Read efik LUKE 18 Bible Online

LUKE 18 - efik bible

LUKE 18

¹EKEM Enye otop ŋke ɔnɔ mmɔ, ndikpep ete mme owo ekpebɔŋ akam kpukpru ini, ekunyuŋ ekpa mba.

²Ebierikpe okodu ke obio kiet emi mibakke Abasi, minyuŋ ikereke owo: ebe-akpa onyuŋ odu ke obio oro;

³ndien enye etiene ebierikpe ediwak ini, ete, Sio owo-utɔk mi usiene nɔ mi.

⁴Edi enye inyimeke ke ndusuk ini: edi ekem enye ɔdɔhɔ ke esit esie ete, okposuk edi nte mmembakke Abasi, mmonyuŋ ŋkereke owo,

⁵sia ebe-akpa emi efefen mi eyɔ, nyesio usiene esie, mbak enye edifina mi ke eriyɔrɔ esie kpukpru ini.

⁶Edi Ɔbɔŋ ɔdɔhɔ ete, ekop se ukwaŋ ebierikpe ɔdɔhɔde.

⁷Nte Abasi idinyuŋ isioho usiene inɔ ndimek ikɔt Esie, emi esemede enɔ Enye uwem-eyo ye okoneyo, okposuk edi nte Enye emede anyan ime ke ikɔ mmɔ?

⁸Ndɔhɔ mbufo nte, Enye eyewara osio usiene ɔnɔ mmɔ. Edi ke adaŋemi Eyen Owo edidide, nte Enye eyekut mbuɔtidem ke isɔŋ?

⁹Enye onyuŋ otop ŋke emi ɔnɔ ndusuk owo, emi eburede idem mmɔ efiɔk ete mimɔ idi ndinen owo, enyuŋ esinde mmɔ efen ke ndek:

¹⁰ete, Owo iba ekɔdɔk ke temple ndibɔŋ akam: kiet edi Pharisee, enye eken edi publican.

¹¹Pharisee ada ɔbɔŋ akam ye idem esie, ete, Abasi, mmɔkɔm Fi, koro mmentiehe nte owo eŋwen, mbon nnama, mme anam ukwaŋido, mme esin-efibe, kpa ye nte publican emi.

¹²Ntre udia utim ikaba ke urua; nsosio ubak kiet ke itie duop ke kpukpru se nnyenede nnɔ Abasi.

¹³Edi publican ada nsan-nsan, inyuŋ inyimeke ndimenere kpa enyin esie nse enyɔŋ, edi amia ubɔk ke ikpanesit esie, ete, Abasi, tua mi, idiɔk owo, mbɔm.

¹⁴Ndɔhɔ mbufo nte, owo emi ɔsuhɔre ɔnyɔŋ ufɔk enyene utebe-ikpe akan enye eken: koro kpukpru owo eke emenerede idem esie, ke eyesuhɔre enye enim; edi owo eke ɔsuhɔrede idem esie, ke eyemenere enye.

¹⁵Edi eda nsek-nditɔ esɔk Enye ŋko, ete Enye otuk mmɔ ubɔk: edi ke ini mbet ekutde, esua enɔ mmɔ emi edade mmɔ edi.

¹⁶Edi Jesus okot mmɔ edi, ete, Eyak ŋkpri nditɔ etiene Mi, ekukpan mmɔ; koro Obio Ubɔŋ Abasi edide eke oruk emi.

¹⁷Ke akpanikɔ ke ndɔhɔ mbufo nte, Owo ekededi eke midibɔhɔ Obio Ubɔŋ Abasi nte ekpri eyen ididukke duk ke esit.

¹⁸Ekem ɔbɔŋ kiet obup Enye ete, Eti Andikpep, ndinam nso, man nnyene nsinsi uwem?

¹⁹Edi Jesus ɔdɔhɔ enye ete, Nsinam okotde Mi eti? Enye emi edide eti iduhe, ke mibɔhɔke Kiet, kpa Abasi.

²⁰Ɔmɔfiɔk mbet: Kusin efibe, Kuwot owo, Kuyip inɔ, Kudi ntiense nsu, Kpono usɔ ye uka.

