Read efik LUKE 15 Bible Online

LUKE 15 - efik bible

LUKE 15

¹EDI kpukpru mme publican ye mme idiɔk owo ekasaŋa ekpere Enye, ndikop ikɔ Esie.

²Ndien mme Pharisee ye mme scribe esuk uyo ete, Owo emi adadara mme idiɔk owo, onyuŋ adia ŋkpɔ ye mmɔ.

³Edi Enye otop ŋke emi ɔnɔ mmɔ, ete,

⁴Ewe owo ke otu mbufo edinyene erɔŋ ikie, ndien kiet osop, idikpɔŋke anaŋ ye efurenaŋ ke desert, ibine erɔŋ oro osopde, tutu okut.

⁵Ndien ama okut enye, odori ke afara esie adat esit.

⁶Ndien ke ini enye osimde ufɔk, okot mme ufan ye mbɔhiduŋ esie edi, ete mmɔ, Edara ye ami, koro mma ŋkut erɔŋ mi emi okosopde.

⁷Ndɔhɔ mbufo nte, Kpasuk ntre ke idara edidu ke heaven abaŋa idiɔk owo kiet emi akabarede esit, akan nti owo anaŋ ye efurenaŋ, emi minyeneke se ekabarede esit ebaŋa.

⁸Ŋko ewe ŋwan edinyene mbak silver duop, ndien kiet ɔbɔhɔ enye osop, ididomoke utuenikaŋ ikpɔri ufɔk itim iyom, tutu ɔfiɔhɔ.

⁹Ndien ama ɔfiɔhɔ, okot mufan ye mbɔhiduŋ esie edi, ete mmɔ, Edara ye ami, koro mma mfiɔhɔ okuk emi okosopde.

¹⁰Ndɔhɔ mbufo nte, Kpasuk ntre ke idara odu ke iso mme angel Abasi abaŋa owo kiet emi akabarede esit.

¹¹Enye onyuŋ ɔdɔhɔ ete, Owo kiet ekenyene nditɔ-iren iba:

¹²ndien udɔ ɔdɔhɔ ete esie ete, Ete, nɔ mi udeme ŋkpɔ eke edinyenede mi. Ntem ke ete edeme inyene esie ɔnɔ mmɔ.

¹³Ibigike bigi udɔ ataŋ kpukpru se enyenede, adaha aka anyan idut; ndien do ke enye asuan inyene esie ke eridu otime uwem.

¹⁴Edi ke ini enye ama akasuan kpukpru ama, ɔkpɔsɔŋ akaŋ otibe ke idut oro; enye onyuŋ ɔtɔŋɔ ndidu ke unana.

¹⁵Ndien enye aka akadian idem ye eyen idut oro, enye oro onyuŋ ɔdɔŋ enye aka iŋwaŋ ɔkɔbɔk mme edi.

¹⁶Enye onyuŋ oyom ndidia ikpɔk udia, eke mme edi ediade, nyuhɔ; owo inyuŋ inɔŋɔ enye ŋkpɔ.

¹⁷Edi ke ini enyin aŋwaŋade enye, enye okut idem sie, ete, Sese, adaŋa ediwak mbio-utom ete mi enyene udia eke awakde akan mmɔ ndidia edi se mi mi, mmɔŋ ndikpa ye biɔŋ.

¹⁸Nyedaha nnyuŋ ntiene ete mi, nnyuŋ ndɔhɔ enye nte, Ete, mmanam idiɔk-ŋkpɔ ndian heaven ye ke iso fo:

¹⁹ndotke aba ndikere eyen fo: da mi nte owo-utom fo kiet.

²⁰Ndien enye adaha ke enyɔŋ etiene ete esie. Edi ke ini enye odude kaŋa nsan-nsan, ete esie okut enye, onyuŋ atua enye mbɔm, efehe, awaŋa enye ke itɔŋ, onyuŋ otim enye inua.

²¹Edi eyen ɔdɔhɔ enye ete, Ete, mmanam idiɔk-ŋkpɔ ndian heaven ye ke iso fo: ndotke aba ndikere eyen fo.

²²Edi Ete ɔdɔhɔ ikɔt esie ete, Ewara eda ata eti ɔfɔŋidem oro edisine enye; enyuŋ esine enye mkpanuen ke ubɔk ye ikpa-ukot ke ukot:

²³enyuŋ eda-enaŋ emi enyenede isek ewot, eyak nnyin idia inyuŋ idat esit:

²⁴koro eyen mi emi ama akpa, onyuŋ ɔtɔŋɔ ntak odu uwem; enye ama osop, ndien ikut enye. Ntre ke mmɔ etɔŋɔ ndinam mbre.

²⁵Edi akpan esie odu ke iŋwaŋ: ndien nte enye asaŋade ekpere ufɔk, okop ikwɔ ye unek;

²⁶ndien enye okot eyen-ufɔk kiet, obup enye se mme ŋkpɔ oro ewɔrɔde.

²⁷Enye oro ɔdɔhɔ ete, Eyen-uka amafiak edi: ete fo ama onyuŋ owot eyen-enaŋ eke enyenede isek, koro okutde enye ye nsɔŋ-idem.

²⁸Edi akpan oro akpaha esit, inyuŋ inyimeke ndiduk; ntre ke ete esie ɔwɔrɔ edi edikpe ye enye.

²⁹Edi enye ɔbɔrɔ ete esie, ete, Sese, mmanam utom nnɔ fi adaŋa ediwak isua emi, akanam nnyuŋ nnenike uyo fo: edi akananam afo unɔŋɔ mi ndomo eyen ebot kiet, ete nda nnam mbre ye mme ufan mi:

³⁰edi ke adaŋami eyen fo emi ama ekedi, emi akadiade inyene fo ye mme akpara, afo ama owot eyen-enaŋ eke enyenede isek ɔnɔ enye.

³¹Edi ete ɔdɔhɔ enye ete, Eyen mi, afo odu ye ami kpukpru ini, kpukpru se inyenede mi onyuŋ enyene fi.

³²Edi odot nnyin ndidara nnyuŋ nnem esit, koro eyen-eka fo emi ama akpa, onyuŋ odu uwem: ama osop, ndien ikut enye.