Read efik LUKE 17 Bible Online

LUKE 17 - efik bible

LUKE 17

¹ENYE onyuŋ ɔdɔhɔ mbet Esie ete, Ana nte ŋkpɔ iduɔ edu; edi eyedɔdiɔk ɔnɔ owo eke adade mmɔ edi.

²Ɔkpɔfɔn ye enye owo ndikpada itiat-ɔkɔk ibo-kpot ŋkɔŋɔ enye ke itɔŋ, ndien eduɔk enye ke inyaŋ, akan enye ndinam ŋkpri nditɔ emi kiet ɔduɔ.

³Etim ekpeme idem mbufo; edieke eyen-ete fo eduede fi, sua nɔ enye; ndien edieke enye atuade mkpɔfiɔk dahado nɔ enye.

⁴Edieke enye eduede fi utim ikatiaba ke usen kiet, onyuŋ afiakde etiene fi utim ikatiaba ke usen kiet edidɔhɔ ete, Mmatua mkpɔfiɔk; ana nte afo adahado ɔnɔ enye.

⁵Ekem mme apostle edɔhɔ Ɔbɔŋ ete, Nam mbuɔtidem nnyin okpon akan.

⁶Edi Ɔbɔŋ ete, Edieke mbufo enyenede mbuɔtidem eke etiede nte mkpasip mustard, mbufo ekpɔdɔhɔ eto sycamine emi ete, Wuhɔre mi ke ebiet emi, ka kɔwuhɔ ke inyaŋ; ndien enye akpanam uyo mbufo.

⁷Edi anie owo ke otu mbufo, emi enyenede ofin eke ofuŋde isɔŋ mme ɔbɔkde erɔŋ, edidɔhɔ enye, ke ini enye otode iŋwaŋ edi, ete,

⁸Sɔp di, tetie ke itie udia? nte idikam idɔhɔke enye ite, Nim udia nɔ mi ndia, nyuŋ beŋe idem, fak ɔfɔŋ fo, da mbet tutu ndia nnyuŋ ŋŋwɔŋ ŋkpɔ; ekem afo eyedia onyuŋ ɔŋwɔŋ okuo.

⁹Nte enye edikɔm ofin oro koro anamde uyo esie?

¹⁰Kpa ntre ke mbufo ŋko, ke adaŋemi mbufo enamde kpukpru se ekedɔhɔde mbufo, edɔhɔ ete, Nnyin idi ifin eke minamke utom ibe adaŋa; inam kpa se nnyin ikpanamde.

¹¹Edikem nte mmɔ esaŋade eka Jerusalem, Enye ebe ke adaŋa Samaria ye Galilee.

¹²Ndien nte Enye odukde ke obio-iŋwaŋ kiet, owo akpa-mfia duop edisobo ye Enye, enyuŋ eda nsan-nsan, emenere uyo mmɔ efiori ete,

¹³Jesus, Andikpep, tua nnyin mbɔm.

¹⁴Ke ini Enye okutde mmɔ, Enye ɔdɔhɔ mmɔ ete, Eka ekowut mme oku idem mbufo.

¹⁵Edikem nte mmɔ esaŋade eka, enam mmɔ esana. Edi ke ini owo mmɔ kiet okutde ete ema enam udɔŋɔ okure imɔ, afiak edi editoro Abasi ke ɔkpɔsɔŋ uyo;

¹⁶onyuŋ ɔduɔ okibi iso esie ke isɔŋ ke ukot Jesus, ɔkɔm Enye; ndien enye edi eyen Samaria.

¹⁷Edi Jesus ete, Nte ikanamke owo mboduop esana? owo usukkiet enye?

¹⁸Nte owo baba kiet iduhe ndifiak nditoro Abasi, ke mibɔhɔke esen owo emi?

¹⁹Ndien Enye ɔdɔhɔ owo oro ete, Daha, nyɔŋ okuo: mbuɔtidem ama anam idem ɔsɔŋ fi.

²⁰Edi ke ini mme Pharisee ebupde Enye ini eke Ubɔŋ Abasi edidide, Enye ɔbɔrɔ mmɔ ete, Ubɔŋ Abasi idige ke ido nte owo okutde enye ke enyin:

²¹owo idinyuŋ idɔhɔke ete, Se enye mi; midige, Se enye do: koro sese, Ubɔŋ Abasi odu ke otu mbufo.

²²Enye onyuŋ ɔdɔhɔ mbet Esie ete, Ini eyedi eke mbufo ediyomde ndikut usen Eyen Owo kiet, edi mbufo idikwe.

²³Ndien mmɔ eyedɔhɔ mbufo ete, Sese, ko!

²⁴Sese, mi! ekuwɔrɔ eka, ekunyuŋ etiene mmɔ. Koro kpa nte emireŋ-mireŋ ɔwɔrɔde ke ŋkaŋ ikpa-enyɔŋ kiet, ayama osim ŋkaŋ eken, kpa ntre ke Eyen Owo eyedi ke usen Esie.

²⁵Edi Enye enyene ndibem iso ŋkut ediwak ukut, mbio emana emi eyenyuŋ esin Enye.

²⁶Ndien nte ekedide ke eyo Noah, kpa ntre ke edidi ke usen Eyen Owo.

²⁷Mmɔ ekadia ŋkpɔ enyuŋ eŋwɔŋ ŋkpɔ; mmɔ edɔ ndɔ enyuŋ eda owo enɔ ke ndɔ, tutu osim usen emi Noah odukde ke ubom, ndien ukwɔ edi edisobo mmɔ kpukpru.

²⁸Kpa nte okonyuŋ edide ke eyo Lot; mmɔ ekadia ŋkpɔ enyuŋ eŋwɔŋ ŋkpɔ; mmɔ edep, enyuŋ enyam; etɔ iŋwaŋ, enyuŋ ebɔp ufɔk:

²⁹edi ke usen oro Lot ɔwɔrɔde ke Sodom, ikaŋ ye itai eto ke enyɔŋ edep edisobo mmɔ kpukpru:

³⁰kpasuk ntre ke edidi ke usen emi Eyen Owo ediyararede idem.

³¹Ke usen oro, owo eke odude ke ɔkɔm ufɔk, ŋkpɔ esie enyuŋ edude ke esit ufɔk, okukam ɔsuhɔre oduk editaŋ mmɔ: kpa ntre ŋko owo eke odude ke iŋwaŋ okukam afiak aka,

³²mbufo eti ŋwan Lot.

³³Owo eke oyomde ndiyaŋa uwem esie eyeduɔk enye: edi owo eke ɔduɔkde uwem esie eyenyaŋa enye.

³⁴Ndɔhɔ mbufo nte, Ke okoneyo oro owo iba eyena ke mbri kiet;

³⁵eyeda kiet, ekpɔŋ enye eken.

³⁶Iban iba eyekɔk ibokpot; eyeda kiet, ekpɔŋ enye eken.

³⁷Ndien mmɔ ebɔrɔ Enye ete, Ɔbɔŋ, ke mmɔŋ? Enye ete mmɔ, Ɔtɔ nte okpo anade, do ke mme utere ediboho.