²¹Ɔbɔŋ oro ɔdɔhɔ ete, Mma nnonim kpukpru emi toto ke uyen mi.

²²Edi ke ini Jesus okopde emi, ɔdɔhɔ enye ete, Ŋkpɔ kiet ke osuk anana fi kaŋa; nyam kpukpru se enyenede, deme nɔ mme ubuene, ndien enyenyene inyene ke heaven: nyuŋ di disaŋa ye Ami.

²³Edi ke ini enye okopde ikɔ emi, enye akabare ɔfuhɔ eti-eti, koro enye enyenede ediwak inyene.

²⁴Edi ke ini Jesus okutde enye, ɔdɔhɔ ete, Ɔsɔŋ adaŋa didie ye mbon inyene ndiduk ke Obio Ubɔŋ Abasi!

²⁵Koro edi mmem-mmem ŋkpɔ ye camel ndibe ke odudu abiabon, akan owo inyene ndiduk ke Obio Ubɔŋ Abasi.

²⁶Edi mmɔ emi ekopde edɔhɔ ete, Anie ndien ekeme ndibɔhɔ?

²⁷Edi Jesus ɔdɔhɔ ete, Se isɔŋde ikan owo ikanke Abasi.

²⁸Edi Peter ɔdɔhɔ ete, Sese, nnyin ikɔkpɔŋ kpukpru se ikenyenede nnyin itiene Fi.

²⁹Edi Jesus ɔdɔhɔ mmɔ ete, ke akpanikɔ ke ndɔhɔ mbufo baba owo kiet iduhe, emi ɔkɔkpɔŋde ufɔk, mme ŋwan, mme nditɔ-eka,

³⁰mme ete, mme eka, mme nditɔ, kabaŋa Obio Ubɔŋ Abasi, emi midibɔhɔ se iwakde ikan oro ke emi, ye nsinsi uwem ke eyo eke edidide.

³¹Ekem Enye ada mbet duopeba esihere ada ŋkaŋ kiet, onyuŋ ɔdɔhɔ mmɔ ete, Sese, nnyin imɔŋ idɔk ika Jerusalem, ndien kpukpru se mme prophet ekewetde eyewɔrɔ enɔ Eyen Owo.

³²Koro eyeyak Enye enɔ mme Gentile eyeyuŋ esak Enye nsahi, enyuŋ enam Enye but, enyuŋ efiari Enye etap:

³³ndien ke ini ekemiade Enye ema, eyewot Enye: ndien ke ɔyɔhɔ usen ita Enye eyeset ke mkpa.

³⁴Edi mmɔ ifiɔkke baba ŋkpɔ emi kiet, ikɔ emi onyuŋ odibe mmɔ, mmɔ inyuŋ ifiɔkke se Enye etiŋde.

³⁵Ekem nte Enye asaŋade ekpere Jericho, nnan kiet etie ke mben-usuŋ ebeŋe-ebeŋe:

³⁶ndien ke ini owo oro okopde nte otu esaŋade ebe, obup mmɔ mme nsitibe.

³⁷Edɔhɔ enye ete, Jesus eyen Nazareth ke ebebe.

³⁸Ndien enye ofiori ete, Jesus, Eyen David, tua mi mbɔm.

³⁹Edi mmɔ emi ebede iso esua enɔ enye, ete, okibi inua: edi enye ɔdɔdiɔŋ ofiori akan ete, Eyen David, tua mi mbɔm.

⁴⁰Jesus atuak ada, ɔnɔ uyo ete eda enye esɔk Imɔ: ndien ke ini enye asaŋade ekpere,

⁴¹Jesus obup enye ete, Oyom nnam nso nnɔ fi? Enye ete, Ɔbɔŋ, nyom nditɔŋɔ ntak ŋkut usuŋ.

⁴²Jesus ete enye, Kut usuŋ; mbuɔtidem fo ama anyaŋa fi.

⁴³Ndo-ndo oro enye okut usuŋ, onyuŋ etiene Jesus otoro Abasi: kpukpru mbio enyuŋ enɔ Abasi itoro, ke ini mmɔ ekutde ŋkpɔ emi.