Read efik LUKE 14 Bible Online

LUKE 14 - efik bible

LUKE 14

¹EDIKEM ke ini Jesus odukde ke ufɔk ɔbɔŋ mme Pharisee kiet ke sabbath ndidia ŋkpɔ, mmɔ etiŋ enyin ekpeme Enye.

²Ndien sese, owo kiet emi ɔdɔŋɔde mfuri odu Enye ke iso.

³Jesus ɔbɔrɔ mme ɔfiɔk-ibet ye mme Pharisee ete,

⁴Nte enem ndinam udɔŋɔ okure ke sabbath, mme inenke? Edi mmɔ edodop. Ekem Enye anyan ubɔk omum owo oro, anam udɔŋɔ okure enye, onyuŋ ɔdɔhɔ enye ete, ɔnyɔŋ.

⁵Jesus onyuŋ ɔdɔhɔ mmɔ ete, Anie ke otu mbufo edinyene ass mme enaŋ, eke ɔduɔde ke obube mmɔŋ, idinyuŋ idudike enye isio ini kiet ke sabbath?

⁶Ndien mmɔ ikemeke ndineni ŋkpɔ emi.

⁷Enye onyuŋ otop ŋke ɔnɔ mmɔ emi ekekotde udia, ke ini Enye okutde nte mmɔ emekde ikpɔ itie: ete mmɔ,

⁸Ke ini owo okotde fi edi udia-ndɔ, kusuhɔre utie ke akamba itie: mbak ndusuk ema ekot owo eke okponde akan fi, ndien andikot fi ye enye edidɔhɔ fi ete, No owo emi itie;

⁹ndien adaŋoro afo eyetɔŋɔ ye but ndisuhɔre ŋka ke itie eke ekpride akan.

¹⁰Edi ke ini ekotde fi, ka ketie ke itie eke ekpride akan; man ke ini andikot fi ama edi, enye ekpekeme ndidɔhɔ fi ete, Ufan, dɔk di: adaŋoro afo eyenyene ukpono ke iso kpukpru mmɔ emi etiede ke itie-udia ye afo.

¹¹Koro kpukpru owo eke emenerede idem esie, eyesuhɔre enye enim; ndien owo eke ɔsuhɔrede idem esie, eyemenere enye.

¹²Enye onyuŋ ɔdɔhɔ owo emi okokotde Enye udia ete, Ke adaŋemi afo anamde udia uwemeyo mme udia mbubreyo, kukot mme ufan fo mme nditɔ-usɔ, mme imanfo, mme mbɔhiduŋ fo emi edide mme enyene-ŋkpɔ; mbak ndusuk mmɔ edikot fi ŋko, enyuŋ esio usiene enɔ fi.

¹³Edi ke ini afo anamde udia, kot mme ubuene, ye mmɔ emi edade unan, ye mbuŋɔ, ye nnan;

¹⁴ndien eyefɔn ye afo: koro mmɔ minyeneke se edidade esio fi usiene: edi eyenɔ fi usiene ke ini eriset nti owo.

¹⁵Edi kini owo kiet eke etiede ke itie-udia ye Enye okopde mme ikɔ emi, enye ete, Ɔfɔnfɔn ɔnɔ owo emi edidiade ŋkpɔ ke Obio Ubɔŋ Abasi.

¹⁶Edi Jesus ɔdɔhɔ enye ete,Owo kiet akanam akamba udia, onyuŋ okot ediwak owo:

¹⁷ndien ke ini ekemde ini udia, enye ɔdɔŋ isuŋutom ɔkɔdɔhɔ mmɔ emi ekokotde ete, Edi, koro ema enam kpukpru ŋkpɔ ema.

¹⁸Edi kpukpru mmɔ etɔŋɔ ye esit kiet ndiyom ikɔ ndibɔrɔ. Akpa owo ete enye, Mmedep iŋwaŋ, ndien nnyene ndika ŋkese; mbɔk, ŋkwe nte ndide.

¹⁹Owo efen ete, Mmedep enaŋ duop, ndien ŋka ŋkodomo mmɔ nse; mbɔk, ŋkwe nte ndide.

²⁰Efen ete, Mmɔdɔ ndɔ; oro esin ŋkemeke ndidi.

²¹Isuŋutom oro edi editiŋ mme ŋkpɔ emi ɔnɔ ete esie. Ekem ete-ufɔk ayat esit, onyuŋ ɔdɔhɔ isuŋutom oro ete, Wawara wɔrɔ ka ke mme efak, ye ŋkpri efak obio, nyuŋ da mme ubuene, ye mmɔ emi edade unan ye nnan ye mbuŋɔ, duk di.

²²Ndien isuŋutom oro edidɔhɔ ete, Ɔbɔŋ, ema enam nte ɔkɔdɔhɔde, edi itie ke ɔsɔsuhɔ kaŋa.

²³Ɔbɔŋ oro ɔdɔhɔ isuŋutom esie ete, Wɔrɔ ke mme ɔkpɔusuŋ ye ke mme mben-ɔkɔ, nyuŋ yire mmɔ eduk edi, man ufɔk mi ɔyɔhɔ.

²⁴Koro ndɔhɔ mbufo nte, baba owo kiet ke otu mmɔ emi ekekotde iditabike udia mi.

²⁵Ekem akwa otu owo esaŋa ye Enye: Enye onyuŋ ɔwɔŋɔre ese mmɔ, onyuŋ ɔdɔhɔ mmɔ ete,

²⁶Edieke owo etienede Mi, ndien misuaha ete esie, ye eka esie, ye ŋwan esie, ye nditɔ esie, ye nditɔ-eka esie iren, ye nditɔ-eka esie iban, ye uwem esie ŋko, enye ikemeke ndidi owo mbet Mi.

²⁷Owo ekededi eke minyuŋ ibiomke cross esie itiene Mi ke edem ikemeke ndidi owo mbet Mi.

²⁸Koro anie owo ke otu mbufo, emi oyomde ndikɔŋ tower, idibemke iso itie ibat se iditakde enye, man enye ɔfiɔk mme emeyene okuk nte edikemde ndida nnam utom mma?

²⁹Mbak ndusuk utom edikak enye ke ini enye ama ɔkɔtɔŋɔ ndibɔp, ndien kpukpru mmɔ emi ekutde etɔnɔ ndisak enye, ete,

³⁰Owo emi ɔkɔtɔŋɔ ndikɔŋ ufɔk, edi ikemeke ndinam mma.

³¹Ŋko, anie edidem, emi ɔwɔrɔde aka ekɔŋ ye edidem eŋwen, idibemke iso itie ikere mme enye eyekeme ndida thousand owo duop ŋŋwana ekɔŋ ye enye emi asaŋade ye thousand owo edip edi ediŋwana ye enye?

³²Ndien edieke enye mikemeke, ke ini enye eken osuk odude kaŋa anyan ebiet, enye ɔdɔŋ mme isuŋutom, ete ebup se idinamde man emem odu.

³³Kpa ntre ke owo mbufo ekededi, eke misanake kpukpru se enye enyenede iyak, ikemeke ndidi mbet Mi.

³⁴Ke akpanikɔ inuŋ ɔfɔn: edi inuŋ ama akabare adaba, edida nso enam enye enem.

³⁵Inamke ufɔn ke isɔŋ, inyuŋ inamke ke ifum: etop enye eduɔk. Owo eke enyenede utɔŋ ndikop, yak okop.