɔbɔŋ, nte mmɔ emi enyaŋade iwakke?

²⁴Edi Enye ɔbɔrɔ mmɔ ete, Mbufo eŋwana eti-eti ndibe ke mfafaha inua-otop nduk: koro ndɔhɔ mbufo nte, ediwak owo eyeyom ndiduk, ndien idikemeke.

²⁵Ke adaŋemi ete-ufɔk adahade ke enyɔŋ eberi usuŋ, ndien mbufo etɔŋɔ ndida ke aŋwa ntuak usuŋ, ete, Ɔbɔŋ, sio usuŋ nɔ nnyin; ndien Enye eyebɔrɔ mbufo ete, Mfiɔkke ebiet eke mbufo etode;

²⁶mbufo eyetɔŋɔ ndien ndidɔhɔ ete, Nnyin ima idia inyuŋ iŋwɔŋ ŋkpɔ ke iso Fo; Afo ama onyuŋ ekpep ŋkpɔ ke mme efak nnyin.

²⁷Ndien Enye eyebɔrɔ ete, ndɔhɔ mbufo nte, Mfiɔkke ebiet eke mbufo etode; edianare Mi, kpukpru mbufo mme anam-ukwaŋkpɔ.

²⁸Do ke eritua eyet ye erita edet eyedu, ke ini mbufo edikutde Abraham ye Isaac ye Jacob, ye kpukpru mme prophet ke Obio Ubɔŋ Abasi, ndien edisiode mbufo ke idem mbufo eduɔk ke aŋwa.

²⁹Ndien mme owo eyeto ke edem usiaha-utin ye edem usop-utin, ye edere ye usuk, edisuhɔre etetie ke Obio Ubɔŋ Abasi.

³⁰Ndien sese, mme ekperedem edu eke edibemde iso, mme ebeiso enyuŋ edu eke edikperede edem.

³¹Kpa ke ini oro ndusuk mme Pharisee edi edidɔhɔ Enye ete, Wɔrɔ, daha, kpɔŋ edem emi; koro Herod oyomde Fi ndiwot.

³²Edi Enye ɔdɔhɔ mmɔ ete, Eka ekɔdɔhɔ ebua-ikɔt oro ete, Sese, mmebin demon nduɔk, nnyuŋ nnam udɔŋɔ ekure mfin ye mkpɔŋ, ndien ke ɔyɔhɔ usen ita eyenam Mi mfɔn mma.

³³Edi mmenyene ndisaŋa ke isaŋ Mi mfin ye mkpɔŋ ye okut: koro ikemeke ndidi ete prophet eyekpa ke midige ke Jerusalem.

³⁴O Jerusalem, Jerusalem emi owotde mme prophet, onyuŋ ɔtɔŋɔde mmɔ emi edɔŋde etiene fi ke itiat! Adaŋa ediwak ini didie ke ŋkoyom nditaŋ nditɔ fo mbon ɔtɔ kiet, kpa nte unen obonde nditɔ esie ke idak mba esie, ndien mbufo ikonyimeke!

³⁵Sese, eyak ufɔk mbufo ekpɔŋ enɔ mbufo; edi ndɔhɔ mbufo nte, Mbufo idikwe Mi, tutu osim ini eke mbufo edidɔhɔde ete, Itoro enyene Enye emi edide ke enyiŋ Jehovah.