Read efik LUKE 24 Bible Online

LUKE 24 - efik bible

LUKE 24

¹EDI ke akpa usen urua, ke ntuhube usenubɔk, mmɔ eda ufuɔŋkpɔ oro eketimde eka ke udi.

²Edi mmɔ ekut ete ema ekpat itiat ke udi esio.

³Ndien mmɔ eduk, edi ikwe okpo Ɔbɔŋ Jesus.

⁴Ekem nte esit otimerede mmɔ abaŋa ŋkpɔ emi, sese, owo iba emi esinede nsem-nsem ɔfɔŋidem eda mmɔ ke ŋkaŋ:

⁵ndien ke ini iban efehede ndik etuk iso ese isɔŋ, mmɔ oro edɔhɔ ete, Nsinam mbufo eyomde Enye emi odude uwem ke otu mme akpa-mkpa?

⁶Enye iduhe mi; Enye emeset; eti nte Enye eketiŋde ɔnɔ mbufo, ke ini Enye odude kaŋa ke Galilee, ete,

⁷Eyeda Eyen owo esin mme idiɔk owo ke ubɔk, eyenyuŋ ewot Enye ke cross, ndien ke ɔyɔhɔ usen ita Enye eyetɔŋɔ ntak eset.

⁸Ndien mmɔ eti ikɔ Esie, enyuŋ efiak ekpɔŋ udi eka ekebuk ofuri ŋkpɔ emi enɔ mbet duopekiet,

⁹ye kpukpru mmɔ eken.

¹⁰Iban emi edi Mary Magdalene ye Joanna, ye mary eka james; iban efen emi esaŋade ye mmɔ etiŋ mme ŋkpɔ emi enɔ mme apostle:

¹¹edi mbuk mmɔ etie ke utɔŋ mmɔ oro nte ikpikpu nneme; mmɔ inyuŋ inimke mmɔ ke akpanikɔ.

¹²Edi Peter obumere adaha efehe aka udi; onyuŋ ɔnuhɔ okut ɔfɔŋ linen nte anade ke idem mmɔ; ntre ke enye afiak ɔnyɔŋ ufɔk eyik ke se ikotibede.

¹³Ekem sese, owo iba ke otu mmɔ esaŋa kpa ke usen oro eka obio-iŋwaŋ emi ekerede Emmaus, emi oyomde ye Jerusalem mile itiaba.

¹⁴Mmɔ enyuŋ eneme nneme ebaŋa kpukpru ŋkpɔ emi ekotibede.

¹⁵Edikem nte mmɔ enemede ntre ebup kiet eken mbume, Jesus ke Idem Esie asaŋa ekpere mmɔ onyuŋ asaŋa ye mmɔ.

¹⁶Edi ebɔp mmɔ enyin ete, ekudiɔŋɔ Enye.

¹⁷Ndien Enye ɔdɔhɔ mmɔ ete, Nso oruk nneme ke eneme ntem ke isaŋ mbufo? Ndien mmɔ etuak eda, enyuŋ etie mfuhɔ-mfuhɔ.

¹⁸Edi owo mmɔ kiet, emi ekerede Cleopas, ɔbɔrɔ Enye ete, Nte Afo kpɔt edi esen owo ke Jerusalem, ndien ufiɔkke se ikotibede do ke usen ifaŋ emi?

¹⁹Jesus ɔdɔhɔ mmɔ ete, Nso idi oro? Mmɔ edɔhɔ Enye, Se ibaŋade Jesus emi otode ke Nazareth, emi ekedide prophet eke enyenede odudu ke ubɔk-utom ye ke ikɔ-inua ke iso Abasi ye ke iso kpukpru mbio-obio:

²⁰ye adaŋa nte ikpɔ oku ye mbon esop nnyin ekadade Enye enɔ ebierikpe ndiwot Enye, ye adaŋa nte mmɔ ekewotde Enye ke cross.

²¹Edi nnyin ikodori enyin ite edi Enye edifak Israel. Akan oro, emi edi ɔyɔhɔ usen ita nte ekanam mme ŋkpɔ emi ema.

²²Edi ndusuk iban, emi edude ke otu nnyin, enam idem akpa nnyin: mmɔ ebak eka udi;

²³ndien ke adaŋemi mikwe okpo Esie, mmɔ edi edidɔhɔ ete mme imɔ ikokut mme angel ke ŋkukut, emi edɔhɔde ete Enye ke odu uwem.

²⁴Ndusuk mmɔ emi edude ye nnyin enyuŋ eka udi, ekut ŋkpɔ ntre kpa nte iban ekɔdɔhɔde, edi mmɔ ikwe Enye.

²⁵Ekem Enye ɔdɔhɔ mmɔ ete, O mbon emi enanade ibuot, emi misɔpke ndinim kpukpru se mme prophet eketiŋde ke akpanikɔ.

²⁶Nte inaŋa nte Christ okut mme ukut emi, ndien ebe oduk ke Ubɔŋ Esie?

²⁷Ndien Enye ɔtɔŋɔ ke Moses ye kpukpru mme prophet asian se eketiŋde ebaŋa Enye ke Idem Esie ke ofuri Ŋwed Abasi ɔnɔ mmɔ.

²⁸Edi mmɔ esaŋa ekpere obio-iŋwaŋ emi mmɔ ekade do. Ndien Enye anam nte ŋkpɔ eke enye oyomde ndibe ŋka iso.

²⁹Edi mmɔ eyire Enye ete, Daŋ ye nnyin; koro ke ekpere mbubreyo, ndien eyo ɔmɔŋ okut.

³⁰Enye oduk akadaŋ ye mmɔ Ekem ke ini Enye etiede ye mmɔ ke itie-udia, Enye emen uyo, ɔdiɔŋ, obuŋ, ayak ɔnɔ mmɔ.

³¹Enyin mmɔ etara, mmɔ enyuŋ ediɔŋɔ Enye; Enye onyuŋ osop mmɔ ke enyin.

³²Ndien mmɔ edɔhɔ kiet eken ete, Nte esit ikofiopke nnyin, ke ini Enye enemede nneme ye nnyin ke usuŋ, onyuŋ asiakde ikɔ Abasi ɔnɔ nnyin?

³³Ndien mmɔ edaha ke enyɔŋ kpa idaha oro, efiak enyɔŋɔ ke Jerusalem, enyuŋ ekut nte mbet duopekiet ebonode ɔtɔ kiet, ye mmɔ emi edude ye mmɔ;

³⁴mmɔ oro enyuŋ edɔhɔ ete, Ɔbɔŋ emeset ke akpanikɔ, omonyuŋ owut Simon idem.

³⁵Ekem mmɔ ebuk se ikotibede ke usuŋ, ye nte ekediɔŋɔde Enye, ke ini Enye obuŋde uyo.

³⁶Edi nte mmɔ etiŋde ŋkpɔ emi, Jesus ke Idem Esie ada ke ufɔt mmɔ, onyuŋ ɔdɔhɔ mmɔ ete, Emem akpakam odu ye mbufo.

³⁷Edi mmɔ edikhe, enyuŋ efehe ndik, onyuŋ etie mmɔ nte mmɔ ke ekut spirit.

³⁸Edi Enye ete mmɔ, Nsinam esit etimerede mbufo, nsinyuŋ inam iyihe otibede mbufo ke esit?

³⁹Ese ubɔk ye ukot Mi, efiɔk ete edi Ami ke Idem Mi; efiɔŋɔ Mi, enyuŋ ese: koro spirit inyeneke obuk ye ɔkpɔ nte mbufo ekutde Ami nnyenede.

⁴⁰Ndien ke Enye ama eketiŋ ntem, Enye owut mmɔ ubɔk ye ukot Esie.

⁴¹Edi ke adaŋemi idaresit miyakke mmɔ enim ke akpanikɔ, idem onyuŋ akpade mmɔ, Enye ɔdɔhɔ mmɔ ete, Nte mbufo emenyene se owo adiade mi?

⁴²Ndien enɔ Enye ibio; ofɔp iyak.

⁴³Enye ɔbɔ ata ke iso mmɔ.

⁴⁴Enye onyuŋ ɔdɔhɔ mmɔ ete, Emi edi ikɔ eke ŋketiŋde ye mbufo, ke adaŋemi ŋkodude ye mbufo; nte kpukpru se ekewetde ebaŋa Mi ke ibet Moses ye mme prophet ye mme psalm enyene ndisu.

⁴⁵Ndien Enye aŋwaŋare mmɔ ikike, man mmɔ efiɔk ikɔ Abasi;

⁴⁶Enye onyuŋ ɔdɔhɔ mmɔ ete, Ekewet ntem, ete Christ enyene ndikpa, ndinyuŋ ntɔŋɔ ntak nset ke mkpa ke ɔyɔhɔ usen ita:

⁴⁷enyuŋ enyene nditɔŋɔ ke Jerusalem ŋkwɔrɔ erikabare esit ye erifen mme idiɔk-ŋkpɔ ke enyiŋ Esie nnɔ kpukpru mme idut.

⁴⁸Mbufo edi mme ntiense ŋkpɔ emi.

⁴⁹Sese, nyenyuŋ ndɔŋ uŋwɔŋɔ emi Ete Mi ɔkɔŋwɔŋɔde etiene mufo: edi etie ke obio ebet tutu esine mbufo odudu emi otode ke enyɔŋ.

⁵⁰Ndien Enye ada mmɔ ɔwɔrɔ tutu osim Bethany: ndien Enye emenere ubɔk Esie ke enyɔŋ ɔdiɔŋ mmɔ.

⁵¹Edikem, nte Enye ɔdiɔŋde mmɔ Enye adianare ye mmɔ, enyuŋ emen Enye edɔk eduk ke heaven.

⁵²Ndien mmɔ etuak ibuot enɔ Enye, enyuŋ efiak enyɔŋɔ ke Jerusalem ye akwa idara:

⁵³mmɔ enyuŋ edu ke temple kpukpru ini, enɔ Abasi itoro.